22 Oct 2015, 14:22
އެފްއޭއެމްގެ އިންތިޚާބު "ސައްހަ ނޫން" ކަމަށް ހޯމް މިނިސްޓްރީއިން ބުނި ބުނުމަށް އެފްއޭއެމްއިން ރައްދު ދީފިއެވެ.
އެފްއޭއެމްގެ އިންތިޚާބާ ގުޅޭ ގޮތުން އެ އިދާރާއިން ނެރެފައިވާ ބަޔާނާ ގުޅޭ ގޮތުން "ސަން"އާ ވާހަކަ ދައްކަވަމުން އެފްއޭއެމްގެ ޖެނަރަލް ސެކެޓްރީ ބައްސާމް ޢަދީލް ޖަލީލު ވިދާޅުވީ ކޮންގްރެސްގެ ކުރިން ފުރިހަމަ ކުރަންޖެހޭ މަރުހަލާތައް އެފްއޭއެމުން ފުރިހަމަކޮށްފައިވާނެ ކަމަށެވެ.
ބައްސާމް މިހެން ވިދާޅުވިއިރު އިއްޔަ ހޯމް މިނިސްޓްރިއިން ބުނެފައި ވަނީ އެފްއޭއެމްގެ އިންތިހާބު "ސައްހަ ނޫން" ކަމަށް އެ މިނިސްޓްރީއިން އެފްއޭއެމްއަށް އަންގާފައިވާނެ ކަމަށެވެ.
އޭނާ ވިދާޅުވީ އެފްއޭއެމްގެ އިންތިޚާބުގެ ކުރިން ފުރިހަމަ ކުރަންޖެހޭ ކަންތައް ފުރިހަމަކޮށްފައިވާނެ ކަމަށާއި އެގޮތުން މިދިޔަ އަހަރު އެސޯސިއޭޝަން ހިންގި ގޮތުގެ ރިޕޯޓް މިއަހަރު ޖެނުވަރީ މަހު ހުށަހަޅާފައިވާނެ ކަމަށެވެ.
އެފްއޭއެމުން މިއަދު ނެރުނު ބަޔާނުގައި ބަޔާނުގައި ބުނެފައި ވަނީ މިދިޔަ މަހު ބޭއްވުނު އެފްއޭއެމްގެ އެކްސްޓްރާ އޯޑިނަރީ ކޮންގްރެސްގައި ފާސް ކުރެވުނު އަސާސީ ގަވާއިދު ރަޖިސްޓްރީ ކުރުމަށް އެ ގަވާއިދުގެ އިނގިރޭސި ކޮޕީ މިދިޔަ މަހުގެ އަށް ވަނަ ދުވަހު ހުށަހަޅާފައިވާނެ ކަމަށާއި އަދި ދިވެހި ކޮޕީ 19 ވަނަ ދުވަހު ހުށހަޅާފައި ވާނެ ކަމަށެވެ.
މިދިޔަ މަހުގެ ފަސް ވަނަ ދުވަހު ބޭއްވުނު ކޮންގްރެސް ބާއްވައިފައި ވަނީ ހޯމް މިނިސްޓްރީގެ ޑެޕިއުޓީ ޑިރެކްޓަރު ޖެނަރަލް އިސްހާޤް އަޙްމަދާއި ޔޫތު މިނިސްޓްރީ އާއި ހޯމް މިނިސްޓްރީގެ އޮފިޝަލުންގެ ހާޒިރުގައި ކަމަށާއި ނަމަވެސް އެ ދުވަހު އެއްވެސް މައްސަލައެއް ފެންމަތި ނުކޮށް، (މިއަދު) އެފްއޭއެމްގެ ކޮންގްރެސް ބޭއްވުމަށް އެއްބާރުލުން ނުދިނުމަކީ އެފްއޭއެމްއިން ކަންބޮޑުވާ ކަމެއްކަމަށެވެ.
ބައްސާމް ވިދާޅުވީ އެފްއޭއެމްގެ އިންތީޚާބާ ގުޅިގެން އެކި ފަހަރު ދައްކާފައި ހުރި ވާހަކަތައް ތަފާތު ކަމަށާއި ފުރަތަމަ ވިދާޅުވެފައި ވަނީ އެފްއޭއެމްއާ ގުޅޭ ކޮރަޕްޝަން މައްސަލަތަކެއް ހުރުމުން އެފްއޭއެމްގެ އިންތިޚާބު ފަސް ކުރަންޖެހޭނެ ވާހަކަ ކަމަށް ބައްސާމް ވިދާޅުވިއެވެ.
"އިންތީޚަބުގެ ކުރިން ފުރިހަމަ ކުރަންޖެހޭ ކަންކަން އެފްއޭއެމްއިން ވާނީ ފުރިހަމަކޮށްފައި. ދެން އުޒުރެއް ދެއްކިދާނެ ދެއްތޯ. މިހާރު މީގެ އެންމެ ކަންބޮޑުވާ ކަމަކީ ސެޕްޓެމްބަރު ފަހެއްގައި އަޅުގަނޑުމެން ބޭއްވި ކޮންގްރެސް އައި އިރުގައި ލިޔެކިޔުންތައް ހުށަނާޅާ ވާހަކައެއް ނާދޭ. އިންތިޚާބީ ކޮންގްރެސްއަކަށް އައީމަ އެބައިވެސް އެބަ އާދޭ. ގާނޫނުގައި ބުނާ ގޮތުން ކަމުގައި ވާނަމަ ފާސް ކުރެވުނު އަސާސީ ގަވާއިދު މިޖެނީ ހުއްދަ ހޯދުމަށް ހުށަހަޅަން. ހުށަހަޅާފައި އަޅުގަނޑުމެން ވާނީ. އިންތީޚަބަށް ނުފޫޒު ފޯރުވުމަށް ކޮންމެ ވާހަކައެއްވެސް ދެއްކިދާނެ"
ބައްސާމް ވިދާޅުވީ ފީފާ އާއި އޭއެފްސީގެ ސްޓޭންޑަކީ އިންތީޚާބު ކުރިއަށް ގެންދިއުން ކަމަށާއި އެހެންކަމުން އެފްއޭއެމުން އިންތީޚާބު ކުރިއަށް ގެންދާނެ ކަމަށެވެ.
އެފްއޭއެމްގެ ބަޔާނުގައި އިތުރަށް ބުނެފައި ވަނީ މިރޭ ބޭއްވުމަށް ހަމަޖެހިފައިވާ އެސޯސިއޭޝަންގެ އެކްސްޓރާ އޯޑިނަރީ ކޮންގްރެސް ނުބޭއްވިޖެނަމަ ރާއްޖެއާ މެދު ފިޔަވަޅު އަލާނެ ކަމަށް ފީފާއިންނާ އޭއެފްސީން ވިދާޅުވެފައިވާ ކަމަށެވެ.
ޔޫތު މިނިސްޓރީއިން މިއަދު ވަނީ އެފްއޭއެމްގެ އިންޓީޚާބަ ގުޅޭ ގޮތުން ގާނޫނީ ލަފައަކަށް އެޓާނީ ޖެނަރަލް (އޭޖީ) އޮފީހުގައި އެދިފައެވެ.