29 Mar 2016, 13:33
ސަރުކާރު ހިއްސާވާ ކުންފުނިތަކުގައި މަސައްކަތްކުރާ ދިވެހި 32 މުވައްޒަފަކަށް މިއަހަރުގެ ހައްޖުގެ އަޅުކަން އަދާކުރުމުގެ ފުރުސަތު ފުރަތަމަ ފަހަރަށް ސަރުކާރުގެ ފަރާތުން ދީފި އެވެ.
މިއަދު އިސްލާމިކް މިނިސްޓްރީގައި ބޭއްވި ރަސްމިއްޔާތުގައި ހައްޖުގެ ކޯޓާ ހަވާލުކޮށްފައި ވަނީ، ސަރުކާރު ހިއްސާވާ 10 ކުންފުންޏަކަށެވެ. އެއީ އެމްޓީސީސީ އަށް ހަ ޖާގަ އާއި މޯލްޑިވްސް އެއާޕޯޓްސް ކޮމްޕެނީއަށް 10 ޖާގަ އާއި ހައުސިން ޑިވެލޮޕްމަންޓް ކޯޕަރޭޝަނަށާއި މޯލްޑިވްސް ޕޯޓްސް ލިމިޓެޑަށް ހަތަރު ޖާގައެވެ.
މީގެ އިތުރުން، ދިރާގަށް ތިން ޖާގަ ދީފައިވާއިރު، އެސްޓީއޯ އަށާއި ބޭންކް އޮފް މޯލްޑިވްސް އަށާއި އެމްޑަބްލިއުއެސްސީ އަދި އައިލެންޑް އޭވިއޭޝަނަށް ދީފައި ވަނީ ދެ ޖާގައެވެ. ސްޓެލްކޯއަށް ދީފައިވަނީ އެންމެ ޖާގައެކެވެ.
އެ ކުންފުނިތަކަށް ހައްޖުގެ ކޯޓާ ހަވާލުކޮށްދެއްވާފައިވަނީ، ރަސްމިއްޔާތުގެ ޝަރަފްވެރި މެހްމާން ފިނޭންސް މިނިސްޓަރު އަބްދުﷲ ޖިހާދެވެ.
ސަން އަށް މައުލޫމާތުދެމުން ހައްޖު ކޯޕަރޭޝަންގެ މެނޭޖިން ޑިރެކްޓަރު ޔާމީން އިދްރީސް ވިދާޅުވީ، ސަރުކާރު ކުންފުނިތަކުގެ މުވައްޒަފުންނަށް މިއަދު ދިން ފުރުސަތުތަކަކީ ސަރުކާރުން ހިލޭ ފޮނުވައިދޭ މީހުން ކަމަށެވެ. އަދި ކުރިއަށް އޮތް އަހަރުތަކުގައި ވެސް އެ ފުރުސަތު ސަރުކާރު ކުންފުނިތަކުގެ މުވައްޒަފުންނަށް ލިބިގެންދާނެ ކަމުގެ ޔަގީންކަން ޔާމީން ދެއްވާކަމަށް ވިދާޅުވި އެވެ.
ރަސްމިއްޔާތުގައި ހައްޖަށް ގެންދިއުމުގެ ފުރުސަތު ލިބުނު ކުންފުނިތަކުގެ ފަރާތުން ވާހަކަފުޅުދައްކަވަމުން އެމްޓީސީސީގެ ސީއީއޯ އަބްދުއްރައްޒާގު ހަލީމް ވިދާޅުވީ، ސަރުކާރު ހިއްސާވާ ކުންފުނިތަކަށް ހައްޖަށް ދިއުމަށް މިއަދު ލިބުނު ފުރުސަތުތަކަކީ އިޖްތިމާއީ ގޮތުންނާއި އިގްތިސާދީ ގޮތުން ގައުމު ތަރައްގީ ކުރުމަށްޓަކާ ގޮތުން ރައީސް ޔާމީން ފައްޓަވާފައިވާ ޕްރޮގްރަމްތަކުގެ ތެރެއިން ކުންފުނިތައް ބާރުވެރިކުރުވައި ކުރިއެރުވޭނެ ކަމުގެ ނަތީޖާ ކަމަށެވެ.
