29 Mar 2016, 11:23
ޖަކާޓާ (މާޗް 29): ފިލިޕީންސްގެ ކަނޑުން އިންޑޮނޭޝިއާގެ 10 ފަޅުވެރިން ވަގަށް ނަގައިފި ކަމަށް އިންޑޮނޭޝިއާގެ ފޮރިން މިނިސްޓްރީގެ ތަރުޖަމާނު، އަރުމަނަތާ ނާސިރު ވިދާޅުވެއްޖެ އެވެ.
ފިލިޕީންސްގެ އަސްކަރީ އޮފިޝަލަކު ވިދާޅުވީ ފަޅުވެރިން ވަގަށް ނެގީ ހަނގުރާމަވެރި ޖަމާއަތެއް ކަމަށްވާ އަބޫ ސައްޔާފުން ކަމަށެވެ. އަދި އެ ޖަމާއަތުން ވަނީ ފަޅުވެރިންގެ ބަދަލުގައި ފައިސާ ދިނުމަށް ބުނެފައި ކަމަށް އޮފިޝަލުން ވިދާޅުވި އެވެ. ނަމަވެސް، އެޖަމާއަތުން ދޭން ބުނެފައިވާ ފައިސާގެ މިންވަރު އޮފިޝަލު ހާމަނުކުރައްވަ އެވެ.
ދެ ބޯޓެއްގައި ދަތުރު ކުރި އެފަޅުވެރިން ވަގަށް ނެގީ ބޯނިއޯ އައިލެންޑުން ފިލިޕީންސަށް ދަތުރު ކުރަމުން ދަނިކޮށް ކަމަށް ފޮރިން މިނިސްޓްރީގެ ތަރުޖަމާނު، ނާސިރު ވިދާޅުވި އެވެ. ނާސިރު ވިދާޅުވީ ފައިސާ ހަވާލު ކުރުމަށް ބުނެ ޓަގު ބޯޓާއި ބާޖުގެ ވެރި ފަރާތަށް އަބޫ ސައްޔާފުގެ ހަނގުރާމަވެރިއެއް ކަމަށް ބުނާ މީހަކު ގުޅީ ހޮނިހިރު ދުވަހު ކަމަށެވެ.
ފިލިޕީންސްގެ ފޮރިން މިނިސްޓްރީއާ ގުޅިގެން އިންޑޮނޭޝިއާގެ ފޮރިން މިނިސްޓްރީން ދަނީ މައްސަލަ ބަލަމުން ކަމަށް ނާސިރު ވިދާޅުވި އެވެ.
"އަޅުގަނޑުމެން މިހާރު އެންމެ ބޮޑަށް އިސްކަން ދެނީ ވަގަށް ނަގާފައިވާ 10 ރައްޔިތުންގެ ސަލާމަތަށް،" ނާސިރު ވިދާޅުވި އެވެ.
ނަމަވެސް، ފިލިޕީންސްގެ ސަރުކާރުން އެކަމާ ބެހޭ ގޮތުން ރަސްމީކޮށް އެއްވެސް އެއްޗެކޭ ބުނެފައެއް ނުވެ އެވެ.
ދެ ހާހުގެ އަހަރުތަކުގައި ފިލިޕީންސުގެ އަބޫސައްޔާފު ޖަމާއަތް ދުނިޔޭގެ ސަމާލުކަމަށް އައީ ގިނަ އަދަދެއްގެ ބޭރު ގައުމުގެ ފަތުރުވެރިން ވަގަށް ނެގުމާ ގުޅިގެންނެވެ. (އޭއެފްޕީ)