22 Mar 2016, 10:20
ވެސްޓް ޕާކް ސަރަހައްދާ ދިމާލުގައި އޮތް ނަޖިސް ހޮޅި ފަޅާލީ އެމްޑީޕީ އިން ކަމަށް ޕީޕީއެމްގެ ނައިބު ލީޑަރު އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ (އަދުރޭ) ތުހުމަތު ކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ޕާޓްނަޝިޕް ގާނޫނަށް ކޮމެޓީ މަރުހަލާގައި ހުށަހެޅި އިސްލާހަށް ބަހުސް ކުރައްވަމުން އަދުރޭ ވިދާޅުވީ، އެއީ ރަސްފަންނު ސަރަހައްދަށް ދާ ރައްޔިތުންގެ އަދަދު އިތުރުވުމުގެ ސަބަބުން އެމްޑީޕީ އިން ގަސްތުގައި ކުރި ކަމެއް ކަމަށެވެ.
އަދުރޭ ވިދާޅުވީ، ރަސްފަންނަކީ މިހާރަކަށް އައިސް ވަކި ފިކުރެއް ނެތި މާލޭގައި ދިރިއުޅޭ ގިނަ ބަޔަކު ހިތްހަމަ ޖައްސާލަން އެންމެ ގިނަ ވަގުތު ހޭދަކުރާ އެއް ތަން ކަމަށެވެ.
"އެހެންނަމަވެސް އެނގިވަޑައިގަންނަވާތޯ ދާދި ފަހުން އެތާ ކައިރީގައި އޮތް ނަޖިސް ހޮޅިއެއް ފަޅާލައިފިއޭ މި އެމްޑީޕީ މީހުން،" އަދުރޭ ވިދާޅުވި އެވެ.
އަދުރޭ ވިދާޅުވީ، ނަޖިސް ހޮޅި ފަޅާލީ އެތަނަށް ދާ ރައްޔިތުންގެ ހިތުގައި ރައީސް ޔާމީނާ މެދު ހާއްސަ ގަދަރެއް ދެވި މަޑުމަޑުން ނަމަވެސް އިދިކޮޅު މީހުންވެސް ރައީސް ޔާމީނަށް ތާއީދު ކުރާތީ ކަމަށެވެ.
"މިކަމާ ދޭތެރޭ ހިތްހަމަނުޖެހިގެން ހަމަ ގަސްތުގަ އިނގޭތޯ، ހަމަ ގަސްތުގައި ފަޅާލީ،" އަދުރޭ ވިދާޅުވި އެވެ.
ނަޖިސް ހޮޅި ފަޅައިގެން ދިއުމުގެ ސަބަބުން، ރަސްފަންނަށް މޫދަށް އެރުން ވަގުތީ ގޮތުން ވަނީ މަނާކޮށްފަ އެވެ. ނަމަވެސް މިހާރު ހޮޅި ވަނީ ރަނގަޅުކޮށްފަ އެވެ.