18 Nov 2015, 23:09
ފައިނަލްގައި އިހަވަންދޫ ޕޯލްސްޓާގެ މައްޗަށް ތިން ސެޓް އެއް ސެޓުން ކާމިޔާބު ހޯދައި ގައުމީ އަންހެން ވޮލީބޯޅަ މުބާރާތުގެ ޗެމްޕިއަންކަން ޕޮލިސް ކުލަބު ހޯދައިފިއެވެ.
މުބާރާތުގެ ފައިނަލަށް ޕޮލިސް ދަތުރު ކުރީވެސް ސެމީ ފައިނަލް ފުރަތަމަ މެޗްގައި މި ނަތީޖާއިން އިހަވަންދޫ ޓީމު ބަލިކުރުމަށްފަހުގައެވެ.
ސޯޝަލް ސެންޓަރު އިންޑޯ ކޯޓްގައި މިރޭ ކުޅުނު ފައިނަލް މެޗްގެ ފުރަތަމަ ސެޓް ޕޮލިސް ކުލަބު ކާމިޔާބު ކުރީ 25-17 އިންނެވެ.
މެޗްގެ ދެ ވަނަ ސެޓް އިހަވަންދޫ ޓީީމް ކާމިޔާބު ކުރީ 25-18 އިންނެވެ.
ތިން ވަނަ ސެޓް ޕޮލިސް ކްލަބު ކާމިޔާބު ކުރީ 25-18 އިންނެވެ. އަދި މެޗުން ޕޮލިސް ކްލަބު މޮޅުވި ސެޓް ކާމިޔާބު ކުރީ 25-15 އިންނެވެ.
ފައިނަލް މެޗްގެ އެންމެ މޮޅު ކުޅުންތެރިޔަކީ ޕޮލިސްގެ ހައްވާ ޝާހިދާއެވެ.
މުބާރާތުގެ ޑްރީމް ޓީމު ހޮވުމުގައި ޚާއްސަކޮށްފައިވަނީ ހަމައެކަނި ދިވެހި ކުޅުންތެރިންނަށެވެ.
މުބާރާތުގެ ނަވާރަ އަހަރުން ދަށުގެ އެންމެ މޮޅު ކުޅުންތެރިޔަކީ ނައިފަރު ޖުވެނައިލްގެ ހައްވާ އަރީޝާއެވެ. އެކާވިސް އަހަރުން ދަށުގެ އެންމެ މޮޅު ކުޅުންތެރިޔަކަށް ހޮވިފައިވަނީ ދިއްދޫ ޓީނޭޖް ބޯއީސްގެ ފާތިމަތު ޖުޝާންއެވެ.
މުބާރާތުގެ އެންމެ މޮޅު ކުޅުންތެރިޔަކީ ޕޯލްސްޓާގެ ތައިލެންޑް ކުޅުންތެރިޔާ މޯލީއެވެ.
މުބާރާތުގެ އެންމެ މޮޅު ކޯޗަކީ ޕޮލިސް ކުލަބުގެ ކޯޗް މުހައްމަދު ނަދީމެވެ.
މެޗަށް ފަހު ވާހަކަ ދައްކަމުން ނަދީމު ބުނީ ޕޮލިސް ކުލަބުގެ ކާމިޔާބަކީ މުބާރާތުގެ އެހެން މެޗްތަކުގައި ހެދުނު މިސްޓޭކް ތައް ރަނގަޅުކޮށްގެން ފައިނަލްގައި ކުޅުން ކަމަށެވެ.
ޕޯލްސްޓާގެ ކޯޗް ޞޮފްވާން އަހްމަދު ބުނީ އެންމެ ބޮޑަށް ދިމާވި މައްސަލައަކީ ޕޮލިސް ކުލަބު ކުޅުންތެރިންނަށްވުރެ ޕޯލްސްޓާގެ ކުޅުންތެރިން އިސްކޮޅުން ކުރުވުން ކަމަށެވެ. ނަމަވެސް މުބާރާޓުގައ ޕޯލްސްޓާގެ ކުޅުންތެރިން ދެއްކި ކުޅުމާ މެދު ހިތްހަމަޖެހޭ ކަމަށް ސޮފްވާން ބުންނެވެ.
ގައުމީ އަންހެން ވޮލީބޯޅަ މުބާރާތުގެ ފައިނަލް މެޗު ޝަރަފްވެރިކޮށްދެއްވީ ރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އެވެ. އަދި ޗެމްޕިއަންޓީމަށް މުބާރާތުގެ ޓްރޮފީ ހަވާލުކޮށްދެއްވީވެސް އެމަނިކުފާނެވެ.