24 Dec 2015, 10:37
ކ. މާފުށި ކައިރިން ދަތުރުކޮށްފައި ދިޔަ ލޯންޗަކާއި ޑައިވިން ދޯންޏެއް އެކްސިޑެންްޓުވެ މަރުވި 16 އަހަރުގެ މެލޭޝިއާގެ އަންހެން ކުއްޖާ ރާއްޖެ އައީ އުފަން ދުވަސް ފާހަގަކުރަން ކަމަށް އާއިލާ އިން ބުނެފި އެވެ.
މަންމައާ އެކު އުފަންދުވަސް ފާހަގަކުރުމަށް އައިސް އުޅެނިކޮށް މަރުވީ ވިވިއަން ނަމަކަށް ކިޔާ ކުއްޖެކެވެ. އޭނާގެ މަރު އާއިލާ އިން ސިފަކޮށްފައި ވަނީ ހާދިސާއެއްގެ ގޮތުގައެއް ނޫނެވެ.
ޑައިވިނަށް އޭނާ ދިޔައީ 16 އަހަރު ފުރޭ އުފަން ދުވަސް އައުމުގެ ހަ ދުވަސް ކުރިންނެވެ.
އެ ދުވަހު ޑައިވިނަށް ދިއުމުގެ ކުރިން އޭނާގެ މަންމަ ނިކޯލް ސާއީ ވަނީ ފޭސްބުކްގައި ދަރިފުޅު ގޮވައިގެން ޑައިވިނަށް ދާވާހަކަ ބުނެފަ އެވެ. އަދި އެއީ އޭނާގެ ދަރިފުޅަށް ވެފައިވާ ވައުދެއް ކަމަށް ވެސް ބުނެފައިވެ އެވެ. އެ ހާދިސާގައި އޭނާގެ މަންމަވެސް ވަނީ މަރުވެފަ އެވެ.
ކ. މާފުށި ކައިރިން ދަތުރުކޮށްފައި ދިޔަ ލޯންޗަކާއި ޑައިވިން ދޯންޏެއް އެކްސިޑެންްޓުވެ މަރުވި 16 އަހަރުގެ ވިވިއަން -- ފޮޓޯ -- އެފްބީ
ވިވިއަން އަކީ ރޯޔަލް ސްކޫލު އޮފް މިއުޒިކްގައި ގްރޭޑް އަށެއް ނިންމުމަށްފަހު މިއުޒިކް އިން ޑިޕްލޮމާ ހެދުމަށް ތއްޔާރުވަމުން ދިޔަ ކުއްޖެއް ކަމަށް ސިންގަޕޫރުގެ ނޫހެއްގައި ވަނީ ބުނެފަ އެވެ. ހަ އަހަރުވަންދެން ވިވިއަންގެ ޓީޗަރަކަށް އުޅުނު ޓިއޯންގް އިންގް އާ ހަވާލާދީ އެ ނޫހުގައި ބުނެފައި ވަނީ ވިވިއަން އަކީ މަޖާ މިޒާޖެއްގެ އެކުވެރި ކުއްޖެއް ކަމަށެވެ.
ވިވިއަންއާ ބެހޭ ގޮތުން އޭނާގެ އެކުވެރިންނާއި އާއިލާ މީހުން ވެސް ވަނީ ފޭސްބުކްގައި ތަފާތު ޕޯސްޓްތައް ކޮށްފަ އެވެ.
މަރުވެފައިވާ ވިވިއަން އާއި އޭނާގެ މަންމަގެ ހަށިގަނޑު ސިންގަޕޫރަށް ގެންދިއުމަށް މިވަގުތު ރާއްޖޭގައި ހުރި ވިވިއަންގެ ބައްޕަ މަސައްކަތް ކުރަމުންދާ ކަމަށް ސިންގަޕޫރުގެ ނޫހުގައި ބުނެފައިވެ އެވެ.
އެ އެކްސިޑެންޓު ހިނގީ މިދިޔަ ބުރާސްފަތި ދުވަހުގެ އިރުއޮއްސި 6:30 އެހާކަށްހާއިރު އެވެ. އެ ހާދިސާގައި ދެ އުޅަނދަށް ވެސް ބޮޑެތި ގެއްލުންތަކެއް ވަނީ ވެފަ އެވެ.
އެކްސިޑެންޓު ހިނގި ވަގުތު ޑައިވިން ދޯނީގައި ހަ މީހަކު ތިއްބެވެ. އަދި ލޯންޗުގައި ހަތަރު މީހަކު ތިއްބެވެ. އެ ހާދިސާގައި މަރުވި ދެ މީހުން ފިޔަވައި އެހެން ބަޔަކަށް ސީރިއަސް އަނިޔާތަކެއް ނުލިބެ އެވެ.