17 Nov 2015, 11:45
މިދިޔަ ހުކުރު ދުވަހު ފްރާންސްގެ ޕެރިހުގައި ދިން ޓެރަރިސްޓް ހަމަލާއާ ގުޅިގެން ސަލާމަތީ ސަބަބުތަކާ ހުރެ، މިރޭ ކުޅެން ހަމަޖެހިފައި އޮތް ބެލްޖިއަމް އާއި ސްޕެއިން ބައްދަލުކުރާ އެކުވެރިކަމުގެ މެޗު މިރޭ ނުކުޅެން ނިންމައިފި އެވެ.
ބެލްޖިއަމްގެ ފުޓްބޯޅަ އިދާރާއިން ނެރެފައިވާ ބަޔާނެއްގައި ވަނީ، މި މެޗު ކެންސަލް ކުރުމަށް ބެލްޖިއަމްގެ ސަރުކާރުން އަންގާފައިވާ ކަމަށާއި، އެކަމާ ގުޅިގެން ކަމާބެހޭ ފަރާތްތަކާ ވާހަކަދެއްކުމަށްފަހު މި މެޗު ކެންސަލްކޮށްފައިވާ ކަމަށެވެ.
"ސަޕޯޓަރުންނާއި ކުޅުންތެރިންގެ ސަލާމަތަށް ވިސްނުމަށްފަހު ސަރުކާރުގެ އެދުމާ އެކު ސްޕެއިން އާއި މަޝްވަރާކޮށް މެޗު ނުކުޅޭގޮތަށް ނިންމައިފިން. އެއީ ސެކިއުރިޓީ ކަމެއްގައި މި ދަނޑިވަޅު ރިސްކެއް ނަގަން ބޭނުން ނުވާތީ،" ބެލްޖިއަމް އެފްއޭ އިން ބުންޏެވެ.
ސްޕެއިން ޓީމް ބެލްޖިއަމްއާ ދެކޮޅަށް ކުޅެން ކުރިން ހަމަޖެހިފައިވާ ފްރެންޑްލީ މެޗަށް ފަރިތަކުރަނީ --- ފޮޓޯ:އޭޕީ
މި މެޗު ފަސްކޮށްފައިވާއިރު، މިދިޔަ ހުކުރު ދުވަހުގެރޭ ފްރާންސްގެ ވެރިރަށް ޕެރިހުގެ އެކި ހިސާބުތަކަށް ބަޑި އާއި ބޮމުގެ ހަމަލާތަކެއްދީ، 129 މީހަކު ވަނީ މަރާލާފައެވެ. އަދި ހުކުރު ދުވަހުގެރޭ ދެވުނު ބޮމުގެ ހަމަލާތަކުގެ ތެރެއިން، ދެ ހަމަލާއެއް ދީފައިވަނީ ފެރިހުގައި ހުރި "ސްޓާޑް ޑެ ފްރާންސް" ސްޓޭޑިއަމްގެ ބޭރަށެވެ. ބޮމުގެ ހަމަލާތަށް ދިންއިރު، އެ ސްޓޭޑިއަމްގައި އެވަގުތު ފްރާންސް އާއި ޖާމަނީ ދިޔައި މެޗެއް ވެސް ކުޅެމުންނެވެ.
އެ ހަމަލާ ރޭވުމުގައި އެންމެ އިސްދައުރެއް އަދާކޮށްފައި ވަނީ، ބެލްޖިއަމްގެ ރައްޔިތެއް ކަމަށް ފްރާންސްގެ ޕްރޮސެކިއުޓަރުން ވަނީ ހާމަކޮށްފައެވެ. އޭނާ ބެލްޖިއަމްގައި އުޅެމުންދާ ކަމަށް ތުހުމަތުކުރެވޭތީ، ބެލްޖިއަމްގެ ސަރުކާރުން ވަނީ އެގައުމުގައި ސަލާމަތީ ފިޔަވަޅު ވަރުގަދަކުރުމަށްފަހު، "ޓެރާ ލެވެލް" ވެސް މަތިކޮށްފައެވެ.
ބެލްޖިއަމް އާއި ސްޕެއިން މެޗު ކެންސަލް ކުރި ނަމަވެސް މިރޭ އިންގްލެންޑާއި ފްރާންސް ބައްދަލުކުރާ މެޗު ކުޅެން އިންގްލެންޑާއި ފްރާންސްގެ އެފްއޭ އިން ވަނީ ނިންމައިފަ އެވެ. މި މެޗު ކުޅޭނީ އިންގްލެންޑްގެ ވެމްބްލީ ސްޓޭޑިއަމްގަ އެވެ.