މަގުތަކުގެ ތޮއްޖެހުން ކުޑަކުރަން "ޓެކްސީ ސްޓޮޕް"ގެ ބޭނުން ހިފުން މުހިއްމު

25 Feb 2016, 09:24

ރިޕޯޓަށް ބޭނުންވާ ފޮޓޯކޮޅެއް ނަގާލަން ސައިކަލުގައި މާލޭގެ އެކި މަގުތަކުގައި ދުއްވާލީމެވެ. މަޖީދީމަގުގެ އެއްކޮޅުން އަނެއް ކޮޅަށް ދެ ފަހަރެއްގެ މަތީން ދުއްވާލީމެވެ. ޓެކްސީ ސްޓޮޕް ކިޔާ 25 ބޯޑު މަޖީދީމަގުގައި ބަހައްޓާފައި ހުއްޓެވެ. ޓެކްސީ ސްޓޮޕަކީ މީހުން އަރުވާ ބޭލުމަށް ޓެކްސީ ހުއްޓާތަން ނުވަތަ ސަރަހައްދު އަންގައިދޭ ބޯޑު ހަރުކުރެވިފައިވާ ތަނެކެވެ. ނަމަވެސް އެ ބޯޑަކީ އެއްވެސް ބޭނުމެއް ނެތް އެއްޗެކޭ ބުންޏަކަސް ދޮގަކަށް ނުވާނެވެ. އޭގެ ބޭނުން ނުހިފުމުގެ ސަބަބުން އާއްމު އެތައް ބަޔަކަށް އުނދަގޫތަކާ ކުރިމަތިވެ އެވެ.

ޓެކްސީ ދުއްވާ ފަރާތްތަކުންނާއި ޓެކްސީ ބޭނުންކުރާ ފަރާތްތަކުން އެ ބޯޑުތަކުގެ ބޭނުން ހެޔޮ ގޮތުގައި ނުހިފުމުގެ ސަބަބުން މިއަދު އެކަމުގު އުނދަގޫ މަގުތަކުގައި ދުއްވާ އެތައް ބަޔަކަށް އަންނަނީ ވަމުންނެވެ. މަގުމަތިން ކާރެއް ހޯދުމަށް މީހަކު އަތް ނަގައިފި ނަމަ ކިތަންމެ ބާރަށް ދުއްވާފައިދާ ކާރެއް ވެސް ކުއްލިއަކަށް މަޑުކޮށްލަފާނެ އެވެ. ކާރުގެ ފަހަތުގައި ވެހިކަލްތައް ކިއު ހަދަން ޖެހެނީ އެހެންވެގެންނެވެ. ކާރުގެ ފަހަތުގައި އޭގެއިން ވެހިކަލެއް ކިރިޔާ ވެސް ޖެހިއްޖެ ނަމަ ކާރު ޑުރައިވަރު ތެދުވެ ހަޅޭއްލަވާ ގަންނާނެ އެވެ.

ބައެއް ޓެކްސީ ދުއްވާ ފަރާތްތަކުން އެއްވެސް ސުމާރެއް ނެތި މަގުތަކުގައި ދުއްވާ އުޅުމުގެ ސަބަބުން މަގުމަތީގައި ދެން ދުއްވާފައި އުޅޭ ފަރާތްތަކަށް އެތައް ދަތިތަކަކާ ކުރިމަތިލާން މިއަދު ވަނީ ޖެހިފަ އެވެ. ޓެކްސީ ކުރުމުގެ ގަވާއިދާ ހިލާފުވާ ފަރާތްތަކާ މެދު ފިޔަވަޅު އެޅޭ ތަނެއް ނުފެނެ އެވެ. ގަވާއިދާ ހިލާފަށް ޓެކްސީ ދުއްވާ ފަރާތްތައް މިހާރަކު މަދެއް ނޫނެވެ.

"މާލޭގައި ދުއްވާ ހުރިހާ ޓެކްސީއެއްގެ ވާހަކައެއް ނޫން މި ދައްކަނީ. މަދުން ނަމަވެސް އުޅޭ މިބުނާ ކަހަލަ ޑުރައިވަރުން. ހަމަ ފަހަރަކު ތަނަކުން މީހަކު ނަގަމުންދާނީ. އެ ދާއިރުގައި ސިގްނަލު ނުދީ ކުއްލި އަކަށް މަޑުކުރާނީ. ދެން ފަހަތުގައި އޮންނަ ވެހިކަލް ގޮސް ޖެހޭނެދޯ ކުއްލި އަކަށް މަޑުކުރީމަ. ގަވާއިދުގައި ބުނެފައިވާ ތަންތަނަށް މަޑުކޮށްގެން ދަތުރުތައް ނަގާ ނަމަ މި މައްސަލަ ދިމައެއް ނުވާނެ،" ޝަފްރާޒް މުހުސިން،22، ބުންޏެވެ.

