04 Feb 2016, 18:24
މޯލްޑިވްސް މާކެޓިން އެންޑް ޕަބްލިކްރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ހާއްސަ އޮޑިޓް ރިޕޯޓު މާދަމާ އާންމު ކުރާނެ ކަމަށް އޮޑިޓަރ ޖެނެރަލްގެ އޮފީހުން ބުނެފި އެވެ.
އެސިސްޓެންޓް އޮޑިޓާ ޖެނެރަލް އިބްރާހިމް އައިމަން މިއަދު ސަން އަށް ވިދާޅުވީ، އޮޑިޓް ރިޕޯޓު މިއަދުގެ ވަގުތެއްގައި ރައީސް އޮފީހާއި ރައްޔިތުންގެ މަޖިލީހަށް ފޮނުވާފައިވާ ކަމަށެވެ. އަދި މާދަމާ މެންދުރު ފަހުން އެމްއެމްޕީއާރްސީގެ އޮޑިޓް ރިޕޯޓު އެ އޮފީހުގެ ވެބްސައިޓުން ފެންނާނެ ކަމަށް އައިމަން ވިދާޅުވި އެވެ.
އެމްއެމްޕީއާރުސީގެ ހާއްސަ އޮޑިޓް ތަހުގީގު ހިންގާ ފަރާތްތައްކަމަށްވާ ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) އާ ހިއްސާކޮށް، އެފަރާތްތަކުން ވަކި އެއްޗެއް އެންގިހާ އަވަހަކަށް އެއޮޑިޓް އާންމު ކުރެވޭނެ ކަމަށް އޮޑިޓް އޮފީހުން ވަނީ މީގެ ކުރިން ބުނެފައެވެ.
ސަރުކާރުން ވަނީ 2013 ވަނަ އަހަރުގެ ނޮވެމްބަރު 17 އިން ފެށިގެން އެމްއެމްޕީއާރްސީ ހިންގާފައިވާ ގޮތުގެ ހާއްސަ އޮޑިޓެއް ހެދުމަށް އޮޑިޓް އޮފީހަށް އަންގައިފައެވެ.
އޮޑިޓާ ޖެނެރަލްއަކަށް ހުންނަވަނީ އެ މުއްދަތުގައި އެމްއެމްޕީއާރުސީގެ މެނޭޖިން ޑިރެކްޓަރަކަށް ހުންނެވި އަބްދުﷲ ޒިޔަތުގެ ބޭބެ ހަސަން ޒިޔަތު އެވެ.
އޮޑިޓާ ޖެނެރަލް ހަސަން ޒިޔަތު ވިދާޅުވީ، އެމްއެމްޕީއާރުސީގެ އެ ހާއްސަ އޮޑިޓް ތައްޔާރު ކުރުމުގައި އެމަނިކުފާނުގެ އެއްވެސް ދައުރެއް ނޯންނާނެ ކަމަށާއި އެ އޮޑިޓް ތައްޔާރުކުރާނީ އެސިސްޓެޓް އޮޑިޓާ ޖެނެރަލް އައިމަން އިބްރާހިމްގެ ބެލުމުގެ ދަށުން ކަމަށެވެ.
އެމްއެމްޕީއާރުސީ އޮޑިޓް ކުރުމަށް ސަރުކާރުން ހަވާލުކޮށްފައިވާ އިރު އެ ކުންފުންޏާ ގުޅޭ ގޮތުން ތަފާތު މައްސަލަތަކެއް މިހާރު ވަނީ ފެންމަތިވެފައެވެ.