29 Mar 2016, 10:13
މެލޭޝިއާގައި މޯލްޑިވިއަން ކަލްޗަރަލް ސެންޓަރެއް ގާއިމު ކުރުމަށް މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
މިހާރު މެލޭޝިއާ އަށް ކުރައްވަމުން ގެންދަވާ ރަސްމީ ދަތުރުފުޅުގައި އެގައުމުގެ ބޮޑުވަޒީރު ނަޖީބު ތުން ރައްޒާގާ އެކު ބާއްވަވާ ޖޮއިންޓް ޕްރެސް ސްޓޭޓުމެންޓު ދެއްވަމުން، ރައީސް ޔާމީން ވިދާޅުވީ ދިވެހި ރާއްޖެ އާއި މެލޭޝިއާއާ ދެމެދު އޮންނަނީ ވަރަށް ގާތް ގުޅުމެއް ކަމަށާއި މިހާރު އެމަނިކުފާނު ކުރައްވަމުން ގެންދަވާ ދަތުރުފުޅުގެ ސަބަބުން އެ ގުޅުން އިތުރަށް ވަރުގަދަ ވެއްޖެ ކަމަށެވެ.
ރައީސް ވިދާޅުވީ، މެލޭޝިއާގައި ދިވެހީންގެ ސަގާފީ މަރުކަޒެއް ނުވަތަ ކަލްޗަރަލް ސެންޓަރެއް ގާއިމު ކުރުމަށް އެގައުމުގެ ކަމާ ބެހޭ ފަރާތްތަކާ އެކު ވަރަށް ގާތުން މަސައްކަތް ކުރައްވާނެ ކަމަށެވެ.
"މެލޭޝިއާގައި މޯލްޑިވިއަން ކަލްޗަރަލް ސެންޓަރެއް ގާއިމުކުރުމަށް، ދިވެހި ސަރުކާރުން މެލޭޝިއާގެ ކަމާ ބެހޭ ފަރާތްތަކާ އެކު ވަރަށް ގާތުން މަސައްކަތް ކުރާނަން،" ރައީސް ވިދާޅުވި އެވެ.
އަދި، މެލޭޝިއާ އިން 2020 ވަނަ އަހަރަށް ކަނޑައަޅާފައިވާ ތަސައްވަރު މިސާލެއްގެ ގޮތުގައި ދިވެހި ސަރުކާރުން ނަގައި، އެފަދަ ތަސައްވަރަކާ ދިމާލަށް މަސައްކަތް ކުރައްވަމުން އަންނަ ކަމަށް ވެސް ރައީސް ވިދާޅުވި އެވެ.
މެލޭޝިއާ އަށް ކުރައްވަމުން ގެންދަވާ ރަސްމީ ދަތުރުފުޅުގައި، ރައީސް ޔާމީން އިއްޔެ ވަނީ މެލޭޝިއާގައި ދިރިއުޅޭ ދިވެހީންނާ ބައްދަލުކުރައްވައިފަ އެވެ.