ޓެކްސީ ސްޓޮޕްތަކުގެ ބޭނުން ހިފެނީ ކިހާ ވަރަކަށް:

"ތިޔަ ބުނާ ޓެކްސީ ސްޓޮޕެއް ހުއްޓަސް ވާ އެއްވެސް ކަމެއް ނެތް. ތިޔަކަމުގައި (މަގުމަތިން ޓެކްސީ ނެގުމުގައި) އަޅުގަނޑުމެން ޓެކްސީ ދުއްވާ ފަރާތްތައް ގޯސް ނުކުރޭ. ރަނގަޅު ޓެކްސީ ދުއްވާ ފަރާތްތަކުގެ ވެސް މައްސަލަތައް އެބަހުރި. އެކަމަކު މައްސަލަ ތަކުރާރު ވެގެން ދާނެ ކަމާ ބެހޭ ފަރާތްތަކުން އެކަމުގައި ފިޔަވަޅު ނާޅާ ކަމަށް ވަންޏާ. ޓްރާންސްޕޯޓުން އެބަހުރި މަގުމަތީގައި ބަހައްޓާފައި ޓެކްސީސްޓޮޕްތަކެއް. އެކަމަކު އޭގެ ބޭނުން ޓެކްސީތަކަށް ހިފެނީ ކިހާ ވަރަކަށް. މިސާލަކަށް މީހަކު ޓެކްސީ ސްޓޮޕެއް ކައިރީގައި މަޑުކޮށްލައިގެން ހުއްޓަސް އަޅުގަނޑުމެންނަށް އެތަނަށް ކައިރިވެވޭކަށް ނޯވެ. ސައިކަލުތައް އޮންނާނެ ބަރިއަކަށް ޕާކުކޮށްލާފައި،" ޓެކްސީ ޑުވައިވަރެއް ކަމަށްވާ އަބްދުﷲ ޔޫސުފް "ސަން" އަށް ބުންޏެވެ.

ޓެކްސީ ސްޓޮޕެއް ކުރިމަތީގައި މީހަކު މަޑުކޮށްލައިގެން: ސަން ފޮޓޯ

އަބްދުﷲ ބުނީ ޓެކްސީސްޓޮޕްތަކުގެ ބޭނުން ފުރިހަމަ ގޮތުގައި ހިފޭ ނަމަ ޓެކްސީ ޑުރައިވަރުންނާއި ހެދި މަގުތައް ބާރު ބޮޑުވާ މައްސަލައަށް ހައްލެއް ލިބިގެންދާނެ ކަމަށެވެ. އޭނާ ބުނީ ޓެކްސީ ސްޓޮޕްތައް ހެދުމަކީ ވަރަށް ރަނގަޅު ހިދުމަތެއް ކަމަށާއި، މާލޭގެ މަގުތަކުގެ އެކިއެކި ހިސާބުތަކުގައި މަޑުކޮށްގެން ތިބެގެން އަތް ނެގުމަށް ވުރެ ޓެކްސީ ސްޓޮޕްތަކުގައި މީހުން މަޑުކޮށްގެން ތިބޭ ނަމަ އާންމުންނަށް ވެސް އަދި ޓެކްސީތަކަށް ވެސް ފަސޭހަވާނެ ކަމަށެވެ.

ދުއްވާފައި ދާ ކާރެއް ހުއްޓުވުމަށް އަމަލު ކުރަންޖެހޭ ގޮތް:

ދުނިޔޭގައި މީހުން ތޮއްޖެހިފައިވާ ސިޓީތަކުގެ ކުރިން ޖާގަ ހޯދަނީ ވެރިރަށް މާލެ އެވެ. އެއީ ދުނިޔޭގައި ކުޑަ ބިމެއްގައި އެންމެ ގިނަ މީހުން ދިރިއުޅޭ ރަށެވެ. ރާއްޖޭގެ އާބާދީގެ 38 ޕަސެންޓް މީހުން ދިރިއުޅެނީ މާލޭގަ އެވެ. އެއީ 153،904 މީހުންނެވެ. އެހެންކަމުން ޒަރޫރީ ތަފާތު އެކި ބޭނުންތަކުގައި މީހުން ހިނގާ ބިނގާވެ އުޅޭ އިރު އަނެއް ބަޔަކު ވެހިކަލުތަކުގައި މަގުތަކުގައި ހަރަކާތްތެރިވަމުންދެ އެވެ. ޓެކްސީ ކުރާ މީހުން އެކަން ކުރަމުން ދަނީ އެމީހުން ދިރިއުޅުމަށް ކުރާ މަސައްކަތަށެވެ.

