25 Oct 2015, 19:09
މާލެއިން ފުރައިގެން އއ ކުރަމަތި ރިސޯޓަށް ދަތުރުކުރި "މާރަނަ 4" ދޯނީގެ ބައެއް ސާމާނުތައް އޮޔާ ދަނިކޮށް ފެނިފައިވާ ކަމަށާއި ނަމަވެސް އެ ދޯނިން ދަތުރު ކުރި މީހުން ނުފެންނަ ކަމަށް އެމްއެންޑީއެފުން ބުނެފި އެވެ.
އެ ދޯނިން ދަތުރު ކުރީ ދިވެއްސަކާއި ދެ ބިދޭސީންނެވެ. އެ ދޯންޏަކީ 75 ފޫޓްގެ ނޫ ކުލައިގެ ދަވާދު ލާފައިވާ ދޯންޏެކެވެ.
އެމްއެންޑީއެފުން ބުނީ އެ ދޯނީގެ ތަކެތި ކަމަށް ބެލެވޭ ލައިފްޖެކެޓްތަކަކާއި ޕެލެޓްތަކެއް ކަނޑުމަތިން ފެނިފައިވާ ކަމަށެވެ.
އެމްއެންޑީއެފުން ބުނީ ތަކެތި ފެނިފައިވަނީ ދޯނި ހޯދުމުގައި ހަރަކާތްތެރިވަމުންދާ އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންގެ ލޭންޑިންގ ކްރާފްޓަށް ކަމަށެވެ. އަދި ބުނީ އެތަކެތި ފެނުނީ ކ. އަތޮޅު ޒިޔާރަތްފުށީގެ ހުޅަނގުން ފަސް މޭލު ބޭރުން ކަމަށެވެ.
މާރަނަ 4 ދޯނީގެ ޚަބަރެއް އެންމެ ފަހުން ވެފައި ވަނީ ރޭ ނުވައެއްޖަހާކަންހާއިރު އއ. ވެލިގަނޑު ކައިރިން ކަމަށް ދޯނީގެ ވެރިފަރާތުން އެމްއެންޑީއެފް ކޯސްޓްގާޑުން ބުންޏެވެ.
ދޯނި ހޯދުމުގެ މަސައްކަތް އެމްއެންޑީއެފް ކޯސްޓްގާޑުން އަދިވެސް އަންނަނީ ކުރަމުންނެވެ.
މި ދޯންޏާއިބެހޭ އެއްވެސް މަޢުލޫމާތެއް ލިބިއްޖެ ނަމަ ކޯސްޓްގާޑްގެ ހިލޭ ގުޅޭނަމްބަރު 191 ނުވަތަ 3395981 އަދި 3398898 ފޯނަށް ގުޅުއްވައި، އެ މަޢުލޫމާތު ހިއްސާ ކުރެއްވުމަށް އެމްއެންޑީއެފް ކޯސްޓްގާޑުން އެދެއެވެ.
އިއްޔެގައި ގެއްލުނު ތިން ދޯނީގެ ތެރެއިން ދެ ދޯނި ވަނީ ފެތިފައެވެ. ނަމަވެސް އެ ދެދޯނިން ދަތުރުކުރި މީހުން ވަނީ ހޯދިފައެވެ.