19 Feb 2016, 15:00
ޔޫރޮޕާ ލީގުގެ ދެވަނަ ބުރުގެ ފުރަތަމަ ލެގުގައި ރޭ ޑެންމާކުގެ އެފްސީ މިޖްލޭންޑް 2-1ގެ ނަތީޖާ އަކުން މެންޗެސްޓަރ ޔުނައިޓެޑްގެ މައްޗަށް ކުރި ހޯދައިފިއެވެ.
މިޖްލަންޑްގެ ދަނޑުގައި ކުޅުނު އެ މެޗުގައި ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނިގެން ދިޔައިރު ފުރަތަމަ ލީޑް ނެގީ ޔުނައިޓެޑުންނެވެ. އެ ގޯލު 37 ވަނަ މިނެޓްގައި ޖެސީ ލިންގާޑް ތަނަވަސް ކޮށްދިން ފުރުސަތަކުން ކާމިޔާބް ކުރީ މެމްފިސް ޑެޕާއީއެވެ. ނަމަވެސް ފުރަތަމަ ހާފް ނިމެން އެއް މިނެޓަށް ވެފައި ވަނިކޮށް ޕިއޯން ސިސްޓޯ ވަނީ މިޖްލަންޑްއަށް މެޗުގެ ނަތީޖާ އެއްވަރުކޮށްދީފައެވެ.
ޔޫރޮޕާ ލީގުގެ ދެވަނަ ބުރުގެ ފުރަތަމަ ލެގުގައި ރޭ ޑެންމާކުގެ އެފްސީ މިޖްލޭންޑާ މެންޗެސްޓަރ ޔުނައިޓެޑް ކުޅުނު މެޗުގައި މިޖްލޭންޑްގެ ގޯލު ޕިއޯން ސިސްޓޯ ކާމިޔާބް ކުރުމަށް ފަހު އުފާފާޅު ކުރަނީ --- ފޮޓޯ: އޭޕީ
އެ މެޗުން މިޖްލަންޑްއިން މޮޅުކޮށްދިން ގޯލު 77 ވަނަ މިނެޓްގައި ކާމިޔާބް ކޮށްދިނީ ޕައުލް އޮނުއާޗޫ އެވެ.
ޔުނައިޓެޑްގެ ދަނޑުގައި ކުޅޭ ދެވަނަ ލެގުގެ މެޗު އޮންނާނީ، އަންނަ ހަފްތާގެ ބުރާސްފަތި ދުވަހުއެވެ.
ޔޫރޮޕާ ލީގުގެ ދެވަނަ ބުރުގެ ފުރަތަމަ ލެގުގައި ރޭ ޑެންމާކުގެ އެފްސީ މިޖްލޭންޑާ މެންޗެސްޓަރ ޔުނައިޓެޑް ކުޅުނު މެޗުގެ ތެރެިން --- ފޮޓޯ: އޭޕީ
ޔޫރޮޕާ ލީގުގެ ރޭކުޅުނު އެހެން މެޗުތަކަށް ބަލާއިރު ލިވަޕޫލް އާއި ޖަރުމަނުގެ އައުގްސްބާގް ބައްދަލުކުރި މެޗު ނިމުނީ ދެ ޓީމުންކުރެ އެއްވެސް ޓީމަކަށް ގޯލެއް ކާމިޔާބް ނުކުރެވިއެވެ. ފިއޮރެންޓީނާ އާއި ޓޮޓެންހަމް ބައްދަލުކުރި މެޗު 1-1 އިން އެއްވަރުވިއިރު، ބްރޫޝިއާ ޑޯޓްމަންޑްއިން ވަނީ ޕޯޓޯގެ މައްޗަށް 0-2 އިން ކުރި ހޯދައިފައެވެ. އަދި ސެވިއްޔާއިން ވަނީ މޮލްޑޭގެ މައްޗަށް 0-3 އިން ކުރި ހޯދާފައެވެ.