28 Nov 2015, 19:16
އައްޑު އަތޮޅު ހިތަދޫގައި އަޅަން ނިންމާފައިވާ ރީޖަނަލް ހޮސްޕިޓަލުގެ އާ އިމާރާތް ކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީއިން ހުޅުވާލި ބީލަން އަނެއްކާވެސް ބާތިލު ކޮށްފިއެވެ.
އައްޑޫގައި 100 އެނދުގެ ހޮސްޕިޓަލެއް އަޅަން ފިނޭންސް މިނިސްޓްރީ އިން މި މަހު 19 ވަނަ ދުވަހު ހުޅުވާލި ބީލަން މިދިޔަ ބުރާސްފަތި ދުވަހު ބާތިލްކޮށްފައިވާ އިރު، އެ ބީލަން ބާތިލް ކުރި ސަބަބެއް އެ މިނިސްޓްރީއިން ހާމަކޮށްފައެއް ނުވެއެވެ.
ސައުދީ ފަންޑާއި އޯޕެކް ފަންޑުން ދޭ ލޯނުގެ އެހީގެ ދަށުން އެޅުމަށް ހަމަޖެހިފައިވާ އެ ހޮސްޕިޓަލް އިމާރާތް ކުރާނެ ފަރާތެއް ހޯދުމަށް މި އަހަރު ޖެނުއަރީ 22 ވަނަ ދުވަހު ވެސް ވަނީ ބީލަމަށް ހުޅުވާލާފައެވެ.
އޭރު ހުޅުވާލި ބީލަން ބާތިލް ކުރީ އެކަމަށް ނުވަ ފަރާތަކުން ކުރިމަތިލައި، އޭގެ ތެރެއިން ހަ ފަރާތެއް ޕްރިކޮލިފައިވެސް ކުރި ފަހުންނެވެ.
ހިތަދޫގައި އަޅަން ނިންމާފައިވާ ހޮސްޕިޓަލް އިމާރާތް ކުރުމަށް ސައުދީ ފަންޑުން 12.5 މިލިއަން ޑޮލަރުގެ ލޯނެއް ލިބިފައިވާއިރު، އޯޕަކް ފަންޑުން ލިބިފައިވަނީ 8.5 މިލިއަން ޑޮލަރުގެ ލޯނެކެވެ.