07 Nov 2015, 10:26
އިނގިރޭސި ޕްރިމިއަ ލީގްގައި މިރޭ ޗެލްސީއާ ސްޓޯކް ސިޓީ ބައްދަލުކުރާ މެޗަށް ދަނޑަށް ނުވަދެވޭގޮތަށް ސަސްޕެންޑް ކޮށްފައިވަތީ ޗެލްސީގެ ކޯޗް ހޯޒޭ މޮރީނިއޯ ހިތްހަމަނުޖެހުން ފާޅުކޮށްފި އެވެ.
މިރޭގެ މެޗްގެ ކުރިން ނޫސްވެރިންނާ ވާހަކަ ދައްކަމުން މޮރީނިއޯ ބުނީ މީގެ ކުރިންވެސް އޭނާއަށް ވަނީ އަދަބުދީ ސަސްޕެންޑް ވެސް ކޮށްފައި ކަމަށާއި އެހެންނަމަވެސް މިފަހަރު މި އައީ ދަނޑަށް ވެސް ނުވަދެވޭ ގޮތަށް ސަސްޕެންޝަނެއް ކަމަށެވެ.
“އެ ސަސްޕެންޝަންގެ ސަބަބުން ބަދަލުތަކެއް އަންނާނެ. ހުރިހާކަމެއްވެސް ބަދަލުވެގެން ދާނެ. އަދި މީގެ ފަހުން އަހަރެން މެޗް ތަކުގައި އަމަލު ކުރާގޮތް ވެސް ތަފާތުވެގެން ދާނެ. މިއީ އަހަރެންގެ ވަޒީފާގެ މައްސޫލިއްޔަތު އަދާކުރުމަށް ހުރަސް އެޅެމުގެ ގޮތުން ކޮށްފައިވާ ކަމެއް،" މޮރީނިއޯ ބުންޏެވެ.
މޮރީނިއޯ ވަނީ އެހެން ކޯޗުންނާ އޭނާއާ ދޭތެރޭ ތަފާތުކުރުން ގެންގުޅޭ ކަމުގެ ތުހުމަތުތައް އިނގިރޭސި އެފްއޭގެ މައްޗަށް ކޮށްފައެވެ. އެ ގޮތުން ލިވަޕޫލްގެ ކޯޗް ޔާގަން ކްލޮޕް ލީގްގައި ޗެލްސީ އަތުން 3-1 އިން މޮޅުވި މެޗްގައި ކްލޮޕްގެ ފަރާތުން ފެނުނު ކަންތައްތަކަށް އެއްވެސް ފިޔަވަޅެއް އެފްއޭއިން އަޅާފާއި ނުވާތީވެ އެކަމަށް ވަރަށް ބޮޑަށް ފާޑުކިޔައި ހަމަހަމަ ގޮތަކަށް ހުރިހާ ކޯޗުންނާ ދޭތެރޭ ކަންތައް ކުރުމަށް ގޮވާލާފައެވެ.
"އަހަރެން ނިކުންނަ މެޗްތަކުގައި 90 މިނެޓް އަހަރެންގެ އަމަލުތަކަށް ފާރަލައިގެން އެ ކަންތައްތައް ބަލަން މި ހުންނަނީ ކިރިޔާ ވެސް ހިތްހަމަ ނުޖެހޭ އަމަލެއް ފެނޭތޯ. އެހެން ނަމަވެސް އެހެން ކޯޗުން ވަރިހަމަ މައިކަލް ޖޯޑަން [ކުރީގެ މަސްހޫރު ބާސްކެޓް ކުޅުންތެރިއެއް] ގޮތަށް ފުންމަމުން ދުވިޔަސް އެއްވެސް ފިޔަވަޅެއް އެޅޭ ތަނެއް ނުފެނޭ،" ހިތްހަމަ ނުޖިހިފައި ހުރި މޮރީނިއޯ ބުންޏެވެ.
ވެސްޓްހަމްއާ ދެކޮޅަށް ކުޅުނު މެޗުގައި ހިނގައިދިޔަ ކަންތައްތަކާ ގުޅިގެން މޮރީނިއޯ އަށް އެ އަދަބު ދިންއިރު އޭނާ ބުނީ މިއަދު އޭނާއަށް އެއް މެޗަށް ދަނޑަށް ނުވަދެވޭ ގޮތަށް ސަސްޕެންޑް ކުރިއިރު ކުރިއަށް އޮތްތާނގައި އެފަދަ ސަސްޕެންޝަން ތަކާއި ގިނަ ކޯޗުން ކުރިމަތިލާން ޖެހުމަކީ އެކަށީގެންވާ ކަމެއް ކަމަށެވެ.
ސްޓޯކްއާ ދެކޮޅަށް ޗެލްސީން މިރޭ ނިކުންނައިރު، ލީގުގައި އެންމެފަހުން ކުޅުނު ދެ މެޗުންވެސް ޗެލްސީ ވަނީ ބަލިވެފައެވެ. އެޓީމު އޮތީ، 11 ޕޮއިންޓާއެކު ލީގުގެ 15 ވަނައިގައެވެ. ނަމަވެސް ޗެމްޕިއަންސް ލީގްގައި އެންމެ ފަހުން އެ ޓީމް ކުޅުނު މެޗް ކާމިޔާބް ކޮށް މޮރީނިއޯ އަށް ވަނީ ކޮންމެވެސް ވަރެއްގެ ހިތްހަމަޖެހުމެއް ލިބިފައެވެ.
ސްޓޯކްގެ ދަނޑުގައި ކުޅޭ މި މެޗު ފަށާނީ މިރޭ، ރާއްޖެގަޑިން 21:30 ގައެވެ.