ކައުސާހިބާ صلّى اللّـه عليه وسلّم ގެ ކާވެނިފުޅުތަކާމެދު ކުރެވޭ އިޢުތިރާޟުގެ ޖަވާބުގައި (އަށްވަނަ ބައި)

30 Nov 2015, 07:31

ޝައްކެއްނެތެވެ. ތެދުމަގަށް ދަޢުވަތުދޭ ފަރާތެއްގެ އަގުވައްޓައިލައި، އެފަރާތެއްގެ މަސައްކަތަށް ހުރަސްއަޅަން ކުރާ މަސައްކަތެއް އެންމެބޮޑަށް ކަމުފޮޅާނީ، އެފަރާތެއްގެ އަޚްލާޤީ ދާވަނި ކިލަނބުކޮށްގެންނެވެ. ޔަހޫދީންނާއި މުނާފިޤުން ރެއެއްދުވާލެއްނެތި މިވާހަކަތައް ފަތުރަމުން ގެންދިޔައެވެ. އިންސާނިއްޔަތުގެ އެންމެބޮޑު މުޙުސިން ބަދުނާމުކުރަމުން ގެންދިޔައެވެ. މުސްލިމަކު މަގުމަތީން ފެނުނަސް އެމީހަކަށްވެސް ފުރައްސާރަކޮށް، މަލާމާތް ކުރަމުންގެންދިޔައެވެ. އެހެންކަމުން، އަރަހުށި މާތްاللّـهމުސްލިމުންގެ ހިތްތަކަށް ހަމަޖެހުން ދެއްވުމަށާއި، މުސްލިމުންނަށް ތަރުބިޔަތު ދެއްވުމަށް، ބައެއް ޙަޤީޤަތްތައް މުސްލިމުންނަށް ހަނދާންކޮށްދެއްވިއެވެ. އަރަހުށި މާތްاللّـهނަބީބޭކަލަކަށްޓަކައި މިންވަރު ކުރައްވައިފައިވާކަމެއް، އެބޭކަލަކު ކުރެއްވުމުން، ބަޔަކު ދައްކާ ދޮގުވާހަކަތަކަކީ ކުޑަވެސް ފަރުވާލެއް ބަހައްޓަންޖެހޭ ވާހަކަތަކެއް ނޫންކަން ބަޔާންކުރެއްވިއެވެ. އެކަލާނގެ ވަޙީބަސްފުޅުގައިވެއެވެ.

"اللّـه،ނަބިއްޔާއަށް ހުއްދަކޮށްދެއްވި ގޮތާމެދު، އެއްވެސް ކުށެއް، ފާފައެއް އެނަބިއްޔާއަކަށް ނުވެއެވެ. (އެއީ) އިސްވެދިޔަ ނަބިއްޔުންގެ ތެރޭގައިވެސް،اللّـهކަންހިންގެވިގޮތެވެ. އަދިاللّـهގެ އަމުރުފުޅު އެއީ، ކަނޑައެޅި ނިޔާކުރައްވައިފައިވާ ނިޔާއެއްކަމުގައިވެއެވެ."(سورة الأحزاب: 38)

ހަމައެފަދައިން، އަރަހުށި މާތްاللّـهމިކާވެނިފުޅުގެ ކަންތައް މިންވަރުކުރެއްވީ ކީއްވެގެންކަންވެސް، ޞަރީޙު ބަސްފުޅުން ބަޔާންކޮށްދެއްވިއެވެ. އާދެ، އެއީ މުތަބަންނީން އިނދެވަރިކުރާ މީހުންނާ ކާވެނިކުރުމުގައި އެއްވެސް ހުރަހެއް ނެތްކަން ބަޔާންކުރެއްވުމެވެ. (سورة الأحزابގެ37ވަނަ އާޔަތުގައިވާ މިކަމުގެ ޙުކުމް، އިސްވެދިޔަތާނގައިވަނީ ބަޔާންކުރެވިފައެވެ.) ހަމައެފަދައިން، އިތުރަށް ޞަރީޙަ ކުރެއްވުމަށްޓަކައި އިޢުލާން ކުރެއްވިއެވެ.

"ތިޔަބައިމީހުންގެ ބޮޑެތި ފިރިހެނުންގެ ތެރެއިން އެކެއްގެވެސް ބަފައިކަލަކު ކަމުގައިمحمّدގެފާނު ނުވެއެވެ. އަކި ކީއްހެއްޔެވެ! (އެކަލޭގެފާނީ)اللّـهގެ ރަސޫލާއެވެ. އަދި ނަބީކަން ޚަތިމުކުރެއްވި ކަލޭގެފާނުވެސްމެއެވެ. އަދި ކޮންމެ ކަމެއް މޮޅަށް ދެނެވޮޑިގެންވާ ކަލަކު ކަމުގައިاللّـهވޮޑިގެންވެއެވެ."(سورة الأحزاب: 40)

ހަމައެއާއެކު، މުނާފިޤުންނާއި ކާފަރުންގެ ވާހަކަތަކާމެދު އަޅާނުލެއްވުމަށާއި، މާތްاللّـهއަށް ބަރޯސާކުރެއްވުމަށް ކައުސާހިބާصلّى اللّـه عليهوسلّمއަށްވެސް އަމުރުކުރެއްވިއެވެ. ވަޙީކުރައްވައިފައިވަނީ މިދަންނަވާ ގޮތަށެވެ.

