04 Jan 2016, 23:17
އިނގިރޭސިވިލާތުގެ މަޝްހޫރު ކެމިކަލް ކުންފުންޏެއް ކަމަށްވާ ސްކޮޓް ބެޑާގެ އުފެއްދުންތައް ރާއްޖެއަށް ތައާރަފްކޮށްފިއެވެ.
ގަސްކާނާއާއި ތެރަސް ފަދަ ބާވަތްތައް ވެސް އުފައްދާ ސްކޮޓް ބެޑާގެ އުފެއްދުންތައް ރާއްޖެއަށް ތައާރަފް ކުރީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިންނެވެ. ހޮޓެލް ޖެންގައި އެކަމަށް ޓަކައި ބޭއްވި ރަސްމިއްޔާތެއްގައި ސްކޮޓް ބާޑާގެ އުފެއްދުންތައް ރާއްޖެއަށް ތައާރަފްކޮށްދެއްވީ ފިޝަރީޒް މިނިސްޓަރު ޑރ. މުޙައްމަދު ޝައިނީއެވެ.
ސްކޮޓް ބެޑާ ކުންފުނީގެ އުފެއްދުންތައް ރާއްޖެއަށް ތައާރަފް ކުރީ އިތުބާރު ލިބިފައިވާ ފެންވަރު ރަނގަޅު 'ޕޮލިސްޓަރ ރެސިންގ' ގެ ބާވަތްތައް އޮޑިވެރިންނަށާއި ބޯޓް ބަންނަ ފަރާތްތަކަށް ލުއިފަސޭހަކަމާއި އެކު ލިބޭނެ އިންތިޒާމު ހަމަޖައްސައިދިނުމުގެ މަގުސަދުގައި ކަމަށެވެ. ސްކޮޓް ބެޑާގެ އެހެން އުފެއްދުންތައް ވެސް އެމްޓީސީސީ މެދުވެރިކޮށް ، އެކަށީގެންވާ އަގުތަކެއްގައި ކަސްޓަމަރުންނަށް ލިބޭނެ އިންތިޒާމް ހަމައސައި ދިނުމަކީ ވެސް މަގުސަދެއް ކަމަށް އެމްޓީސީސީން ބުންޏެވެ.
ސްކޮޓް ބެޑާގެ އުފެއްދުންތައް ރާއްޖެއިން ގަންނަން ލިބުމުން އޮޑިދޯނިފަހަރު ބަންނަ މީހުންނަށް ރަނގަޅު ފެންވަރުގެ، ދިގުމުއްދަތަކަށް ބޭނުންކުރެވޭ އުޅަނދުތައް އުފެއްދޭނެ ކަމަށް އެމްޓީސީސީން ދެކެއެވެ. އެހެންވެ، އޮޑިދޯނިފަހަރު ބަނުމުގެ ސިނާއަތަށް ބޮޑެތި ކުރިއެރުންތަކެއް އަންނާނެ ކަމަށް އެކުންފުނިން ބުންޏެވެ.