މަގު މަތިން ޓެކްސީއެއް ހޯދުމަށް އެންމެން ވެސް ކުރާ އެއް ކަމަކީ އަތް ނެގުމެވެ. ނަމަވެސް މިހާރު އެކަން ބަދަލުވާން އެބަޖެހެ އެވެ. މާލޭގެ އެކި ސަރަހައްދުތަކުގައި ޓެކްސީ ޕޮއިންޓު ތަކެއް ޓްރާންސްޕޯޓް އޮތޯރިޓީ އިން ބަހައްޓާފައި ހުރި އިރު އޭގެ ބޭނުން ކުރަނީ ކިތައް މީހުން ހެއްޔެވެ. ޓެކްސީ ޕޮއިންޓު ބެހެއްޓި ބޭނުން ކުރެވޭ ހެއްޔެވެ.

ޓެކްސީ ސްޓޮޕެއް ކުރިމަތީގައި ސައިކަލުތަކެއް ޕާކުކޮށްފައި: ސަން ފޮޓޯ

ޓެކްސީ ގަވާއިދުގެ ފަސް ވަނަ މާއްދާގައި ބުނެފައި ވަނީ ޓެކްސީ ހިދުމަތްދޭ ތަންތަނުގައި "ޓެކްސީ ސްޓޮޕް" ކަނޑައަޅާ ބަލަހައްޓާނީ، ރަށެއްގައި ނަމަ ރަށު ކައުންސިލުން ކަމަށާއި ސިޓީއެއް ނަމަ ސިޓީ ކައުންސިލުން ކަމަށެވެ. އެ ނޫން ސަރަހައްދުތަކުގައި އެ ސަރަހައްދެއް އެ ސަރުކާރެއް ހަވާލުކޮށްފައިވާ ފަރާތުން ކަމަށް ގަވާއިދުގައި ބުނެފައިވެ އެވެ.

ގަވާއިދުގައި ބުނެފައި ވަނީ ޓެކްސީ ހިދުމަތްދޭ ސަރަހައްދެއްގައި ޓެކްސީ ސްޓޮޕް ކަނޑައަޅާފައިވާ ނަމަ އެތަނެއްގައި އެއްގަމު ދަތުރު ފަތުރު ކުރުމުގައި ބޭނުން ކުރާ ޓްރެފިކް ނިޝާންތަކުގެ ގަވާއިދުގައި ކަނޑައަޅާފައިވާ "ޓެކްސީ ހުއްޓާ ސަރަހައްދު އަންގައިދޭ ބޯޑު" ހަރުކުރެވިފައި ހުންނަންވާނެ ކަމަށެވެ. އަދި އެ ބޯޑަށް ގެއްލުމެއް ދިނުމަކީ ގަވާއިދުގައި މަނާކޮށްފައިވާ ކަމެކެވެ.

ޓެކްސީ ސްޓޮޕްތަކުގެ ބޭނުން ފުރިހަމަ ގޮތުގައި ނުހިފޭ މައްސަލާގައި ނަން ހާމަކުރަން ބޭނުންނުވާ ޓްރެފިކް ފުލުހަކު ވިދާޅުވީ ޓެކްސީ ސްޓޮޕްތައް ބެހެއްޓީ ޓްރާންސްޕޯޓާއި ފުލުހުންނާ ވަރަށް ބޮޑަށް މަޝްވަރާ ކުރުމަށް ފަހު ކަމަށެވެ. އޭނާ ވިދާޅުވީ މާލޭގައި އެކަށީގެންވާ ޕާކިން ޒޯންތައް ނެތުމުގެ ސަބަބުން ޓެކްސީ ސްޓޮޕްތަކުގައި ސައިކަލު އަދި ބައިސްކަލުތައް ޕާކުކޮށްފައި ހުންނަ ކަމަށެވެ. ނަމަވެސް އެ ޓެކްސީ ސްޓޮޕަކީ ވަކި ބަޔަކަށް ހާއްސަ ތަނެއް ކަމުން އެތަނުގައި ވެހިކަލެއް ޕާކުކޮށްފައިވާ ނަމަ ޓްރެފިކް ޖޫރިމަނާ ސްޓިކާ ޖަހާ ކަމަށް އޭނާ ވިދާޅުވި އެވެ.

