04 Dec 2015, 00:05
މޫސުމަށް އަންނަ ބަދަލުތަކުން ކުދި ގައުމުތައް ސަލާމަތްކުރުމަށް އޮތް ހައްލަކީ 'ސޭފް އައިލެންޑްސް' ކަމަށް މިނިސްޓަރު ތާރިގު އިބްރާހިމް ވިދާޅުވެއްޖ ެއެވެ.
އެންވަޔަރަންމެންޓް މިނިސްޓަރު ތާރިގު އިބްރާހިމް އެހެން ވިދާޅުވީ ޕެރިހުގައި ކުރިއަށްދާ "ކޮޕް 21"ގެ ހަވާސާގައި ރާއްޖޭގެ ފަރާތުން ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
"ސޭފާ އައިލެންޑްސް"އަކީ ތިމާވެށްޓަށް އަންނަ ބަދަލުތަކުން ކުރާ ނޭދެވޭ އަސަރުތަކަށް ރައްކާތެރިވުމަށް ސަމާލުކަން ދީގެން އަދި ދެމެހެއްޓެނިވި ތަރައްގީ އާއި އިގްތިސާދީ ނަޒަރުން ވިސްނައިގެން ތަރައްގީ ކުރާ ރަށްތައް ކަމަށް މިނިސްޓަރު ވަނީ ވިދާޅުވެފަ އެވެ.
ކޮޕް 21ގެ ހަވާސާގައި މިނިސްޓަރު ތާރިގު އިބްރާހިމް ޕްރެޒެންޓޭޝަނެއް ދެއްވި ރަސްމިއްޔާތުގެ ތެރެއިން-- ފޮޓޯ/ އެންވަޔަރަމަންޓް މިނިސްޓްރި
'ސޭފާ އައިލެންޑްސް' އާއި ބެހޭ ގޮތުން މިނިސްޓަރު ޠާރިގު ދެއްވި ޕްރެޒެންޓޭޝަންގައި ވަނީ ސޭފާ އައިލެންޑް ތަރައްގީ ކުރުމުގައި ރާއްޖޭން ކޮށްފައިވާ ތަޖުރިބާ ހިއްސާކޮށްފަ އެވެ. އެގޮތުން ސަރުކާރުން ތ. ވިލިފުށި ތަރައްގީކޮށްފައި ވަނީ ސޭފާ އައިލެންޑެއްގެ ގޮތުގައި ކަމަށް މިނިސްޓަރ ވިދާޅުވި އެވެ. މީގެ އިތުރުން ރ. ދުވާފަރުގައި ވެސް މީހުން އާބާދުކޮށްފައި ވަނީ ސޭފާ އައިލެންޑެއްގެ ގޮތުގައި ކަމަށް މިނިސްޓަރ ވިދާޅުވި އެވެ. އަދި ގދ. ތިނަދޫގެ ބިން ހިއްކުމުގެ މަޝްރޫއު ކުރިއަށްގެން ދަނީ ވެސް ސޭފާ އައިލެންޑެއްގެ ވިސްނުމުގައި ތަރައްގީކުރާ ރަށެއްގެ ގޮތުގައި ކަމަށް މިނިސްޓަރު ވިދާޅުވިއެވެ.
އެ ރަސްމިއްޔާތުގައި ވާހަކަދެއްކެވި ބޭފުޅުންގެ ތެރޭގައިލަގްޒަމްބާގްގެ މިނިސްޓަރ އޮފް އެންވަޔަރަންމެންޓް ކެރޯލް ޑައިޝްބާގް އާއި ސޭންޓްލޫސިއާގެ މިނިސްޓަރ އޮފް ސަސްޓޭނަބަލް ޑިވެލޮޕްމެންޓް އެނަރޖީ ސައިންސަސް އެންޑް ޓެކްނޮލަޖީ ޑރ. ޖޭމްސް ފްލެޗަރ އާއި އައިޕީސީސީގެ ޗެއާމަން ޕްރޮފެސަރ ހުއިސަން ލީ ހިމެނެއެވެ.