20 Dec 2015, 17:12
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން ކާބޯތަކެތި ވިއްކާ ތަންތަން ބަލައި ފާސްކުރުމުގައި އިމްޕޯޓުކޮށް ވިއްކާ ބައެއް ކާބޯތަކެތީގެ އުފެއްދުންތަކުގެ ލޭބަލްގައި "ބަނގުރާ" އެކުލެވިފައިވާކަން އެ އޮތޯރިޓީން ފާހަގަކޮށްފި އެވެ.
އެމްއެފްޑީއޭ އިން މިއަދު ނެރުނު ނޫސްބަޔާނެއްގައި ބުނެފައި ވަނީ އެ އޮތޯރިޓީއަށް ފާހަގަކުރެވުނު ކާބޯތަކެތީގެ ތެރޭގައި ކިއްކޯމަން ބްރޭންޑުގެ ޓެރިޔަކީ ސޯސްއާ ޔޫކާ ބްރޭންޑުގެ ކެޕަންގް ސްޓިކާއި ރަސް އަންގުރުގެ އިތުރުން މާޝްމެލޯގައި ބަނގުރާ ހިމެނޭ ކަމަށެވެ.
އެ އޮތޯރިޓީން ނެރުނު ބަޔާނުގައި ބުނީ އެ ޕްރޮޑަކްޓުތައް އިމްޕޯޓު ނުކުރުމަށާއި ވިއްކަން ނުބެހެއްޓުމަށް އެންމެހާ ފަރާތްތަކަށް އަންގާ އިލްތިމާސްކުރާ ކަމަށެވެ. އަދި އެފަދަ ކަންކަމުން ރައްކާތެރިވުމަށްޓަކައި ކާބޯތަކެތި ބޭނުންކުރައްވާއިރު އޭގައިވާ ލޭބަލް ރަނގަޅަށް ބެއްލެވުމަށްފަހު އެތަކެތި ބޭނުން ކުރެއްވުމަށް އެމްއެފްޑީއޭ އިން ވަނީ އާންމު ރައްޔިތުންނަށް ވެސް އިލްތިމާސްކޮށްފަ އެވެ.
އެމްއެފްޑީއޭ އިން ބުނީ އެއިން އެއްވެސް ޕްރޮޑަކްޓެއް ވިއްކަން ފިހާރައެއްގައި ހުރި ނަމަ ލަސްނުކޮށް އެ އެ އޮތޯރިޓީއަށް ރިޕޯޓު ކުރުމަށް އެދޭ ކަމަށެވެ.