އެގޮތުން، އެމްޓީސީސީގެ 35 އަހަރުގެ ދިގު ތާރީހުގައި ސަރުކާރުގެ ފަރާތުން އެ ކުންފުނީގެ މުވައްޒަފުން ހައްޖަށް ފޮނުވުމުގެ ފުރުސަތު ލިބުނު މިއީ ފުރަތަމަ ފަހަރު ކަމަށް އޭނާ ފާހަގަކުރެއްވި އެވެ.
ރަސްމިއްޔާތުގައި އިސްލާމިކް މިނިސްޓަރު ވިދާޅުވީ، މިއަދުގެ ރަސްމިއްޔާތަކީ ސަރުކާރުގެ ފަރާތުން ދިވެހި ރައްޔިތުން ރޫހާނީ ގޮތުން ތަރައްގީކުރުމުގެ ހެއްކެއް ކަމަށެވެ. އަދި މިނިސްޓަރު ވަނީ ހައްޖުގެ އަޅުކަމުގެ މައްޗަށް އިޝާރާތްކުރައްވާ ވާހަކަފުޅުދައްކަވާފައެވެ.
ރަސްމިއްޔާތުގައި ފިނޭންސް މިނިސްޓަރު އަބްދުﷲ ޖިހާދު ވިދާޅުވީ، މިއަދުގެ ރަސްމިއްޔާތުން ދައްކައިދެނީ ރައީސް ޔާމީނަކީ ހަމައެކަނި "އިމާރާތްކުރައްވާ ބޭފުޅެއް ނޫން" ކަމަށެވެ. އަދި ފެނިގެންދިޔައީ އެމަނިކުފާނުގެ ހިތްޕުޅުގައި ދިވެހި ރައްޔިތުންގެ ދީނީ އަގީދާ ވަރުގަދަކޮށް، ދިވެހިންނަކީ ދީނަށް ލޯބިކުރާ ބަޔަކަށް ހެދުމަށް ހިތްވަރުދޭ މިންވަރު ކަމަށް ވިދާޅުވި އެވެ.
ހައްޖަށްދިއުމަކީ ހައްޖުގެ ވަގުތުގައި ކުރަންޖެހޭ ކަމެއް ނޫން ކަމަށާއި ހައްޖަށްދިއުމުގެ ކުރިން އެކަމަށް ތައްޔާރުވާންޖެހޭ ކަމަށް ވެސް މިނިސްޓަރު ވިދާޅުވި އެވެ. އަދި މިއަދު ހައްޖަށްދިއުމުގެ ފުރުސަތު ލިބުނު މުވައްޒަފުން މިހާރުން ފަށައިގެން ހައްޖަށް ދިއުމަށް ތައްޔާރު ވުމަށް މިނިސްޓަރު ނަސޭހަތްތެރިތެރިވެ ވަޑައިގަތެވެ.
މިނިސްޓަރު ޖިހާދު ވިދާޅުވީ، ދިވެހިން ތިބެންޖެހޭނީ ދިވެހިންގެ ގޮތުގައި އިސްލާމްކަމުގައި ކަމަށެވެ. އަދި މިހާރަކަށް އައިސް ޕޯޑިއަމްތަކުގައާއި ފޯރަމްތަކުގައި ހަމަތަކުންނެއްޓި، ސިޔާސީ ވާހަކަތަކެއްގެ ނަމުގައި މީހުންގެ އަބުރު ކަތިލެވޭ ވާހަކަދައްކަމުންދާ ކަން ފާހަގަކުރެވިފައިވާ ކަމަށެވެ.
އެގޮތުން، ސިޔާސީ ވާހަކައެއްދައްކާނަމަ ދައްކަންޖެހޭނީ އިސްލާމީ ހުދޫދާއި ހަމަތަކުގެ މަތިން ކަމަށާއި އެހެންނޫންނަމަ ގައުމުގައި ފިތުނަ ފަސާދަ އުފެދި، ގައުމު ހަލާކުވެގެން ގޮސްދާނެ ކަމަށް މިނިސްޓަރު ޖިހާދު ވިދާޅުވި އެވެ.