20 Jan 2016, 09:08
ސްޕައިޑަރމޭންއަކީ ގިނަ ބައެއްގެ މެދުގައި މަޤްބޫލު، ޚިޔާލީ ބަޠަލެކެވެ. އޭނާއަކީ ފައިދިގު މަކުނުގެ ނަމުން ނަން ދެވި، ފައިދިގު މަކުނުގެ ޤާބިލިއްޔަތު ލިބިފައިވާ ބަޠަލެކެވެ. މަކުނުގެ ގައިން ވާ ދޫކުރާ ފަދައިން ސްޕައިޑާމޭން ވެސް ވާ ދޫކުރެ އެވެ. ފާރުތަކުން މައްޗަށް އޭނާ އަށް ހިނގެ އެވެ.
ނަމަވެސް ސައިންސްގެ އަލީގައި މިވަނީ، ސްޕައިޑާމޭންއެއް ވުޖޫދަށް ނާންނާނެ ކަން ހާމަ ކުރެވިފަ އެވެ.
ޔުނިވާސިޓީ އޮފް ކެމްބްރިޖްގެ ޒޫއޮލޮޖީ ޑިޕާޓްމެންޓުން ކުރި ދިރާސާއިން ދައްކާ ގޮތުގައި، ފާރުގައި ތަތްވެގެން، ފާރުން މައްޗަށް ހިނގާފައި ދެވޭނެ އެންމެ ބޮޑު ދިރޭ ޖަނަވާރަކީ ހޯނެވެ. ހޯނަށް ވުރެ ކުދި ބައެއް ޖަނަވާރަށް ވެސް ފާރުގައި ތަތްވެގެން ހިނގެ އެވެ. އޭގެ ތެރޭގައި ގިނައީ ހިނި، މެހި، ކުރަފި އަދި ފައިދިގު މަކުނު ފަދަ ސޫތްޕެވެ.
އެ ދިރާސާ އިން ދައްކާ ގޮތުގައި، ކުދި ހިނި ފާރުގައި ހިނގުމަށް ބޭނުންވަނީ، އޭގެ ހަށިގަނޑުގެ ބޮޑުމިނުގެ 200 ގުނައަށް ކުޑަ، އެދެސިވް ޕެޑް އެވެ. އެދެސިވް ޕެޑްއޭ ބުނެވެނީ، ފާރު ފަދަ ތަންތަނުގައި ތަތްލުމަށް އެ ޖަނަވާރު އަދި ސޫފިތަކުގެ ގައިގައި ޤުދުރަތީ ގޮތުން ލެވިފައިވާ ގުނަވަންތަކަށެވެ. ނަމަވެސް، އިންސާނަކު ފާރެއްގައި ތަތްލައިގެން ހުރުމަށް، ހަށިގަނޑުގެ 80 ޕަސެންޓް ތެރަސް ހާކަން ޖެހޭ ކަމަށް އެ ދިރާސާއިން ބުނެ އެވެ. އެހެން ނަމަވެސް ސްޕައިޑަރމޭން ފިލްމުތަކުގައި ދައްކާ ގޮތުން، އޭނާ އުސް އިމާރާތްތަކުގެ މައްޗަށް އަރައި ފައިބައި ހަދަނީ، އޭނާގެ ދެ އަތްތިލައާއި ދެ ފައި ޖައްސައިގެން، ނުހަނު ފަސޭހަ ކަމާ އެކުގަ އެވެ.
"ޖަނަވާރު ސައިޒުން ބޮޑުވާ ވަރަކަށް، ފާރުގައި ހިނގުމަށް އުނދަގޫ ވާނެ. މި ދިރާސާ އިން ބެލީ، ޖަނަވާރުގެ ސައިޒާ އެކު، އޭގެ ފަޔާއި ހަށިގަނޑުގައިވާ އެދެސިވް ޕެޑުތައް ހުންނަ ގޮތަށް،" ދިރާސާގެ ރިޕޯޓުގައި ވެ އެވެ.
އެހެންކަމުން، އެފަދައިން ފާރުގައި ހިނގޭނެ އެންމެ ބޮޑު ދިރޭ އެއްޗަކަށް ވާނީ ހޯނު ކަމަށް އެ ދިރާސާއިން ނިންމާފައި ވެ އެވެ.