18 Mar 2016, 00:33
އިދިކޮޅު ފަރާތްތަކުން ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމަށާއި، ސަރުކާރާއި ސަރުކާރުގެ އިސް ވެރިންނަށް އަމާޒުކޮށް ދެމުންގެންދާ ހަމަލާތަކަށް ރައްދު ދިނުމަށް ޕީޕީއެމް ޕީޖީގެ ލީޑަރު އަހްމަދު ނިހާން ހުސައިން މަނިކު ގޮވާލައްވައިފި އެވެ.
ރައީސް ޔާމީނަށް 2018 ވަނަ އަހަރުގެ އިންތިހާބު ކާމިޔާބު ކުރުމަށް ކުރިއަށް ގެންދާ މަހާސިންތާގެ ތިންވަނަ ބުރު ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކައިގައި ނިހާނު ވިދާޅުވީ، ޕީޕީއެމް މެމްބަރުންނަކީ ރައީސް ޔާމީން އަދި ސަރުކާރުގެ ދިފާއުގައި ނުކުންނަން ކެރޭ ބަޔަކަށް ވާން ޖެހޭ ކަމަށެވެ.
ނިހާނު ވިދާޅުވީ، ކުޑަކަކޫ ޖަހައިގެން ތިބުމުގެ ސަބަބުން ބައެއް ފަހަަރު، ޕީޕީއެމް "ކުޑަކޮށްލާފައި" ބޭތިއްބުމަށް އިދިކޮޅު ފަރާތްތަކުން ބޭނުންވާ މަގުސަދު ހާސިލްވަމުން އަންނަ ކަމަށެވެ.
"އެކަން އެގޮތަށް ވާނީ އަޅުގަނޑުމެން ކުޑަކަކޫ ޖަހައިގެން ތިބޭނަމަ، އެގޮތަށް އަޅުގަނޑުމެން އެއްގޮތަކަށް ވެސް ތިބެގެން ނުވާނެ،" ނިހާން ވިދާޅުވި އެވެ.
ނިހާން ވިދާޅުވީ، ސޯޝަލް މީޑިއާގައި އިދިކޮޅު ފަރާތްތަކުން ދެމުން އަންނަ ހަމަލާތަކަށް ޕީޕީއެމް މެމްބަރުން ރައްދު ދޭން ޖެހޭ ކަމަށެވެ. ނިހާނު ވަނީ ޕީޕީއެމް އަދި ރައީސް ޔާމީނުގެ ދިފާއުގައި ސޯޝަލް މީޑިއާގައި ބައެއް ފަރާތްތަކުގެ ނަން ފާހަގަކޮށް، އެފަރާތްތަކަށް ޝުކުރު އަދާކޮށްފަ އެވެ.
މިރޭގެ ރަސްމިއްޔާތުގައި ނިހާނު ވިދާޅުވީ، އިދިކޮޅު ފަރާތްތަކުން ރައީސް ޔާމީން އާ ދިމާކޮށް، ފާޑުފާޑުގެ ތުހުމަތުތައް އަޅުވަމުން ގެންދަނީ އަންނަ ރިޔާސީ އިންތިހާބުގައި ނެރޭނެ ކެނޑިޑޭޓެއް ނެތުމުން ކަމަށެވެ.
ނިހާނު ވަނީ، ކުރީގެ ރައީސް މުހައްމަދު ނަޝީދަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން ކޮރަޕްޓުވެފައިވާ އަދި ވައްކަން ކުރާ ފަރާތްތައް ހިމާޔަތް ކުރަނީ އެމަނިކުފާނު ކަމަށް ވަނީ ވިދާޅުވެފަ އެވެ.