08 Mar 2016, 17:01
އަންހެނުންނަކީ ގައުމުގެ ކަންކަމުގައި ވޯޓު ލާން ތިބޭ ބައެއްގެ ބަދަލުގައި، އަންހެނުންނަށް އެ މީހުންގެ އަޑު އިއްވުމުގެ ފުރުސަތު ތަނަވަސްކޮށް، ބަސް ކިޔުމާ ކަންކަން ނިންމާ ފެންވަރުގެ މަގާމުތަކަށް ކުރިމަތިލެވޭ ބަޔަކަށް ވާންޖެހޭ ކަމަށް ފޮރިން މިނިސްޓަރު ދުންޔާ މައުމޫން ވިދާޅުވެއްޖެ އެވެ.
ބައިނަލްއަގުވާމީ އަންހެނުންގެ ދުވަހާ ގުޅިގެން ދުންޔާ ދެއްވި ހިތާބުގައި ވިދާޅުވީ މުޖުތަމައުގެ އަންހެނަކު ބާރުވެރި ކުރުވުމަކީ މުޅި މުޖުތަމައު ބާރުވެރި ކުރުވުން ކަމަށާއި އެންމެ އަންހެން ކުއްޖަކަށް އުނގަންނައިދީފިނަމަ، އެ ކުއްޖާ އުނގެނުނު އެއްޗެއް މުޅި މުޖުތަމައުއަށް އުނގަންނައިދޭނެ ކަމަށެވެ.
އަންހެނަކަށް ވާހަކަދައްކާނެ ޕްލެޓްފޯމެއް ހޯދައިދީފިނަމަ، އެ ޕްލެޓްފޯމެއްގައި އެތައް ބައެއްގެ އަޑު އޭނާ އުފުލާނެ ކަމަށް ވެސް ދުންޔާ ވަނީ ވިދާޅުވެފަ އެވެ.
ދުންޔާގެ ހިތާބުގައި އަންހެނުންގެ ބައިވެރިވުމާއެކު ގައުމަށް ހެޔޮ ބަދަލާއި ކުރިއެރުން އަންނަނާނެ ކަމަށް ފާހަގަކުރައްވާފައިވާއިރު، ޖިންސީ ތަފާތުކުރުން ނައްތާލައި ގައުމުގެ ކަންކަމުގައި ބައިވެރިވުމާއި ބަސްބުނުމުގައި ހަމަހަމަ ފުރުސަތު ތަކެއް ފަހިކޮށްދިނުމުގެ މުހިންމު ކަމަށް ވަނީ އަލިއަޅުވާލައްވާފަ އެވެ.
އޭގެ އިތުރުން، އަންހެނުންގެ ދުވަހަށް މިއަހަރު އ.ދ. އިން ކަނޑައަޅާފައިވާ "2030ވަނަ އަހަރަށް 50-50 ދުނިޔެއެއް: ޖިންސުގެ ހަމަހަމަކަން ގެނައުން އަވަސްކުރަމާ" ޝިއާރަކީ ވެސް ޖިންސީ ތަފާތުކުރުން ނައްތާލައި އަންހެނުންނަށް ތަރައްގީއާ ކުރިއެރުން ހޯދުމަށް ބާރުއަޅާނެ ކަމަކަށް ވެގެންދާނެ ކަމަށް ދުންޔާ ވިދާޅުވި އެވެ.
"50:50 ދުނިޔެއެއް ހާސިލް ކުރަން ބޭނުން ނަމަ އަންހެނުންގެ އަޑު އަހާކަން ޔަގީންކުރަން ޖެހޭ. އަންހެނުންނަކީ ހަމައެކަނި ވޯޓު ލާން ތިބޭ ބައެއްގެ ބަދަލުގައި، މަގާމުތަކަށް ކުރިމަތިލެވޭ ބަޔަކަށް ހަދަން ޖެހޭ،" ދުންޔާ ވިދާޅުވެފައިވެ އެވެ.
އަންހެނުންނަކީ ގޭގައި ތިބޭ ބައެއް ކަމަށް ކުރިން ގަބޫލުކުރެވިފައި އޮތް ވިސްނުން ބަދަލުކޮށް، އެކަށީގެންވާ ބަދަލެއް ގެނައުމަށް އަންހެނުންގެ ހައްގުތައް ހޯދުމަށް މަޖިލީހުގެ ތަޅުމުގަޔާ ސިޔާސީ މާހައުލުގައި ބަސްބުނަން ކެރޭ މުޖުތަމައުއެއް އުފައްދަން ޖެހޭ ކަމަށް ވެސް މިނިސްޓަރު ވިދާޅުވި އެވެ.