13 Nov 2015, 18:25
މާލޭގެ ހުޅަނގު ފަރާތުގައި އާޓިފިޝަލް ބީޗް ހަދަމުންދާ ސަރަހައްދަށް އާއްމުން ނުވަނުމަށް ހައުސިން މިނިސްޓްރީން އެދިއްޖެއެވެ.
އެސަރަހައްދަށް މީހުން އެއްވެފައިވާ މަންޒަރު ފެންނަ ފޮޓޯއަކާ އެކު ހައުސިން މިނިސްޓްރީން މިއަދު ކުރި ޓްވީޓެއްގައި ބުނެފައި ވަނީ އެ ސަރަހައްދަށް ވަނުމަކީ ރައްކާތެރި ކަމެއް ނޫން ކަމަށެވެ.
"... ވެސްޓް ކޯސްޓް ބީޗް ސަރަހައްދަށް ނުވަނުމަށް އާއްމުންގެ ކިބައިން އިހުތިރާމާ އެކު އެދެން. އެއީ އެސަރަހައްދަކީ މަސައްކަތް ހިނގަމުންދާ ތަނަކަށް ވާތީ އަދި ރައްކާތެރި ކަމަކަށް ނުވާތީ،" ހައުސިން މިނިސްޓްރީން ކުރި ޓްވީޓްގައި ބުނެފައި ވެއެވެ.
މާލޭގެ ހުޅަނގު ފަރާތުގައި އާޓިފިޝަލް ބީޗެއް ހެދުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އާ ހަވާލުކުރީ މިދިޔަ އޮގަސްޓްމަހުއެވެ. އެސަރަހައްދުގައި4623 އަކަ މީޓަރުގެ ސަރަހައްދެން ތިން މީޓަރަށް ފުން ކުރުމާއި 2547 އަކަ މީޓަރުގެ ގޮނޑުދޮށެއް ހެދުމުގެ މަސައްކަތް އެމްޓީސީސީއާ ހަވާލުކޮށްފައި ވަނީ 41.5 މިލިއަން ރުފިޔާގެ އަގަކަށެވެ. އެ މަސައްކަތް ހަވާލުކޮށްފައި ވަނީ ހަތަރު މަސްދުވަހުގެ ތެރޭގައި ނިންމާ ގޮތަށެވެ.
އެމްޓީސީސީން މިހާރު އަންނަނީ އެމަސައްކަތް ކުރަމުންނެވެ.