24 Mar 2016, 19:52
ގައުމީ ފިރިހެން ވޮލީބޯލް ޓީމްގެ ކޯޗު ތައިލެންޑްގެ ސުންޓޮން ފޮސީޓާގެ ކޮންޓްރެކްޓް ހަމަވުމުން އޭނާގެ ބަދަލުގައި އީރާނުގެ ތަޖްރިބާކާރު ކޯޗެއް ގެނައުމަށް ވޮލީބޯލް އެސޯސިއޭޝަނުން ނިންމައިފިއެވެ.
ވޮލީބޯލް އެސޯސިއޭޝަންގެ ރައީސް މުހައްމަދު ރިޔާޒް ވިދާޅުވީ، ފޮސީޓާ އާއި އެކު ހަދާފައިވަނީ އެއް އަހަރު ދުވަހުގެ އެއްބަސް ވުމެއް ކަމަށާއި އެ އެއްބަސް ވުން މި މަހު ހަމަވެފައިވާ ކަމަށެވެ. އަދި ފޮސީޓާ އާއި ވޮލީބޯލް އެސޯސިއޭޝަންއާ ދެމެދު އެއްވެސް މައްސަލައެއް ވެސް ނުޖެހޭ ކަމަށް ބުންޏެވެ.
ރާއްޖޭގެ ގައުމީ ވޮލީ ޓީމާއެކު ބަނގްލަދޭޝްގެ ވެރިރަށް ޑާކާގައި މިދިޔަ އަހަރު ބޭއްވި އޭޝިއަން ސީނިއާ މެންސް ސެންޓްރަލް ޒޯން ވޮލީބޯޅަ ޗެމްޕިއަންޝިޕުން ދެވަނަ ހޯދައިދިން ކޯޗު ފޮސީޓާގެ ބަދަލުގައި ގެންނަން ހަމަޖެހިފައިވާ އީރާންގެ ކޯޗު ވަރަށް އަވަހަށް މާލެ އައިސް ޓީމާ ގުޅޭނެ ކަމަށް ވޮލީބޯލް އެސޯސިއޭޝަނުން ބުނެއެވެ.
މި މަހު ފަހުކޮޅު އިންޑިއާގައި ބާއްވަން ހަމަޖެހިފައިވާ ސެންޓްރަލް ޒޯން ވޮލީބޯޅަ މުބާރާތަށް ގައުމީ ޓީމު ތައްޔާރުވަމުން އަންނަ އިރު އެ މުބާރާތަށް ޓީމް ފުރުމުގެ ކުރިން އީރާންގެ ކޯޗު ޓީމާ ގުޅޭނެއެވެ.
ފޮސީޓާގެ އިރުޝާދުގެ ދަށުން ގައުމީ ޓީމުން އޭޝިއަން ސެންޓްރަލް ޒޯން ވޮލީބޯޅަ މުބާރާތުގެ ފައިނަލުގައި ތުރުކެމަނިސްތާން އާ ވާދަކޮށް ރިހި މެޑަލެއް ހޯދިއިރު އޭނާގެ އިރުޝާދުގެ ދަށުން ވޮލީ ޓީމް ވަނީ ރިޔޫނިއަންގައި މިދިޔަ އަހަރު ބޭއްވި އިންޑިއަން އޯޝަން އައިލެންޑް ގޭމްސްގެ ސެމީ ފައިނަލަށް ދަތުރުކޮށް ވޮލީ އިވެންޓުގެ ހަތަރުވަނަ ހޯދާފައެވެ.