12 Nov 2015, 00:56
މޫސުން ގޯސްވެ ގަދަވަޔާ އެކު ވިއްސާރަ ކުރާނެތީ، ފ. އަތޮޅާއި އައްޑު އަތޮޅާ ދެމެދުގެ ސަރަހައްދުތަކަށް ޔެލޯ އެލާޓް ނެރެފި އެވެ.
މޫސުމާ ބެހޭ ގައުމީ އިދާރާއިން ނެރުނު އެލާޓްގައި ބުނީ އެ ސަރަހައްދުތަކަށް ގަދަ ވަޔާއެކު ބޯކޮށް ވާރޭ ވެހި ވިދާ ގުގުރާނެ ކަމަށެވެ. އަދި ގަޑިއަކު ގާތްގަނޑަކަށް 50 މޭލަށް ވައި ގަދަވާނެ ކަމަށް ލަފާކުރެވޭނެ ކަމަށް އެލާޓްގައިވެ އެވެ.
މޫސުން ގޯސްވާނެ ކަމަށް ބެލެވޭތީ ޔެލޯ އެލާޓް ނެރެފައި ވަނީ މިރޭ 11:45 އިން ފެށިގެން ދަންވަރު 3:30 އާއި ހަމައަށެވެ.
ރާއްޖޭގެ ގިނަ ހިސާބުތަކަށް ދަނީ ބޯކޮށް ވާރޭވެހި ގަދަޔަށް ވައި ޖެހެމުންނެވެ.
މޫސުމާ ބެހޭ ގައުމީ އިދާރާއިން ވަނީ މިރޭ 8:45 އިން ފެށިގެން ދަންވަރު 2:00 އާއި ހަމައަށް މެދުރާއްޖޭ ތެރެއަށް ވައިޓް އެލާޓް ނެރެފަ އެވެ.
އެ އިދާރާއިން ބުނީ އެ ހިސާބަށް ގާތްގަނޑަކަށް ގަޑިއަކު 45 މޭލަށް ވައިގަދަވެ، ގުގުރުމާ އެކު ބޯކޮށް ވާރޭ ވެހޭނެ ކަމަށެވެ.