14 Jan 2016, 15:18
ފިހާރަތަކުގައި ބިދޭސީ ކޭޝިއަރުން ތިބޭތޯ ބެލުމަށް ޑިޕާޓުމަންޓު އޮފް އިމިގްރޭޝަން އެންޑް އެމިގްރޭޝަނުން ފެށި އޮޕަރޭޝަން މިވަގުތު މަޑުޖައްސާލައިފައިވާ ކަމަށް އެ ޑިޕާޓުމަންޓުން ބުނެފި އެވެ.
އިމިގްރޭޝަނުގެ އިންފޮމޭޝަން އޮފިސަރު ހަސަން ހަލީލް މިއަދު "ސަން" އަށް ވިދާޅުވީ އެ އޮޕަރޭޝަން މިވަގުތަށް މަޑުޖައްސާލި ނަމަވެސް އެ އޮޕަރޭޝަން އަދި ކުރިއަށް ގެންދާނެ ކަމަށެވެ. މިދިޔަ އަހަރުގެ ޑިސެމްބަރު މަހުގެ ތެރޭގައި އިމިގްރޭޝަނުން ފެށި އެ އޮޕަރޭޝަން ނިންމާލީ މިދިޔަ ހަފްތާގެ ތެރޭގައި ކަމަށް ވެސް ހަލީލު ވިދާޅުވި އެވެ.
"އަޅުގަނޑުމެން އަދި އެ އޮޕަރޭޝަން ފަހުން ކުރިއަށް ގެންދާނަން. ދެން ރޫޓިންކޮށް އަޅުގަނޑުމެން ކުރިއަށް ގެންދާ އިންސްޕެކްޝަންތައް ކުރިއަށް ގެންދާނަން،" ހަލީލު ވިދާޅުވި އެވެ.
އިމިގްރޭޝަނުން ބުނީ މިދިޔަ ހަފްތާގެ ނިޔަލަށް 296 ފިހާރައެއް ޗެކު ކޮށްފައިވާ ކަމަށެވެ. އޭގެތެރެއިން 128 ތަނެއް 10،000 ރުފިޔާ އިން ޖޫރިމަނާ ކޮށްފައިވާ ކަމަށް އިމިގްރޭޝަނުން ބުންޏެވެ.