22 Mar 2016, 16:47
ކުލަބް މޯލްޑިވްސް ފުޓްސަލް މުބާރާތުގައި ވާދަކުރާ އަންހެން ޕޮލިސް ކުލަބަށް ތައިލެންޑްގެ އަންހެން ފުޓްސަލް ޓީމުގެ ދެ ކުޅުންތެރިން ގެންނަން ނިންމައިފި އެވެ.
ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތުގައި ވާދަކުރާ ޕޮލިސް ކުލަބުން ގެންނަ ދެ ކުޅުންތެރިންނަކީ 2006 ވަނަ އަހަރުން ފެށިގެން ތައިލެންޑްގެ އަންހެން ފުޓްސަލް ޓީމުގައި ކުޅެމުންދާ ސިރަންޔާ ސްރިމަނީ އާއި 2011 ވަނަ އަހަރުން ފެށިގެން އެ ޓީމަށް ކުޅެމުންދާ ޖިރަޕްރަޕާ ނިމްރަތަނައަސިންގް އެވެ.
ޕޮލިސް ކުލަބުން ބުނީ އެ ދެ ކުޅުންތެރިންނަކީ ވެސް ތައިލެންޑްގެ އަންހެން ފުޓްސަލް ޓީމާއެކު އަންހެން ފުޓްސަލް ވޯލްޑް ކަޕްގެ އިތުރުން ބައިނަލް އަޤުވާމީ ގިނަ މުބާރާތްތަކުގައި ވާދަކޮށްފައިވާ ތަޖުރިބާކާރު ދެ ކުޅުންތެރިންނެވެ. އަދި އެ ދެ ކުޅުންތެރިން މާދަމާގެ ވަގުތެއްގައި މާލެ އައިސް ޓީމާ ގުޅޭނެ ކަމަށް ވެސް ޕޮލިސް ކުލަބުން ބުނެ އެވެ.
ޕޮލިސް ކުލަބުން ތައިލެންޑްގެ ދެ ކުޅުންތެރިން ގެންނަން ނިންމާފައިވާއިރު އެ މުބާރާތުގައި ވާދަކުރާ އިމިގްރޭޝަން ޓީމުން ވަނީ އިންޑިއާ ގައުމީ އަންހެން ފުޓްބޯޅަ ޓީމުގެ ގޯލްކީޕަރު އަދިތީ ޗައުހާން ގެންނަން ނިންމާފަ އެވެ.
އިންގްލެންޑުގެ ތިން ވަނަ ޑިވިޝަނުގެ ވެސްޓް ހޭމް އަށް މިދިޔަ އަހަރު ކުޅުނު އަދިތާއަކީ މިދިޔަ މަހު އޮތް ސައުތު އޭޝިއަން ގޭމްސްގެ އަންހެން ފުޓްބޯޅަ އިވެންޓުން ރަން މެޑަލް ހޯދި އިންޑިއާ ޓީމުގެ ވެސް ކީޕަރެވެ.
މިދިޔަ އަހަރު އޮތް އެ މުބާރާތުގައި އަންހެން ޑިވިޝަނުގެ ޗެމްޕިއަންކަން އިމިގްރޭޝަން ހޯދި އިރު ފައިނަލްގައި ވާދަކުރީ ޕޮލިސް ކުލަބާއި ދެކޮޅަށެވެ. އަދި މި އަހަރުގެ މުބާރާތުގައި މި ދެ ޓީމް ލައްވާލީ ދެ ގުރޫޕް އެއްގައެވެ.