29 Dec 2015, 11:48
ފިރިމީހާ ޖިންސީ ގޯނާ ކުރުމުގެ ސަބަބުން ލިބުނު އަނިޔާއަށް އައިޖީއެމްއެޗްގެ އައިސީޔޫގައި ފަރުވާ ހޯދަމުން ދަނިކޮށް ރޭގެ ވަގުތެއްގައި ނިޔާވި ގދ. ތިނަދޫ އަންހެން މީހާގެ ޕޯސްޓް މޯޓަމް ހެދުމަށް ފުލުހުން މަޝްވަރާ ކުރަން ފަށައިފި އެވެ.
ލިބިފައިވާ ޖިންސީ އަނިޔާތަކާ ގުޅިގެން އައިޖީއެމްްއެޗުގެ އަސީޔޫގައި ފަރުވާ ހޯދަމުން ދަނިކޮށް ގދ. ތިނަދޫ، ތޭންކް، ޒިޔާދާ ނައީމު ރޭ ވަނީ ނިޔާވެފަ އެވެ.
ޕޯސްޓް މޯޓަމް ފުލުހުން އާއިލާއާ އެކު މަޝްވަރާކުރަމުން ދިޔަ ނަމަވެސް އާއިލާގެ ބައެއް މެމްބަރުން އެކަމާ ދެކޮޅު ހަދާކަން ވަނީ އެނގިފަ އެވެ. އެނގިފައިވާ ގޮތުގައި އެ މައްސަލާގައި ފުލުހުންގެ ތަހުގީގަށް މިހާތަނަށް އެއްވެސް މައުލޫމާތެއް ވަނީ ލިބޭ ގޮތް ނުވެފަ އެވެ.
އަންހެންމީހާ ހޮސްޕިޓަލުގައި އޮތް އިރުވެސް ހާލު ސީރިއަސް ކަމުން ފުލުހުންގެ ތަހުގީގަށް ބޭނުންވާ މައުލޫމާތެއް އަންހެން މީހާ ކައިރިން ވަނީ ސާފު ނުކުރެވިފަ އެވެ. އަދި ތަހުގީގަށް ބޭނުންވާ މައުލޫމާތު ހޯދުމަށާއި އަންހެން މީހާއަށް ކޮށްފައިވާ އަނިޔާތައް ދެނެގަތުމަށް ޕޯސްޓްމޯޓަމް ހެދުން މުހިންމު ކަމަށް ފުލުހުން އާއިލާކައިރި ބުނެފައިވާ ކަން ވަނީ އެނގިފަ އެވެ.
ގދ. ތިނަދޫ -- ފޮޓޯ - ގޫގުލް
ފުލުހުންގެ މީޑިއާ އޮފިޝަލު އިސްމާއިލް އަލީ 'ސަން' އަށް ވިދާޅުވީ ތިނަދޫ އަންހެން މީހާގެ ޕޯސްޓް މޯޓަމް ހެދުމާ ބެހޭ ގޮތުން އާއިލާއާ މަޝްވަރާކުރަމުންދާ ކަމަށާއި އާއިލާގެ ހުރިހާ މެމްބަރުން އެދިއްޖެ ނަމަ ޕޯސްޓް މޯޓަމް ހެދުމަށް ފުލުހުން ތައްޔާރަށް ތިބި ކަމަށެވެ.
ތަހުގީގަށް ބޭނުންވާ އެކަށީގެންވާ މައުލޫމާތު ހޯދުމަށް ނުވަތަ އަނިޔާކުރި މައްސަލާގައި ފިރިހެން މީހާގެ މައްޗަށް ދައުވާ އުފުލަން ބޭނުންވާ ނަމަ އެކަށީގެންވާ ހެކި ފުލުހުންނަށް ލިބެންޖެހެ އެވެ.
ޕީޖީ އޮފީހުގެ އޮފިޝަލަކު ވިދަޅުވީ އެމައްސަލާގައި ގާނޫނީ ލަފައަކަށް ފުލުހުން އެދިއްޖެ ނަމަ ގާނޫނީ ލަފާދޭނެ ކަމަށެވެ. ޕީޖީގެ ލަފައަކަށް ފުލުހުން އެދިފައިވާ ކަމެއް އަދި އެނގިފައެއް ނުވެ އެވެ.
އަންހެން މީހާ އަށް ޖިންސީ އަނިޔާ ކުރި ކަމުގެ ތުހުމުތުގައި އޭނާގެ ފިރިމީހާ އިބްރާހިމް ޝާހު 40 ފުލުހުން ވަނީ ހައްޔަރުކޮށްފަ އެވެ. އަދި އޭނާގެ ބަންދުގެ މުއްދަތު މިހާރު ވަނީ ތިން ވަނަ ފަހަރަށް އިތުރުކޮށްފަ އެވެ.