25 Dec 2015, 19:26
ޕާކިސްތާނުގެ ބޮޑުވަޒީރު މުޙައްމަދު ނަވާޒް ޝަރީފުގެ މުސްކުޅި ގެއަށް އިންޑިއާގެ ބޮޑުވަޒީރު ނަރެންދުރާ މޯދީ ވަޑައިގެން އޭނާއާ ބައްދަލުކުރައްވައިފި އެވެ.
ޕާކިސްތާނުގެ ބޮޑު ޝަހަރެއް ކަމަށްވާ ލާހޯރުގެ ކައިރީގައިވާ އެ ގެއަށް މޯދީ ވަޑައިގެންނެވީ މިއަދު އުފަން ދުވަސް ފާހަގަ ކުރައްވަމުން ގެންދަވާ ނަވާޒް ޝަރީގު އަރިހުގައި ހެލިކޮޕްޓަރެއްގަ އެވެ. ލާހޫރުގެ އެއާޕޯޓުން ޝަރީފު މޯދީއަށް ހޫނު މަރުހަބާއެއް ވިދާޅުވި އެވެ.
އިންޑިއާގެ އެންޑީޓީވީން ބުނީ ޝަރީފުގެ ގޭގައި މޯދީއާއި ޝަރީފް ބޭއްވެވި ބައްދަލުވުމުގައި ދެގައުމުގެ ގުޅުމާ ބެހޭ ގޮތުން މަޝްވަރާތައް ކުރެއްވި ކަމަށެވެ. މޯދީ ފުރާވަޑައިގަންނަވަން އެއާޕޯޓަށް ވަޑައިގެންނެވި އިރު ވެސް ޝަރީފު ވަޑައިގެންނެވި އެވެ.
މޯދީ ލާހޯރުގައި މަޑުކޮށްލެއްވީ އަފްޣާނިސްތާނުގެ ވެރިރަށް ކާބުލް އިން އިންޑިއާގެ ވެރިރަށް ނިއުދިއްލީ އަށް އެނބުރި ވަޑައިގެންނެވި މަގުމަތީގަ އެވެ. އޭނާ ލާހޫރުގައި މަޑުކޮށްލައްވާނެ ކަން ކުރިން ވަނީ ސޯޝަލް މީޑިއާ، ޓުވިޓާގައި ހާމަކުރައްވައިފަ އެވެ. އެކަން ހާމަ ކުރެއްވުމަކީ ސަރަހައްދުގެ މަޝްރަހު ދިރާސާ ކުރާ މީހުންނަށް ލިބުނު ބޮޑު ހައިރާންކަމެކެވެ.
މޯދީއާއި ޝަރީފުގެ ބައްދަލުވުމާ ބެހޭ ގޮތުން އިންޑިއާގެ އެކްސްޓާނަލް މިނިސްޓަރު ސުޝްމާ ސްވަރާޖް ކުރެއްވި ޓުވީޓެއްގައި ވިދާޅުވެފައި ވަނީ "އަވަށްޓެރިންނާ އެކީ އޮންނަން ޖެހޭނީ މިކަހަލަ ގުޅުމެއް" ކަމަށެވެ.