26 Mar 2016, 23:44
މޮނިކޮން އަމުރު ތަންފީޒު ކުރުމަށް ހޯދަމުން ދިޔަ ތިން މީހުން އަމިއްލަ އަށް ފުލުސް އޮފީހަށް ހާޒިރު ވުމުން ޓެގް އަޅުވައިފި އެވެ.
ފުލުހުން ދެންމެ ކުރި ޓުވީޓެއްގައި ބުނެފައިވަނީ، ޓެރަރިޒަމް ގާނޫނުގެ ދަށުން ނެރެފައިވާ މޮނިކޮން އަމުރު ތަންފީޒު ކުރަން ހޯދަމުން ދިޔަ ތިން މީހުން ފުލުހުންގެ އިދާރާއަށް އަމިއްލަ އަށް ހާޒިރު ވުމުން އެމީހުންގެ ފައިގައި ޓެގް އަޅުވާފައިވާ ކަމަށެވެ.
އެހެންނަމަވެސް ފުލުހުންގެ ކަމާބެހޭ ސެކްޝަނުން ފުލުހުންގެ މީޑިއާ އަށް އެމީހުންގެ ނަންތައް ލިބިފައިނުވާތީ މީޑިއާތަކަށް އެމީހުންގެ މައުލޫމާތު ހިއްސާ ކުރެވެން ނެތް ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
އެންމެ ފަހުން ހައި ކޯޓުން މޮނިކޮން އަމުރު ނެރުނު ފަސް މީހުންނަކީ ގ. ޝާރާޒް، މުހައްމަދު މަފާޒް ހުސައިން ސަލީމް،18، އާއި ތ. ތިމަރަފުށި މާފޮޅޭގޭ ހަމްދާން ހަސަން،18، އާއި ހދ. ނޮޅިވަރަމް ހާވިލާ، އައްސަދު އިބްރާހީމް ރަޝީދު،21، އާއި ދަފްތަރު 4126، މުސްތަފާ މޫސާ،26، ގެ އިތުރުން މ. ވައިޖެހޭ، އަހުމަދު އަޒްމާން،20، އެވެ.
ހައިކޯޓުގެ އަމުރުގައި ބަޔާންކޮށްފައިވާ އެ މީހުން މޮނިޓާ ކުރުމުގެ ގޮތުން ކުރަންޖެހޭ ކަންތައް:
- ރޭގަނޑު 10:00 އާއި ހެނދުނު 6:00 އާ ދެމެދު ގެއިން ބޭރަށް ނުދިއުން.
- ހޯމް މިނިސްޓަރުގެ ހުއްދަ ނެތި މާލެއިން ފުރައިގެން ނުދިއުން.
- އެ އަމުރުގައި ކަނޑައަޅާފައިވާ ވަކި ސަރަހައްދުތަކަކަށް ނުދިއުން.
- އެމީހުންގެ މާލީ މުއާމަލާތްތަކާއި މުދާ ކޮންޓްރޯލްކުރުމުގެ ގޮތުން ފިޔަވަޅު އެޅުން.
- އެމީހުން މުއާސަލާތީ މުއާމަލާތްތައް ކޮންޓްރޯލްކުރުން.
- ފުލުހުންގެ މަރުކަޒަށް ހާޒިރުވެ ސޮއިކުރުން.
- އިލެކްޓްރޯނިކް އާލާތްތައް އެމީހުންގެ ހަށިގަނޑުގައި ނުވަތަ ދިރިއުޅޭތަނުގައި ހަރުކުރުމާއި އެމީހެއްގެ ފޮޓޯއާއި ދިރިއުޅޭ ތަންތަނުގެ ފޮޓޯއާއި އެމީހެއްގެ ފިންގާ ޕްރިންޓްފަދަ ސާމްޕަލްތައް ނަގައި އެމީހުން މޮނީޓަކޮށް ކޮންޓްރޯލްކުރުން.