17 Nov 2015, 16:11
އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށަހަޅާފައިވާ 27.457 ބިލިއަން ރުފިޔާގެ ބަޖެޓުން އެއްވެސް ފައިސާއެއް އެމްޑީޕީ އަށް ދީގެން ނުވާނެ ކަމަށް މޯލްޑިވިއަން ޑިވެލޮޕްމެންޓް އެލާޔާންސް (އެމްޑީއޭ)ގެ ލީޑަރު އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ގޮވާލައިފި އެވެ.
އަންނަ އަހަރަށް ލަފާ ކުރާ ބަޖެޓުގެ ބަހުސްގައި މިއަދު ވާހަކަފުޅު ދައްކަވަމުން އެމްޑީއޭގެ ލީޑަރު ވިދާޅުވީ އެމްޑީޕީ އިން މަސައްކަތް ކުރަމުން ދަނީ ދިވެހި ރާއްޖޭގެ ޓޫރިޒަމް ސިނާއަތު ބޮއިކޮޓް ކުރުން ކަމަށެވެ. އެހެން ކަމުން އެ ފަރާތްތަކީ ގައުމަށް ގައްދާރުވެފައިވާ ބައެއް ކަމުގައި ސިޔާމް ވިދާޅުވި އެވެ.
"އެމްޑީޕީއަކީ ޓެރަރިސްޓް އޯގަނައިޒޭޝަން އެއް. އެމީހުން މަސައްކަތް ކުރަނީ ދިވެހި ރާއްޖޭގެ ރައްޔިތުން ބަނޑަށް ޖެއްސުން. އެމީހުންނަށް ބަޖެޓުގެ އެއްވެސް ފައިސާއެއް ދީގެން ނުވާނެ،" ސިޔާމް ވިދާޅުވި އެވެ.
އެފަދަ ބަޔަކު ރައްޔިތުންގެ މަޖިލީހަށް ވެސް ވައްދައިގެން ނުވާނެ ކަމަށް ސިޔާމް ވިދާޅުވި އެވެ. އަދި އެ ފަރާތްތަކުން މަޖިލީހަށް ވަދެ ރައްޔިތުންގެ "ބޯ ކެއުމުގެ" ފުރުސަތު ދީގެން ނުވާނެ ކަމަށް ވެސް އޭނާ ވިދާޅުވި އެވެ.
ސިޔާމް ވިދާޅުވީ އެމްޑީޕީ އިން އަންނީ ގައުމަށް ގެއްލުންދޭ ފަރާތްތަކަށް ހިތްވަރު ދެމުން ކަމަށެވެ.
މަޖިލީހުގައި ތިއްބެވި އެމްޑީޕީ މެމްބަރުންނަށް ބަޖެޓުގައި ހުރި އެއްޗެއް ނޭނގުނު ކަމުގައި ވިޔަސް އެހެން މެމްބަރުންނަށް ބަޖެޓުގައި ހުރި އެއްޗެހި އެނގޭ ކަމަށް ސިޔާމް ވިދާޅުވި އެވެ.
ސިޔާމް ވިދާޅުވީ އިދިކޮޅު ފަރާތްތަކުން ކިތައްމެ ފުރައްސާރައެއް ކުރިކަމުގައި ވިޔަސް ގައުމުގެ ތަރައްގީއަށް ސަރުކާރުން ދާނީ މަސައްކަތް ކުރަމުން ކަމަށެވެ.