06 Feb 2016, 14:38
އެމްއެމްޕީއާރުސީގެ އޮޑިޓް ރިޕޯޓުގައި ވިޔަފާރި ބޭންކުތަކުގެ އޮޕަރޭޝަނަލް ކަންތައްތަކާ ގުޅޭ ގޮތުން ފާހަގަކުރައްވާފައިވާ މައްސަލަތައް ބައްލަވައި ގާނޫނާ ހިލާފުވެފައިވާ ބޭންކެއްވާ ނަމަ އެބޭންކަކާމެދު ފިޔަވަޅު އަޅާނެކަމަށް މަރުކަރީ ބޭންކް އެމްއެމްއޭ އިން ބުނެފި އެވެ.
އެމްއެމްޕީއާރުސީގެ އެކައުންޓަށް ޖަމާކުރަން ޖެހޭ ގާތްތަނޑަކަށް 65 މިލިއަން ޑޮލަރު ހިމެނޭ 60 އަށް ވުރެ ގިނަޗެކްތައް އެކުންފުނިން ބޭންކަށް ފޮނުވާފައިވާ ބޯޑް ރިޒޮލިއުޝަނާ ހިލާފަށް އެކުންފުނީގެ ދެމުވައްޒަފުން ސޮއިކުރުމުގެ ބަދަލުގައި އެންމެ މީހެއްގެ ސޮޔާ އެކު އެކިފަހަރު މަތިން އަމިއްލަ ކުންފުނިތަކެއްގެ އެކައުންޓަށް ޖަމާކޮށްދީފައިވާތީ، އެކަންހިނގާފައިވާ ގޮތް ތަހުގީގުކޮށް އެކަމުގައި އިހުމާލުވާ ފަރާތްތަކާމެދު ފިޔަވަޅުއެޅުމަށް އޮޑިޓް ރިޕޯޓުގައި އަންގަވާފައިވެއެވެ އެވެ.
އެގޮތުން އެންޑޯޒްކޮށްފައި ހުންނަ ޗެކްތައް ބަލައިގަތުމާ ގުޅޭ ގޮތުން ބޭންކުގައި މިހާރު އެކަށީގެންވާ ހަރުދަނާ ކޮންޓްރޯލްތަކެއް ގާއިމުކުރެވިފައި ހުރިކަމަށް ނުބެލެވޭތީ އާއި މަނީ ލޯންޑްރިންގެ މުޢާމަލާތްތައްކަމަށް ބެލެވޭ ގިނަ މުޢާމަލާތްތަކެއްގެ ތެރެއިން ސަތޭކަ އިންސައްތަ ސަރުކާރު ހިއްސާވާ ކުންފުންޏެއްގެ އެކައުންޓަށް ޖަމާކުރަން ޖެހޭ ފައިސާ އެހެން އެކައުންޓްތަކަކަށް ޖަމާވަމުންދިޔަ އިރު، އެކަން ބޭންކަށް ފާހަގަ ނުކުރެވި، ކަމާ ބެހޭ މުއައްސަސާތަކުގެ ސަމާލުކަމަށް އެކަށީގެންވާ ގޮތެއްގައި ގެނެސްފައިވާ ކަމަށް ނުބެލެވޭތީ، މުސްތަގުބަލުގައި މިފަދަ ކަންކަން ތަކުރާރު ވިޔަނުދިނުމަށް ޓަކައި ބޭންކުންނާއި ބޭންކުތައް ރެގިއުލޭޓްކުރާ ފަރާތުން އިތުރު ކޮންޓްރޯލްތައް ތައާރަފުކޮށް ހަރުދަނާ ފިޔަވަޅުތަކެއް އެޅުމަށް އޮޑިޓާ ޖެނަރަލް ލަފާދެއްވާފައިވެ އެވެ.
އެ މައްސަލަތަކާ ގުޅިގެން ކަންބޮޑުވުން ފާޅުކޮށް އެމްއެމްއޭ އިން ނެރުނު ބަޔާނެއްގައި ބުނީ، އެ ރިޕޯޓުގައި ފާހަގަކޮށްފައިވާ ވަކިވަކި ކަންތައްތަކާއި އެކަންތައްތަކަކީ ބޭންކުގެ އޮޕަރޭޝަނަލް ޕޮލިސީތަކާއި އެ ޕޮލިސީތަކަށް އަމަލުކުރުމުގައި ހުރި މައްސަލަތަކެއްތޯ އެ އޮތޯރިޓީން ބަލަމުން އަންނަ ކަމަށެވެ.
އެގޮތުން އޮޑިޓް ރިޕޯޓްގައިވާ ކަންތައްތަކުގެ ތެރޭގައި ރާއްޖޭގެ ގާނޫނުތަކާއި ގަވާއިދުތަކާ ހިލާފަށް އެއްވެސް ބޭންކަކުން އަމަލެއް ހިންގާފައިވާ ނަމަ، ނުވަތަ އިހުމާލުވެފައިވާ ނަމަ، އެ އޮތޯރިޓީން އެ ބޭންކަކާމެދު ހަމަޖެހިފައިވާ އުސޫލުތަކުގެމަތިން ފިޔަވަޅުއަޅާނެ ކަމަށް އެ ބަޔާނުގައިވެ އެވެ.
އޭގެއިތުރުން ރާއްޖޭގެ ބޭންކިން ނިޒާމު އިތުރަށް ހަރުދަނާކުރުމަށް އަޅަން ޖެހޭ ހުރިހާ ފިޔަވަޅުތައް އަޅަމުން ގެންދާނެކަމުގެ ޔަގީންކަން އަރުވާކަމަށް ވެސް އެ ބަޔާނުގައިވެ އެވެ.