02 Feb 2016, 19:16

"އިންޑިއާ - މޯލްޑިވްސް ހެލްތު އެންޑް ވެލްނެސް ވީކް" ގެ ނަމުގައި ހާއްސަ ހަރަކާތްތަކެއް ކުރިއަށް ގެންދިއުމަށް ނިންމައިފި އެވެ.

ރާއްޖޭގައި ހުންނަ އިންޑިއާގެ ހައި ކޮމިޝަނާއި، އައިޖީއެމްއެޗް، ބޮނަކުއާ އަދި އެސްޓީއޯ ގުޅިގެން ކުރިއަށް ގެންދާ ވެލްނެސް ވީކްގައި އައިޖީއެމްއެޗްގައި މެޑިކަލް ކޭމްޕު ތަކެއް ކުރިއަށް ގެންދަން ނިންމާފައިވާ އިރު، ދަރުބާރުގޭގައި ހެލްތު އެކްސްޕޯއެއް ބޭއްވުމަށް ވަނީ ނިންމާފަ އެވެ.

ހަމަ އެއާއެކު، "އިންޑިއާ - މޯލްޑިވްސް ހެލްތު ޕާޓްނަޝިޕް ޑައިލޮގް"ގެ ނަމުގައި މަޝްވަރާ ބައްދަލުވުމެއް ކުރިއަށް ގެންދިއުމަށްވެސް ވަނީ ނިންމާފަ އެވެ.

ރާއްޖޭގައި ފުރަތަމަ ފަހަރަށް ކުރިއަށް ގެންދާ ހެލްތު އެކްސްޕޯ ކުރިއަށް ދާނީ ފެބުރުއަރީ މަހުގެ 13 ން 15 އަށް ދަރުބާރުގޭގަ އެވެ. އިންޑިއާގެ 18 ހޮސްޕިޓަލަކުން 20ށް ވުރެ ގިނަ ސްޕެޝަލިސްޓް ޑޮކްޓަރުން މި އެކްސްޕޯގައި ބަލި މީހުން ބެލުމަށް ވަނީ ހަމަޖެހިފަ އެވެ. އެކްސްޕޯގައި ބައިވެރިވާ ހޮސްޕިޓަލު ތަކުގެ ތެރޭގައި އެޕޯލޯ ހޮސްޕިޓަލްސް، އެންޔޫ ހޮސްޕިޓަލްސް، ކިމްސް ހޮސްޕިޓަލް، ކޮލަމްބިއާ އޭޝިޔާ، ބަސަވަންތަރަމް އިންޑިއާ އެމެރިކަން ކެންސަރ ހޮސްޕިޓަލް ހިމެނެ އެވެ.

މި އެކްސްޕޯގައި ހުރިހާ ދާއިރާއަކުން ސްޕެޝަލިސްޓް ޑޮކްޓަރުން ބައިވެރިވާނެ އެވެ.

ހެލްތު އެކްސްޕޯގައި ބައިވެރިވުމުގެ ފުރުސަތު ދިވެހިންނާއި ބިދޭސީންނަށްވެސް ވަނީ ހުޅުވާލާފަ އެވެ. ފީ އަކާ ނުލައި އެކްސްޕޯއަށް ވަދެވޭ އިރު ޑިސްކައުންޓާއެކު ޓްރީޓްމަންޓް ޕެކޭޖުތަކެއް ހިމެނިފައިވެ އެވެ. އެޕޮއިންޓްމަންޓް ހެއްދުމުގެ އިތުރުން ރަނގަޅު ސިއްހީ ފަރުވާ އާއި ހަރަދާ ގުޅޭގޮތުން މައުލޫމާތު ދިނުންވެސް މި އެކްސްޕޯގައި ކުރިއަށް ދާނެ އެވެ.

މިއަދު ހޮޓެލް ޖެންގައި އޮތް ރަސްމިއްޔާތެއްގައި ހެލްތު އެކްސްޕޯގެ ލޯގޯ އިފްތިތާހް ކޮށްދެއްވީ އިންޑިއާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު އަކިލޭޝް މިޝްރާ އެވެ.

ރަސްމިއްޔާތުގައި ސަފީރު ދެއްކެވި ވާހަކައިގައި ދިވެހިރާއްޖެއާ އިންޑިއާ އާދެމެދު އޮތް ގުޅުމަށް ވަނީ އަލިއަޅުވާލައްވާފަ އެވެ.

އިންޑިއާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު އަކިލޭޝް މިޝްރާ ވާހަކަދައްކަވަނީ -- ސަން ފޮޓޯ: ފަޔާޒް މޫސާ

އަދި އިންޑިއާއިން ސިއްހީ ދާއިރާއިން ހޯދާފައިވާ ކުރިއެރުން ފާހަގަކުރައްވަމުން، ސަފީރު ވިދާޅުވީ، އިންޑިއާ އަކީ ކޮންމެ އަހަރަކުވެސް އެތައް ޑޮކްޓަރުންނެއް ތަމްރީނު ކުރާ ގައުމެއް ކަމަށާއި، އިންޑިއާގެ ހޮސްޕިޓަލުތަކުގައި ތިބި ތަޖުރިބާކާރު ޑޮކްޓަރުންގެ އެހީ އާއި ތަޖުރިބާ އެހެން ފަރާތްތަކާ ހިއްސާ ކުރުމަކީ ލިބިގެންދާ އުފަލެއް ކަމަށެވެ.

