27 Oct 2015, 12:37
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ ( އެމްޓީސީސީ) އިން ހިންގާ މަޝްރޫއުތަކަށް ބޭނުންވާ ބޮޑުހިލަ ގެނައުމުގައި ދަތިތައް ކުރިމަތިވާ މައްސަލަ މިއަހަރު ހައްލުވާނެ ކަމަށް އެ ކުންފުނިން ބުނެފި އެވެ.
އެމްޓީސީސީގެ ޗީފް އެގްޒެކެޓިވް އޮފިސަރު އިބުރާހީމް ޢަބުދުއް ރައްޒާޤު ޙަލީމް މިއަދު ވިދާޅުވީ އެމްޓީސީސީ އަށް ބޭނުންވާ ހިލަ ގެންނާނެ އުޅަނދުތައް އަންނަ ނޮވެމްބަރު މަހު ލިބޭނެ ކަމަށެވެ.
"...އިރާދަކުރެއްވިއްޔާ މި އަހަރުގެ ނޮވެމްބަރު މަސް ނިމޭއިރު އަޅުގަނޑުމެންގެ އަތުގައި ބޮޑުހިލަ ގެންނަން ތިން ބާޖާއި ތިން ޓަގްބޯޓް އޮންނާނެ. އެހާ ހިސާބުން އަޅުގަނޑުމެންނަށް މިހާރު ބޮޑު ހިލަ ގެނައުމުގައި ހުރި ދަތިކަން ވެސް ފިލައިގެން ދާނެ،" ގދ. ތިނަދޫ ބަރާސިލް އަވަށުގެ ގޮނޑު ދޮށް ހިމާޔަތް ކުރުމަށް ތޮށިގަނޑެއް ޖެހުމުގެ މަސައްކަތުގެ އެއްބަސްވުމުގައި ސޮއިކުރެއްވުމަށް ފަހު މީޑިއާއާ ވާހަކަފުޅު ދައްކަވަމުން ހަލީމް ވިދާޅުވި އެވެ.
އޭނާ ވިދާޅުވީ ބޮޑު ހިލަ ގެނައުމުގައި ދަތިތައް ކުރިމަތިވަމުން ދިޔައީ ބޭރުގެ ފަރާތްތައް މެދުވެރިކޮށް ގެންނަން ޖެހުމުން ކަމަށެވެ. ބާޖުތަކާއި ޓަގްބޯޓްތައް ގެންނަން އެމްޓީސީސީން އިންވެސްޓް ކުރީ މަޝްރޫއުތައް ބާރު ސްޕީޑްގައި ކުރިއަން ގެންދަން ބޭނުންވާތީ ކަމަށް ވެސް ވިދާޅުވި އެވެ.
ތިނަދޫ ބަރާސިލު އަވަށުގެ ގޮނޑުދޮށް ހިމާޔަތްކުރުމުގެ މަސައްކަތާ އެމްޓީސީސީ އިން މިއަދު ހަވާލުވީ 200 ދުވަހުގެ ތެރޭގައި ނިންމާ ގޮތަށް 20.8 މިލިޔަން ރުފިޔާގެ އަގަކަށެވެ. މިއަދު ސޮއިކުރި އެއްބަސްވުމުގެ ދަށުން ބަރާސިލު އަވަށުގެ އިރު ދެކުނު ސަރަހައްދުގެ އިރު ދެކުނު ސަރަހައްދުގައި 432 މީޓަރުގެ ބޮޑު ހިލައިގެ ތޮއްޓެއް ލުމަށް ވަނީ ހަމަޖެހިފަ އެވެ.
ގިނަ ރަށެއްގެ ގޮނޑުދޮށް ހިމާޔަތް ކުރުމުގެ މަސައްކަތްތާ މި އަހަރު އެކުންފުނިން މިހާރު ވެސް އަންނަނީ ކުރަމުންނެވެ.