"އަދި ކާފަރުންނާއި، މުނާފިޤުންނަށް ކަލޭގެފާނު ކިޔަމަންވެވަޑައިނުގަންނަވާށެވެ! އަދި އެއުރެންގެ އުނދަގޫތައް (ފަރުވާލެއް ނުބަހައްޓަވައި) ދޫކޮށްލައްވާށެވެ! އަދިاللّـهއަށް ވަކީލު ކުރައްވާށެވެ! އަދި ވަކީލަކު ކަމުގައިاللّـهފުދެއެވެ."(سورة الأحزاب: 48)

މި ތުހުމަތުގެ އަޑިޔާ ހަމައަށް އަޅުގަނޑުމެން ވިސްނުން ފޯރުވާއިރު، ތަބުނިއްޔަތު ހުއްދަކަމުގެ ނައްޞެއް އެއްކިބާގައި އޮއްވައި، އެފަދަ ޤަރީނާއެއްވިޔަސް މޫސަވީ ޝަރީޢަތަކުވެސް ނުވެއެވެ. ބައިބްލަކުވެސް އެކަން ހުއްދަކޮށްފައެއް ނުވެއެވެ. (އިސްލާމްދީނުގައި މުތަބަންނީންގެ ޙުކުމް ސޫރަތުލް އަޙްޒާބުގެ ހަތަރުވަނަ އާޔަތާއި ފަސްވަނަ އާޔަތުގައި އެވަނީއެވެ. އިސްލާމްދީން އެދެނީ، ޖާހިލިއްޔަތުގެ މި ރަސްމު އުވާލުމެވެ. ޖާހިލީ ޒަމާނުގައި އެކަމުގެ ޙައްސާސްކަން އޮތްވަރުން، އެކަމަށް ޚާއްޞަކުރެއްވީ، ސީދާ އިސްލާމްދީނުގެ ނަބިއްޔާصلّى اللّـه عليه وسلّمއެވެ.)

ޔަހޫދީންނާއި ނަޞާރާއިން (ޚާއްޞަކޮށް ނަޞާރާއިން) މި ކާވެނިފުޅަށް އިއުތިރާޟުކުރަނީ، މި ކާވެނިފުޅުގެ ސަބަބުން އެބައިމީހުންގެ ޓްރިނިޓީގެ ޢަޤީދާގެ މުލުގައި މުޅޯއިން ޖެހޭތީއެވެ. މާތްاللّـهގެ ދަރިކަލަކު ވާކަމުގައިވެ، އެބައިމީހުން ކުރާ ދަޢުވާ ބާޠިލުވާތީއެވެ.

އިސްލާމްދީން ޞަރީޙު ބަހުން އިޢުލާންކޮށްފައިވަނީ، ތިމާއާ ސީދާ ލޭގެ ގުޅުން ގުޅި، ތިމާގެ ދަރިޔަކު ކަމުގައިވެފައިނުވާ މީހަކު، ތިމާގެ ދަރިޔަކަށް ނުވާނެކަމެކެވެ. ތިމާގެ ޙަޤީޤީ ދަރިޔަކަށްނުވާ މީހަކު، ތިމާގެ ދަރިޔެއްކަމަށް ހަދަންކުރާ ދަޢުވާއަކީ، މާސިންގާ ބުހުތާނެއްކަމެވެ. އެހެންކަމުން، އިންސާނަކު ބަނޑުއަޅައި ވިހައިފައިވާ އިންސާނަކާމެދު މާތްاللّـهގެ ދަރިކަލެއްކަމުގައި ބުނުންވާނީ ކަނޑައެޅިގެން ހުރި ބާޠިލު ކަމެއްކަމުގައެވެ. ރޯބުހުތާން ދޮގެއް ކަމުގައެވެ. މާތްاللّـهއާ އިންސާނަކާ އެއްވެސް ޙައިޘިއްޔަތަކުން އެއްފަދަވެގެންނެއް ނުވެއެވެ. އެއްގޮތްކަމެއް ނުވެއެވެ. އިންސާނާއަކީ ފުރާނައަކާއި ޖިސްމެއްގެ އެކުވުމެކެވެ. އެތަކެއް ބޭނުންތަކަކާއި އެތަކެއް އެދުންތަކެއްގެ އަޅުވެތިކަމުގައި ހުންނަ މީހެކެވެ. އޭނާއަކީ އެންމެންގެ ލޯމަތީގައި، މީހެއްގެ ބަނޑުން އުފަންވާ މީހެކެވެ. ނުހަނު ބަލިކަށި ޙާލަތަކުން ޒުވާންފުރައަށް އަރައި، މުސްކުޅިވެ، ގައިބާރު ދޫވެ، ފަސްގަނޑުދަށަށް ދާންޖެހޭ މީހެކެވެ. އެފަދަ ފަރާތެއް ތާއަބަދަށް ދިރިދެމިވޮޑިގެންވާ، އެއްވެސް އެއްޗަކަށް ނުއުފަންނަ މަތިވެރި ޒާތުފުޅެއްގެ ދަރިކަލަކަށްވުމުގެ އެއްވެސް ފުރުޞަތެއް ނެތެވެ.

އިސްލާމްދީނުގެ ނަބިއްޔާصلّى اللّـه عليه وسلّم،أمّ المؤمنين السّيّدة زينب بنت جحش رضى اللّـه عنهاއާ ކާވެނިބެއްލެވުމުން، ކްރިސްޓިއަނުންގެ ލޯތަކަށް ހަމަނިދި ނައިސްގެން އުޅެނީ، އެކަމާ ހުރެއެވެ.

އަޞްލަކަށް ބެލި ފޮތްތައް:

(ނިމުނީ)