އޭގެ އިތުރުން ރައްޔިތުންނަށް އެންމެ އެކަށީގެންވާ ރަނގަޅު ސިއްހީ ހިދުމަތްތައް އެހެން ގައުމުތަކުގެ އެހީއާ ނުލައި ފޯރުކޮށްނުދެވޭނެ ކަމަށްވެސް ސަފީރު ވިދާޅުވި އެވެ.

"ސިއްހީ މައްސަލަތައް މިވަނީ މިއަދު މުޅި ދުނިޔެއިން ކަންބޮޑުވާ މައްސަލަތަކެއް. އެއްވެސް ގައުމަކަށް އެކަހެރިވެގެން މައްސަލަތަކެއް ހައްލެއް ނުކުރެވޭނެ. ކޮންމެ ގައުމަކުންވެސް އެހެން ގައުމުތަކުގެ އެހީތެރިކަމަށް ބޭނުންވާނެ. އަޅުގަނޑުމެންނަކީ ގުޅި ލާމެހިފައިވާ ބައެއް. ތަފާތެއް ގެނެވޭނީ އެންމެން އެކުގައި މަސައްކަތް ކޮށްގެން،" ސަފީރު ވިދާޅުވި އެވެ.

ސަފީރުވަނީ ރާއްޖެއިން ސިއްހީ ދާއިރާގައި ފާހަގަ ކޮށްލެވޭ ކާމިޔާބީތަކެއް ހޯދާފައިވާކަން ފާހަގަކޮށް، ސަރުކާރުން ސިއްހީ ދާއިރާ ކުރިއެރުވުމަށް ކުރަމުން އަންނަ މަސައްކަތަށް މަރުހަބާ ކިޔާފަ އެވެ.

އައިޖީއެމްއެޗްގެ މެޑިކަލް ކޭމްޕް ކުރިއަށްދާނީ މި މަހުގެ 14 ން 18 ށް އައިޖީއެމް ހޮސްޕިޓަލުގަ އެވެ. މި ކޭމްޕުގައި އިންޑިއާގެ ސްޕެޝަލިސްޓު ޑޮކްޓަރުން ބަލި މީހުން ބެލުމަށް ވަނީ ހަމަޖެހިފަ އެވެ. ހިލޭ ކުރިއަށް ގެންދާ ކޭމްޕުތަކުގައި ކުޑަކަމުދާ ނިޒާމުގެ ބަލިތަކަށް ހާއްސަ ޑޮކްޓަރަކާއި، ކިޑްނީގެ ބަލިތަކަށް ހާއްސަ ޑޮކްޓަރެއްގެ އިތުރުން ކުޑަކުދިންގެ ކަށީގެ މައްސަލަތަކަށް ހާއްސަ ޑޮކްޓަރަކުވެސް ބައިވެރިވާނެ އެވެ.

ޑޮކްޓަރުން ބަލިމީހުން ބެއްލެވުމަށް ހަމަޖެހިފައިވާ ދުވަސްތައް:

  • ކުޑަކަމުދާ ނިޒާމުގެ ބަލިތަކަށް ހާއްސަ ޑޮކްޓަރު ބައްލަވާނީ ފެބްރުއަރީ 14 ން 16 އަށް.
  • ކިޑްނީގެ ބަލިތަކަށް ހާއްސަ ޑޮކްޓަރު ބައްލަވާނީ ފެބްރުއަރީ 15 ން 16 އަށް.
  • ކުޑަކުދިންގެ ކަށީގެ މައްސަލަތަކަށް ހާއްސަ ޑޮކްޓަރު ބައްލަވާނީ ފެބްރުއަރީ 16 ން 18 އަށް.

ކޭމްޕުގައި ޑޮކްޓަރަށް ދައްކަން ބޭނުންވާ ފަރާތްތަކުން 3335146، 3335327، 3335300 އަށް ގުޅައި ރަޖިސްޓްރީ ވެވޭނެ އެވެ.

ްސްޓޭކް ހޯލްޑަރުންނާ އެކު ކުރިއަށް ގެންދާ "އިންޑިއާ - މޯލްޑިވްސް ހެލްތު ޕާޓްނަޝިޕް ޑައިލޮގު"ގައި ސްޓޭޓް ބޭންކް އޮފް އިންޑިއާ، އުރީދޫ އަދި ފެޑެރޭޝަން އޮފް އިންޑިއަން ޗެމްބާސް އޮފް ކޮމާސް އެންޑް އިންޑަސްޓްރީ (އެފްއައިސީސީއައި) އިން ބައިވެރިވާނެ އެވެ.