04 Dec 2015, 13:30
ސަސްޕެންޝަންގައި ހުރި އެއްވެސް ކުޅުންތެރިއެއް ލައްވައި ރެއާލުއިން ނުކުޅުވާ ކަމަށް އެ ކްލަބުގެ ރައީސް ފްލޮރެންޓީނޯ ޕެރޭޒް ބުނެފި އެވެ.
ކޮޕަޑެލްރޭ ނުވަތަ ސްޕެނިޝް ކަޕްގައި ކާޑިޒްއާ ދެކޮޅަށް ރެއާލު ކުޅުމު މެޗުގައި ތިން ރީނދޫ ކާޑް ހަމަވެފައިވާ ރެއާލުގެ ޑެނިސް ޗެރިޝްވް ކުޅުވި މައްސަލައާ ގުޅޭ ގޮތުން ވާހަކަ ދައްކަމުން ޕެރޭޒް ބުނީ ކުޅުންތެރިއަކު ތިން ކާޑު ހަމަވުމުން ނުކުޅެވޭނެކަން އަންގަން ޖެހޭނެ ކަމަށް ސްޕެއިންގެ ފުޓްބޯޅަ ފެޑްރޭޝަންގެ ޑިސްޕްލިނަރީ ކޯޑުގެ 41 ވަނަ މާއްދާގައި ބުނެފައިވާ ކަމަށާއި ނަމަވެސް ޗެރިޝޭވް ސަސްޕެންޑްވެފައި ހުރިކަމެއް ސްޕެއިންގެ އެފްއޭ އިން އަންގާފައި ނުވާ ކަމަށެވެ.
ސްޕެއިންގެ ފުޓްބޯޅަ ފެޑްރޭޝަންގެ ޑިސިޕްލިނަރީ ކޯޑުގައި ބުނެފައި ވަނީ އެއްވެސް މީހަކަށް ސަސްޕެންޝަންގެ ފިޔަވަޅު އަޅުމުގެ ކުރިން އެކަމާ ގުޅޭ ފަރާތްތަކަށާއި އެމީހަކަށް އެކަން ސަމާލުކަން ގެނައުމުގެ ގޮތުން އެކަމެއް އަންގަން ޖެހޭނެ ކަމަށެވެ.
ނަމަވެސް ތިން ކާޑު ހަމަވުމުގެ ސަބަބުން ކުރިއަށް އޮތް މެޗަށް ސަސްޕެންޑް ވާނެ ކަމަކަށް އަންގާފައި ނުވާ ކަމަށް ޕެރޭޒް ވިދާޅުވި އެވެ.
"ކުޅުންތެރިއެއްގެ ހައިސއްޔަތުން ވެސް އެކަން [ތިން ރީނދޫ ކާޑު ހަމަވުމުން ނުކުޅެވޭނެކަން] ޗެރިޝޭވްއަށް އެއްވެސް ފަރާތަކުން އަންގާފައެއް ނުވޭ، އެހެންވެ އެކަމާ ގުޅިގެން [އެކަން ނާންގައި އޮތުމުން] އެއްވެސް ފިޔަވަޅެއް ނޭޅޭނެ. ރެއާލް މެޑިރަޑަކަށް ވެސް އެކަން އޮތް ކަމެއް އެނގިފައެއް ނެތް. އަދި އެއްވެސް ފަރާތަކުން އެކަން ކްލަބަށް ވެސް އަންގާފައެއް ނުވޭ، ކުޅުންތެރިޔާއަށް ވެސް އަދި ވިލަރެއާލްއަށް ވެސް އަންގާފައެއް ނުވޭ. ސަސްޕެންޝަނެނެއް އައުމުގެ ކުރިން ކުޅުންތެރިޔާއަށް ވެސް ވަކިން އަންގަން ޖެހޭނެ ކަމަށް މިއަހަރުގެ ޖަނަވަރީ 30 ވަނަ ދުވަހު ސްޕެއިންގެ ކުޅިވަރާ ބެހޭ ކޯޓުން ވަނީ އަންގާފައި. ނަމަވެސް ކުޅުންތެރިޔާއަށް ވެސް އެކަން ސްޕެއިންގެ ރީޔަލް ފެޑްރޭޝަނުން އަންގާފައެއް ނެތް،" ޕެރޭޒް ވިދާޅުވި އެވެ.
ޕެރޭޒް ވިދާޅޫވީ ސަސްޕެންޝަން ފިޔަވަޅެއް އެލި ނަމަވެސް އެފިޔަވަޅެއް އަޅަން ޖެހޭނީ ރަނގަޅަށް ކަމަށާއި އެހެންނަމަވެސް ރެއާލް މެދު ފިޔަވަޅު އަޅަނީ ރަނގަޅަށް ނޫން ކަމަށެވެ.
އެއީ ޑިސްޕްލިނަރީ ކޯޑުގެ 112 ވަނަ މާއްދާގެ ދެ ވަނަ ޕެރަގުރާފުގައި ބުނެފައިވާ ގޮތުގެ މަތިން ކޮޕަޑެލްރޭގެ ތިން ވަނަ ބުރު ނިމޭއިރު ދައްކާފައިވާ ހުރިހާ ކާޑެއް، އަލުން ކަޕަޑެލްރޭގެ މުބާރާތް ފެށޭ އިރު ކެންސަލް ވާނެ ކަމަށް ބުނެފައިވާ ކަމަށް ޕެރޭޒް ފާހަގަ ކުރި އެވެ.
ޕެރޭޒް ވިދާޅުވީ ޗެރިޝޭވް ސަސްޕެންޑް ވެފައިވާ ކަމެއް އެއްވެސް ފަރާތާކުން އަންގަފާއި ނުވުމުން ރެއާލްގެ ބޯޑުގައި މަޗްވަރާ ކުރުމަށް ފަހު ނިންމާފައި ވަނީ ރެއާލްގެ މައުގިފަކީ ޗެރިޝޭވްއަކީ ސަސްޕެންޑް ވެފައި ހުރި ކުޅުންތެރިއެއް ނޫން ކަމަށާއި ސަސްޕެންޑް ވެފައިވާ އެއްވެސް ކުޅުންތެރިއެއް ލައްވައި ރެއާލުއިން ނުކުޅުވާ ކަމަށެވެ.
އެމެޗުން 3-0 ގެނަތީޖާއަކުން ރެއާލު ބަލިވި ކަމަށް ނިންމައިފި ނަމަ ރެއާލު ސްޕެނިޝްކަޕުން ކަޓާނެ އެވެ.