25 Nov 2015, 09:59
މޮސްކޯ (ނޮވެމްބަރު 25) : ތުރުކީން ރަޝިޔާގެ އަސްކަރީ ފައިޓާ ޖެޓެއް ވައްޓާލުމަކީ އެކަމުގެ ހިތިރަހަ ތުރުކީއަށް ފެންނާނެ ކަމެއްކަމުގެ އިންޒާރު ދެއްވަމުން އެއީ ރަޝިޔާގެ ބުރަކަށްޓަށް ވަޅިޖެހުން ފަދަ ކަމެއްކަމަށް ރަޝިޔާގެ ރައީސް ވްލްޑިމޭރު ޕޫޓިން ސިފަކުރައްވައިފި އެވެ.
ޕޫޓިން ވިދާޅުވީ ތުރުކީން ވައްޓާލީ ސޫރިޔާގައިވާ އައިއެސް ޖަމާއަތުގެ އަމާޒުތަކަށް ހަމަލާތައް ދިނުމުގައި ހަރަކާތްތެރިވަމުން ދިޔަ ރަޝިޔާގެ ސޮޚޯއި 29 މަރުކާގެ ފައިޓަރޖެޓެއް ކަމަށާއި މިކަން ތުރުކީން ކުރީ އައިއެސްއިން ވަގަށް ނަގައިގެން ކަޅުބާޒާރުގައި އަގުހެޔޮކޮށް ވިއްކާ ސޫރިޔާގެ ތެލުގެ މަންފާ ތުރުކީގެ އިގްތިސާދަށް ލިބޭމިންވަރުގެ ބޮޑުކަމުން ކަމުގައެވެ. މިގޮތުން ތުރުކީއަކީ ޓެރަރިސްޓް ޖަމާއަތްތަކުގެ ބައިވެރިއެއް ކަމުގެ ތުހުމަތުވެސް ޕޫޓިން ކުރެއްވިއެވެ. ތުރުކީގެ މިއަމަލުގެ ނަތީޖާ ވަރަށް ހިތިވާނެ ކަމުގެ އިންޒާރު ދެއްވި ނަމަވެސް ތުރުކީއާ ދެކޮޅަށް ބަދަލުހިފާނެ ގޮތެއް ޕޫޓިން ހާމަކުރައްވާފައެއް ނުވެ އެވެ.
ތުރުކީ ބުނާގޮތުން ރަޝިޔާގެ ބޯޓު ވައްޓާލަންޖެހުނީ އެގައުމުގެ ވައިގެ ސަރަހައްދަށް ވަނުމާއެކު ވައިގެ ސަރަހައްދުން ބޭރުވުމަށް އެބޯޓަށް އެތައް ފަހަރަކު އެންގުމުންވެސް ވައިގެ ސަރަހައްދުން ބޭރުނުވުމުންނެވެ. ތުރުކީގެ ޙަމަލާއާއެކު ރަޝިޔާގެ ފައިޓާ ޖެޓްގައި އަލިފާންރޯވެ އެބޯޓު ވެއްޓިފައިވަނީ ސޫރިޔާގެ ބިމަށް ކަމަށްވާތީ ތުރުކީގެ މިވާހަކަތައް ރަޝިޔާއިން ގަބޫލެއް ނުކުރެއެވެ. ތުރުކީއަކީ ނޭޓޯގެ ގައުމަކަށް ވެފައި ތުރުކީގެ ދިފާއުގައި ނޭޓޯ އޮންނާނެތީ އެގައުމާ ދެކޮޅަށް ބަދަލުހިފުމުގެ ހަމަލާއެއް ދިނުމަކީ ރަޝިޔާއަށް ފަސޭހަ ކަމަކަށްނުވާނެ އެވެ. އެހެންކަމުން މިމައްސަލާގައި ރަޝިޔާއިން ބަދަލުހިފާނީ ސޫރިޔާގައިވާ ތުރުކީގެ މަސްލަހަތުތަކާ ދެކޮޅަށްކަމަށް ވަނީ ބެލެވިފަ އެވެ. މިގޮތުން ރައީސް ބައްޝާރުލްއަސަދުގެ ސަރުކާރު ވައްޓާލުމަށް ހަރަކާތްތެރިވާ ތުރުކީގެ ތާއީދު ލިބިފައިވާ ހަނގުރާމަވެރި ޖަމާއަތްތަކާ ދެކޮޅަށް ރަޝިޔާއިން ވަރަށް ވަރުގަދަ ހަމަލާތަކަށް ދީ އެޖަމާއަތްތައް ބަލިކޮށްލުމަކީ އެކަށީގެންވާ ކަމެކެވެ.
ތުރުކީއާއި ރަޝިޔާއަކީވެސް ސޫރިޔާގައި އެމިއްލަ މަސްލަޙަތުތަކެއް ޙާސިލްކުރަން މަސައްކަތްކުރާ ދެގައުމެވެ. އަދި ގަތަރާއި ސައޫދީ އަރަބިޔާއާއި އީރާނާއި އެމެރިކާއަކީ ވެސް އެގައުމުތަކުގެ މަސްލަހަތުތައް ސޫރިޔާގައި ޙާސިލްކުރަން މަސައްކަތްކުރާ ގައުމުތަކެކެވެ. ސޫރިޔާގެ ބިންވަނީ މިހުރިހާ ގައުމުތަކެއްގެ އަރާރުންތަކާއި ތަޅާފޮޅުންތައް ހިނގާ ތަނަކަށް ވެފަ އެވެ. ސޫރިޔާގެ ހަނގުރާމަ ދިގުލައިގެންދިޔުމުގެ ސަބަބަކީވެސް މިއެވެ. މިހުރިހާ ތަޅާފޮޅުންތަކެއްގެ ޝިކާރައަކަށް ވެފައިވަނީ ސޫރިޔާގެ ނިކަމެތި ރައްޔިތުންނެވެ. ސޫރިޔާގެ ސަރުކާރު ރަޝިޔާއާއި އީރާނާ ގުޅިފައިވާ އިރު ހަނގުރާމަވެރި ޖަމާއަތްތަކާ ގުޅިފައިވަނީ އަރަބި ބައެއް ގައުމުތަކާއި ތުރުކީއާއި އެމެރިކާފަދަ ގައުމުތަކާ އެވެ.
ސޫރިޔާގެ ކަންކަމުގެ ތެރެއަށް ވަނުމުގެ ފުރްސަތު ބޭރުގެ ފަރާތްތަކަށް ދީފައިވަނީ އެގައުމުގެ ސަރުކާރާއި އިދިކޮޅު ޖަމާއަތްތަކުންނެވެ. މިކަމުގެ ޝިކާރައަކަށްވެ މަރުވެ ފަނާވެގެންދަނީ އަދި ރެފިއުޖީންގެ ގޮތުގައި ގައުމުން ބޭރުވަމުންދަނީ ސޫރިޔާގެ ނިކަމެތި ރައްޔިތުންނެވެ.
ތުރުކީން ރަޝިޔާގެ އަސްކަރީ ޖެޓް ވައްޓާލުމުން އޭގެ އެއްޕައިލެޓް މަރުވެފައިވާއިރު އަނެއް ޕައިލެޓްވަނީ ގެއްލިފައެވެ. މަރުވި ޕައިލެޓްގެ ހަށިގަނޑާއި ރަޝިޔާގެ ޖެޓްގެ ބައިތައް ފެނިފައިވަނީ ސޫރިޔާގެ ލާޒިގިއްޔާއާ ކައިރި ސަރަހައްދަކުންނެވެ. (ނޫސްއެޖެންސީތައް)