20 Nov 2015, 14:15
ރައީސް އަބްދުﷲ ޔާމީންގެ ދައުވަތަކަށް ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު ސައުދީ އެރެބިޔާގެ އިސްލާމިކް މިނިސްޓަރު ސާލިހް ބްނު އަބްދުލްއަޒީޒް ބުނު މުހައްމަދު މިއަދު ފުރާ ވަޑައިގެންފި އެެވެ.
މިއަދު ހެނދުނު އިބްރާހިމް ނާސިރު އިންޓަނޭޝަނަލް އެއާޕޯޓުން ސައުދީގެ އިސްލާމިކް މިނިސްޓަރަށް އަލަވަދާއު ވިދާޅުވީ ރާއްޖޭގެ އިސްލާމިކް މިނިސްޓަރު ޑރ އަހުމަދު ޒިޔާދު ބާގިރު އެވެ.
ސައުދީ އަރަބިއްޔާއާ އާއި ރާއްޖެއާ ދެމެދު ސޮއިކުރި އެއްބަސްވުން ދެގައުމުގެ އިސްލާމިކް މިނިސްޓަރުން އެއްބަސްވުން އެކްސްޗޭންޖް ކުރައްވަނީ. ސަން ފޮޓޯ: ޢަލީ ނަސީރު
ސައުދީގެ އިސްލާމިކް މިނިސްޓަރު ރާއްޖެ އަށް ކުރެއްވި ތިން ދުވަހުގެ ދަތުރުފުޅުގައި އިސްލާމްދީނަށް ގޮވައިލުމާއި ދީނީ ހޭލުންތެރިކަން އިތުރުކުރުމާއި ދީނާ ގުޅުން ހުރި ކަންތައްތަކުގައި އެއްގައުމުން އަނެއް ގައުމަށް އެއްބާރުލުން ދިނުމުގެ އެއްބަސްވުމެއްގައި ރާއްޖެއާ ސަޢުދީ ޢަރަބިއްޔާއިން ވަނީ ސޮއިކޮށްފަ އެވެ.
އޭގެ އިތުރުން ރައީސް ޔާމީންގެ އަރިހަށް އިހުތިރާމްގެ ޒިޔާރަތެއް ވަނީ މިނިސްޓަރު ސާލިހް ކުރައްވައިފަ އެވެ. އަދި އިސްލާމިކް މިނިސްޓްރީން އިންތިޒާމްކޮށްގެން ބާއްވާ އިލްމުވެރިންގެ މަހާސިންތާ ފެށުމުގެ ރަސްމިއްޔާތުގައި ވެސް ސައުދީގެ އިސްލާމިކް މިނިސްޓަރު ވަނީ ބައިވެރިވެ ވަޑައިގެންފަ އެވެ.