09 Feb 2016, 19:07
ނިމިދިޔަ 17 ވަނަ ރައްޔިތުންގެ މަޖިލީހުން ގޮނޑި ގެއްލުނު މެމްބަރަކަށް އިތުރަށް ފައިސާ ދީފައިވާކަން ހާމަވެއްޖެ އެވެ.
ރައްޔިތުންގެ މަޖިލީހުގެ އިދާރާގެ 2012 ވަނަ އަހަރުގެ އޮޑިޓް ރިޕޯޓުގައި ބުނެފައި ވަނީ މެމްބަރުކަމުގެ ގޮނޑި ގެއްލިފައިވާ ކުރީގެ މަޖިލިސް މެމްބަރަކަށް ގަވާއިދާ ހިލާފަށް 38،272 ރުފިޔާ ދީފައިވާ ކަމަށެވެ. އަދި އެ ފައިސާ އޭނާގެ އަތުން އަނބުރާ ހޯދައި ދައުލަތަށް އެ ފައިސާ ވަންނަންޖެހޭނެ ކަމަށް އޮޑިޓުގައި ބުނެފައިވެ އެވެ.
ނަމަވެސް އެ މެމްބަރަކީ ކޮބައި ކަމެއް އެ އޮޑިޓް ރިޕޯޓުގައި ހާމަކޮށްފައެއް ނުވެ އެވެ. 17 ވަނަ ރައްޔިތުންގެ މަޖިލީހުގެ މެމްބަރުންގެ ތެރެއިން 2012 ވަނަ އަހަރު ގޮނޑި ގެއްލުނު މެމްބަރުންނަކީ ތިމަރަފުށީ ދާއިރާގެ މެންބަރު މުހައްމަދު މުސްތަފާ އާއި ކާށިދޫ ދާއިރާގެ މެންބަރު އިސްމާއިލް އަބްދުލް ހަމީދެވެ.
މަޖިލީހުގެ އޮޑިޓް ރިޕޯޓުގައި ބުނެފައި ވަނީ މުސާރައިގެ ގޮތުގައި ގޮނޑި ގެއްލުނު މެމްބަރަާށް އިތުރަށް 8،842 ރުފިޔާ ދީފައިވާ ކަމަށެވެ. އަދި ކުރީ އަހަރުތަކުގެ ޕެންޝަނުގެ ގޮތުގައި ރިޓަޔާމަންޓު ޕެންޝަން ސްކީމަށް އެ މެމްބަރުގެ ފަރާތުން 2011 ވަނަ އަހަރު ސަރުކާރުން ޖަމާކޮށްދީފައިވާ ފައިސާގެ ތެރެއިން އޭނާ ދައްކަންޖެހޭ 29،430 ރުފިޔާއާ އެކު ޖުމުލަ 38،272 ރުފިޔާ އޭނާގެ އަތުން ދައުލަތަށް ލިބެންޖެހޭ ކަމަށް ވެސް އޮޑިޓް ރިޕޯޓުގައި ބުނެފައިވެ އެވެ.
އޮޑިޓް ރިޕޯޓުގައި ބުނެފައި ވަނީ އެ ފައިސާ އޭނާގެ އަތުން ހޯދުމަށްފަހު ދައުލަތުގެ މާލިއްޔަތަށް ޖަމާކޮށްފައި ނުވާ ކަމަށެވެ. އަދި އެ ފައިސާ އޭނާގެ އަތުން ހޯދުމަށް މަޖިލީހުގެ އިދާރާއިން އެއްވެސް މަސައްކަތެއް ކޮށްފައި ނުވާކަން ލިޔެކިއުންތަކުން ހާމަވެފައިވާ ކަމަށް ވެސް އޮޑިޓް ރިޕޯޓުގައި ބުނެފައިވެ އެވެ.
އޮޑިޓާ ޖެނެރަލް ހަސަން ޒިޔަތު ސޮއިކުރައްވާ މިދިޔަ ހަފްތާގައި ނެރުނު އޮޑިޓް ރިޕޯޓުގައި ބުނެފައި ވަނީ އެ ފައިސާ މެމްބަރުގެ އަތުން ހޯދުމާއި ގުޅޭ ގޮތުން ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާ ކަންތައްތައް ފުރިހަމަ ކޮށްފައި ނުވާ ކަމަށެވެ.
ވަކި ކޮށްފައިވާ މަޖިލިސް މެމްބަރަކަށް އިތުރަށް ފައިސާ ދީފައިވާކަމަށް އޮޑިޓް ރިޕޯޓުގައި ބުނެފައިވީ ނަމަވެސް އެއީ ކޮން މެމްބަރެއް ކަމެއް ރިޕޯޓުގައި ފާހަގަކޮށްފައެއް ނުވެ އެވެ.
ސަތާރަ ވަނަ ރައްޔިތުންގެ މަޖިލީހުގައި ހަތަރު މެމްބަރެއްގެ ގޮނޑި ގެއްލިގެން ދިޔަ އެވެ. އެއީ ކާށިދޫ ދާއިރާގެ މެމްބަރު އިސްމާއިލް އަބްދުލް ހަމީދާއި އަލިފުށި ދާއިރާގެ މެމްބަރު މުހައްމަދު ނާޝިޒާއި މެދު ހެންވޭރު ދާއިރާގެ މެމްބަރު އަލީ އާޒިމްގެ އިތުރުން ތިމަރަފުށީ ދާއިރާގެ މެމްބަރު މުހައްމަދު މުސްތަފާގެ ގޮނޑި އެވެ.