08 Feb 2016, 11:07
މޯލްޑިވްސް މާކެޓިން އެންޑް ޕަކްރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ކޮރަޕްޝަންގެ މައްސަލަތައްބެލުމުގެ ފަހު މަރުހަލާއަށް ދެވިއްޖެ ކަމަށް، އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
މީގެ ތިން ވަރަކަށް މަސް ދުވަސް ކުރިން އޭސީސީއިން ވަނީ އެމްއެމްޕީއާރުސީއަށް ވަދެ އެ އިދާރާގެ ކޮރަޕްޝަން މައްސަލަތައް ތަހުގީގް ކުރަން ފަށާފައެވެ.
އެ ތަހުގީގާ ގުޅޭގޮތުން ސަން އިންކުރި ސުވާލަކަށް ޖަވާބް ދެއްވަމުން އޭސީސީގެ ނައިބު ރައީސް މުއައްވިޒް ރަޝީދު ވިދާޅުވީ، އެ ތަހުގީގް ކުރިއަށްދާ ކަމަށާއި އެގޮތުން ތަހުގީގުގެ ފަރުމަރުހަލާގެ މަސައްކަތްތައް ކުރަމުން އަންނަ ކަމަށެވެ.
އެ ތަހުގީގް ނިމޭނެ ވަކި ތާރީހެއް އަދި ހާމަ ކުރެވެންނެތް ކަމަށްވެސް މުއައްވިޒު ވިދާޅުވިއެވެ.
"އެހެން ސީދާ ނުބުނަންވެގެން މިއުޅެނީ، ކަންތައްތަކެއް ހުރީމަ. ފައިނަލް ސްޓޭޖްގައި ފަހުމަރުހަލާގައި މިއުޅެނީ،" މުއައްވިޒު ވިދާޅުވިއެވެ.
އޭނާ ވިދާޅުވީ، މިހާތަނަށް އެ ތަހުގީގަށް ބަލާއިރު މައްސަލަތަކެއް ފާހަގަކުރެވިފައިވާ ކަމަށާއި ނަމަވެސް އަދި އެކަން ހާމަކުރެވެން ނެތް ކަމަށެވެ.
އެމްއެމްޕީއާރުސީގެ މައްސަލަ އޭސީސީއިން ތަހުގީގް ކުރަމުން އަންނައިރު އޮޑިޓާޖެނެރަލް އޮފީހުން ވަނީ އެމްއެމްޕީއާރުސީގެ މައްސަލަތައް ފެންމަތިކޮށް އޮޑިޓް ރިޕޯޓެއް ނެރެފައެވެ. ކޮރަޕްޝަންގެ އެ މައްސަލަތައް 1.2 ބިލިއަން ރުފިޔާއަށް އަރައެވެ.