09 Feb 2016, 21:42
ސައުތު އޭޝިއަން ޔުނިވާސިޓީގެ ގަވާނިންގ ބޯޑުގެ 8 ވަނަ ބައްދަލުވުން މިއަދު ރާއްޖޭގައި ބާއްވައިފި އެވެ.
އެއް ދުވަހުގެ މުއްދަތަށް މިއަދު ޕެރެޑައިސް އައިލެންޑް ރިސޯޓްގައި ބޭއްވި އެ ބައްދަލުވުމުގައި ސާކްގެ ކޮންމެ ގައުމަކުން ދެ މެންބަރުންނާއި ސައުތު އޭޝިއަން ޔުނިވާސިޓީން އަދި ސާކް ސެކްރެޓޭރިއެޓްގެ މެންބަރުން ހިމެނޭ ގޮތަށް ޖުމްލަ 20 ބޭފުޅުން ވަނީ ބައިވެރިވެ ވަޑައިގެންފަ އެވެ.
މި ފަހަރުގެ ބައްދަލުވުގެ ޗެއާޕަސަންގެ އަކީ ސައުތު އޭޝިއަން ޔުނިވާސިޓީގެ ގަވާނިންގް ބޯޑުގައި ރާއްޖެ ތަމްސީލު ކުރައްވާ އެއް މެންބަރު ކަމުގައިވާ އެޑިއުކޭޝަން މިނިސްޓްރީގެ ނައިބު އަޒްލީން އަހުމަދު އެވެ.
އެ ބައްދަލުވުމުގައި ވަނީ ޔުނިވާސިޓީގެ އެގްޒެކެޓިވް ކައުންސިލާއި އަދި ފައިނޭންސް ކޮމިޓީން ހުށައަޅާފައިވާ ބައެއް ކަންތައްތަކާ މެދު މަޝްވަރާކޮށް އެންމެ މަތީ ފެންވަރުގައި ނިންމަން ޖެހޭ ނިންމުންތައް ނިންމައިފަ އެވެ.
އެޑިއުކޭޝަނުން ބުނީ ޔުނިވާސިޓީގެ މި ދައުރުގެ ރައީސްގެ މަގާމުގެ މުއްދަތު އިތުރުކުރުމާ ބެހޭ ގޮތުން ވެސް މިއަދުގެ ބައްދަލުވުމުގައި މަޝްވަރާކުރި ކަމަށެވެ.
އެޑިއުކޭޝަނުން ބުނީ އިންޑިއާގެ ނިއުދިއްލީގައި ހުންނަ ސައުތު އޭޝިއަން ޔުނިވާސިޓީއަކީ ސާކްގެ ހުރިހައި ގައުމުތަކަށް ނިސްބަތްވާ ޔުނިވާސިޓީއަކަށް ވެފައި އަދި ސާކުގެ ހުރިހައި ގައުމަކުން ވެސް ޗަންދާ ދައްކައިގެން ހިންގަމުންދާ ޔުނިވާސިޓީއަކަށް ވާތީ ރާއްޖޭގެ ދަރިވަރުންނަށް ވެސް އެ ޔުނިވާސިޓީން ވަރަށް ހެޔޮއަގުގައި ކިޔެވުމުގެ ފުރުސަތު ތަނަވަސްވެފައިވާ ކަމަށެވެ.
އެ ޔުނިވާސިޓީގައި ސާކްގެ ހުރިހާ ގައުމަކުން ދަރިވަރުން ތައުލީމް ހާސިލްކުރާ އިރު، ޔުނިވާސިޓީގައި ކިޔަވައިދޭ ހުރިހާ ޕްރޮގްރާމްތަކަކީ ސާކްގެ ހުރިހާ މެންބަރު ގައުމުތަކުން ބަލައިގަންނަ ޕްރޮގްރާމްތަކެއް ކަމަށް އެޑިއުކޭޝަން މިނިސްޓްރީން ބުންޏެވެ.