06 Dec 2015, 16:06
އއ. މަތިވެރީގެ އިރުއުތުރު ފަރާތުގައި ސްލިޕްވޭއެއް ހަދައި ވިޔަފާރި ކުރަން ބޭނުންވާ ފަރާތްތަކަށް އެކަމަށް އެދި ބިޑް ހުށަހެޅުމުގެ ފުރުސަތު ހުޅުވާލައިފި އެވެ.
އޮޑިދޯނިފަހަރު އަދި ބޯޓުފަހަރު އެހެލެލައި މަރާމާތު ކުރާ ސްލިޕްވޭ ހަދަން ހަމަޖެހިފައި ވަނީ މަތިވެރީގައި އިރުއުތުރު ފަރާތު އަތިރިމަތިން ދޫކޮށްފައިވާ 82،959 އަކަފޫޓުގެ ބިމުގަ އެވެ.
މަތިވެރި ކައުންސިލުން ކުރި އިއުލާނެއްގައި ބުނެފައި ވަނީ އެ ބިން ދޫކުރާނީ ސްލިޕްވޭ ހިންގައިގެން ލިބޭ އާމްދަނީގެ 30 ޕަސެންޓް ކައުންސިލަށް އަދި ބާކީ 70 ޕަސެންޓް ބިޑް ކާމިޔާބުކުރާ ފަރާތަށް ލިބޭ ގޮތަށް ކަމަށެވެ.
އެ އިއުލާނުގައި ބުނެފައި ވަނީ ބިން ދިނުމަށް ހަމަޖެހިފައި ވަނީ 10 އަހަރުދުވަހުގެ މުއްދަތަށް ކަމަށެވެ. ނަމަވެސް އެގްރީމެންޓް ކުރެވޭނީ ބިޑް ކާމިޔާބުކުރާ ފަރާތުން ހުށަހަޅާ ޕްރޮޕޯސަލް ހައުސިން މިނިސްޓްރީ އަށް ފޮނުވައިގެން 15 އަހަރުގެ މުއްދަތު އިތުރުކޮށް ދިނުމުން 25 އަހަރު ދުވަހުގެ މުއްދަތަކަށް ކަމަށް އެ އިއުލާނުގައިވެ އެވެ.
ބިން ދިނުމަށް ހަމަޖެހިފައި ވަނީ ބިޑް ފޮތް ވިއްކައިގެން ކަމަށް ވާތީ އެ އިއުލާނުގައި ބުނެފައިވަނީ ބިޑްފޮތް ވިއްކާނީ މިއަދުން ފެށިގެން މި މަހުގެ 20 ވަނަ ދުވަހުގެ ނިޔަލަށް ކޮންމެ ދުވަހަކު ހެނދުނު 9:00 އިން މެންދުރު ފަހު 1:00 އަށް ކަމަށާއި ބިޑް ފޮތެއްގެ އަގަކީ 8000 ރުފިޔާ ކަމަށް ގެޒެޓްކޮށްފައިވާ އިއުލާނުގައިވެ އެވެ.
ބިޑް ފޮތާއެކު ހުށަހަޅަން ޖެހޭ ތަކެތީގެ ތެރޭގައި ރާއްޖޭގައި ހިންގާ ބޭންކަކުން ދޫކޮށްފައިވާ 100،000 ރުފިޔާގެ ބޭންކް ގެރެންޓީއަކާއި ބިޑް ހުށަހެޅި ފަރާތަކީ ކުންފުންޏެއްނަމަ އެތަނުގެ ރަޖިސްޓަރީގެ ކޮޕީއަކާއި އެންމެފަހުން އަހަރީފީ ދެއްކި ރަސީދުގެ ކޮޕީއާއި ވަކި ފަރުދެއްނަމަ ދިވެހި ރައްޔިތެއްކަން އަންގައިދޭ ކާޑުގެ ކޮޕީއާއި އެއްވެސްކަހަލަ ވިޔަފާރިއެއް ކުރާނަމަ އެކަން އެނގޭނެ ލިޔުމަކާއި ކުންފުންޏަކުން ހުށަހަޅާނަމަ ސޮއި އަދި ތައްގަނޑު ފޯމުގައި އިންނަންވާނެ ކަމަށް އެ އިއުލާނުގައިވެ އެވެ.
ބިޑް ހުށަހަޅަން ޖެހެނީ އއ. އަތޮޅު މަތިވެރީ ކައުންސިލް އިދާރާއަށެވެ.