ޓެކްސީ ސްޓޮޕެއް ކުރިމަތީގައި ސައިކަލުތަކެއް ޕާކުކޮށްފައި: ސަން ފޮޓޯ

"ޓެކްސީ ސްޓޮޕަކީ ޓެކްސީ ޑްރައިވަރުންނަށް ނުވަތަ ޓެކްސީ ދުއްވާ ފަރާތްތަކަށް ހާއްސަކޮށް ހަދާފައި ހުރި ތަންތަން. އެކަމަކު ތި ދެންނެވިހެން އެތަންތަނަކަށް އެއްވެސް ވަރަކަށް ޓެކްސީތަކަކަށް މަޑެއް ނުކުރެވޭ. އެތަންތަނަށް މަޑު ނުކުރެވޭތީ ޑްރައިވަރުން މި ހަދާ އެއްޗަކީ މަގު މެދުން ދަތުރު ނަގަނީ. އޭރުން މިވާ ގޮތަކީ ޓްރެފިކް ޖޭމް ވަނީ. އަދި ކުދިކުދި އެކްސިޑެންޓުތައް ގިނަ ވަނީ. އެހެންވީމަ އަޅުގަނޑުގެ ނަޒަރުގައި ޓެކްސީ ޑްރައިވަރުންގެ ހަމައެކަނި މައްސަލައެއް ނޫން މިއުޅެނީ،" އޭނާ ވިދާޅުވި އެވެ.

އޭނާ ވިދާޅުވީ އެ މައްސަލާގައި އާއްމު ފަރާތްތައް ވަރަށް ބޮޑަށް ޝާމިލުވާ ކަމަށެވެ. އެ ފަރާތްތައް އެކަމުގައި ހޭލުންތެރިވެ ޓެކްސީ ސްޓޮޕުން ދަތުރު ނެގުމަކީ ފުލުހުންގެ ވަރަށް ބޮޑު އެދިލެއްވުމެއް ކަމަށް އޭނާ ވިދާޅުވި އެވެ.

"އާއްމުންނަށް އެބަ އެނގެން ޖެހޭ މަގު މެދުން ދަތުރު ނެގުމަކީ ރަނގަޅު ކަމެއް ނޫންކަން. ޓެކްސީ ސްޓޮޕްތައް ހަދާފައި މި ހުންނަނީ ކަމަކުކަން. އެތަންތަނުގައި މަޑު ކުރުމުން ހުސް ޓެކްސީއެއް ވެއްޖިއްޔާ އެތަނަށް މަޑުކުރާނެ ކަން. ހަމައެކަނި ޓެކްސީ ޑްރައިވަރުން އެ ވެއާ ވުމަކުން ނެއް މިކަމެއް ނުނިމޭ." އޭނާ ވިދާޅުވި އެވެ.

ކޮންމެއަކަސް ސަރުކާރުތަކުން އެފަދަ ހުރިހާ ކަމެއް ކުރަނީ އެންމެންގެ ވެސް ފަސޭހައަކަށެވެ. އެތަންތަނުގެ ބޭނުން އާއްމު ރައްޔިތުން ވެސް ހެޔޮގޮތުގައި ހިފާނެ ކަމުގެ އުއްމީދުގަ އެވެ. ޓެކްސީ ސްޓޮޕަކަށް އެންމެ ސައިކަލެއް އައިސް މަޑުކޮށްލިޔަސް އެތަނުގެ ބޭނުން ޓެކްސީ ޑްރައިވަރަށް ގެއްލިގެންދާނެ އެވެ. އެހެންކަމުން މިކަމުގައި ފަރުދީ ޒިންމާ އެބައޮތެވެ. އޮފީހަށް ގޮސް ކޮންމެ ދުވަހަކު ފިންގާ ޖަހަން ހަނދާން ބަހައްޓާ އުސޫލުން މަގުތަކުގައި ބަހައްޓާފައި ހުންނަ ޓްރެފިކް ނިޝާންތަކަށް ގަވާއިދުން ރަނގަޅަށް އަމަލު ކުރަން އެބަޖެހެ އެވެ. ތިމާގެ އުފަލާއި އެންމެހާ ރައްޔިތުންގެ އުފަލާއި ރައްކާތެރިކަމަށްޓަކަ އެވެ. މާލޭގައި ޓެރެފިކް މައްސަލަތައް ބޮޑެވެ. އެކަމަކު ހުރިހާ މީހުން ވެސް ގަވާއިދުތަކަށް އިހުތިރާމް ކުރާ ނަމަ މިވަރެއް ނުވާނެ އެވެ.