31 Mar 2016, 08:48
މިސްރުގެ އެލެގްޒެންޑްރިއާ އިން ފުރައިގެން ކައިރޯއަށް ދަތުރުކުރި އިޖިޕްޓްއެއާގެ މަތިންދާބޯޓު ހައިޖެކްކުރީ ސައިޕްރަސްގައި ދިރިއުޅޭ ކުރީގެ އަނބިމީހާއާއި ދަރިންނާ ބައްދަލުކުރަން ކަމަށް ބޯޓު ހައިޖެކްޓްކުރި މީހާ ބުނެފި އެވެ.
އިޖިޕްޓްއެއާގެ އެމްއެސް181 ފްލައިޓް ހައިޖެކްކުރި މިސްރަށް އުފަން އުމުރުން 59 އަހަރުގެ ސައިފް އަލްދިން މުހައްމަދު، އެ ބޯޓު ހައިޖެކްކުރީ ފޭކު ގޮވާ ތަކެތި ހަރުކޮށްފައި ހުރި ކަމަރެއް ބޭނުންކޮށް، ބިރު ދައްކައިގެންނެވެ.
ގާތްގަނޑަކަށް ހަ ގަޑިއިރަށް ބޯޓު ހައިޖެކްކޮށް ސައިޕްރަސްގެ ވެރިރަށް ލާނަކާގައި ބޯޓު ޖެއްސިތާ މާގިނަ އިރުތަކެއް ނުވެ، އޭނާ ވަނީ އަމިއްލައަށް ފުލުހުންނާ ހަވާލުވެފަ އެވެ.
މުސްތަފާގެ މައްޗަށް ހައިޖެކްކުރުމާއި މީހުންތަކެއް ބަންދުގައި ބެހެއްޓުމާއި ހަމަނުޖެހުން އުފެއްދުމަށް މަސައްކަތްކުރުމާއި ޓެރަރިޒަމާ އަދި ގޮވާތަކެތި ގެންގުޅުނު ކަމުގެ ދެ މައްސަލައެއްގެ ތުހުމަތުގައި ދައުވާ އުފުލާނެ ކަމަށް ބެލެވޭ އިރު، ލާނަކާގެ ކޯޓަކުން މިއަދުވަނީ އަށް ދުވަސް ވަންދެން އޭނާ ބަންދުގައި ބެހެއްޓުމަށް އަމުރުކޮށްފަ އެވެ.
"މީހަކަށް 24 އަހަރު ދުވަސް ވަންދެން އާއިލާ ނުފެނި އަދި އަންހެނުންނާއި ކުދިން ދެކިލަން ބޭނުންވެ، މިސްރުގެ ސަރުކާރުން އެކަމަށް ފުރުސަތު ނުދިނުމުން، ދެން އެމީހަކު ކީއްކުރާނީ،" ސައިޕްރަސްގެ ފުލުހުންނަށް ދިން ބަޔާނެއްގައި މުސްތަފާ ބުނެފައިވެ އެވެ.
އަނބިދަރިންނާ ބައްދަލުކުރަން ބޭނުންވާ ކަމަށް މުސްތަފާ ބުނި ނަމަވެސް އޭނާގެ ތިބީ ކިތައް ދަރިން ކަމެއް އެއްވެސް މީޑިއާއެއްގައި ރިޕޯޓްކޮށްފައެއް ނުވެ އެވެ. އަދި އޭނާގެ އަނބިދަރިންނާ ބައްދަލުކުރުމަށް މިސްރުން ފުރުސަތުދީފައި ނުވަނީ ކީއްވެގެން ކަމެއް ވެސް އަދި ހާމަކޮށްފައެއްނުވެ އެވެ.
ތަހުގީގު ޓީމުގެ އޮފިޝަލެއް ކަމަށްވާ އެންޑްރިއެސް ލެމްބްރިއާނޯ ވިދާޅުވީ، މުސްތަފާ، ފްލައިޓް ހައިޖެކް ކޮށްފައި ވަނީ އެލެގްޒެންޑްރިއާ އިން ފުރިތާ 15 މިނެޓުގެ ތެރޭގައި ކަމަށެވެ.
"ހައިޖެކްޓްކުރި މީހާ ބޯޓުން ދަތުރުކުރި ފަސިންޖަރުންނާއި ކުރޫއިންގެ ޕާސްޕޯޓް އޭނާއާ ހަވާލުކުރަން އެންގި. އަދި ކްރޫއިންގެ ދެ މެންބަރުންނަށް ދެ މެސެޖެއްދިން. އެއީ ޕައިލެޓަށް އޭނާއަކީ ހައިޖެކާއެއްކަން އެންގުމަށާއި ތުރުކީ އާއި ގްރީސް އަދި ސައިޕްރަސްގެ އެއާޕޯޓަކަށް ފްލައިޓް ޖެއްސުން. ހާއްސަކޮށް ސައިޕްރަސް އަށް،" ތަހުގީގީ އޮފިޝަލު ލެމްބްރިއާނޯ ވިދާޅުވި އެވެ.
އޭނާ ވިދާޅުވީ، މިސްރުގެ ސަރަހައްދަކަށް ފްލައިޓް ޖައްސައިފި ނަމަ، ފްލައިޓް ގޮއްވާލާނެ ކަމުގެ އިންޒާރު ވެސް މުސްތަފާ ދިން ކަމަށެވެ.
ލާނަކާ އެއާޕޯޓުގައި ފްލައިޓް ޖެއްސުމުން މުސްތަފާ ވަނީ އޭނާގެ ކުރީގެ އަނބިމީހާ އަށް ލިޔެފައިވާ ސިޓީއެއް ރަންވޭ މައްޗަށް ވައްޓާލައިފަ އެވެ. އަދި އެ ސިޓީގައި އޭނާ ވަނީ މިސްރުގެ ޖަލުތަކުގައި ތިބި 63 އަންހެން ގައިދީން މިނިވަންކުރުމަށް އަމުރުކޮށްފަ އެވެ.
ކުރީގެ އަންހެނުންނާ ވާހަކަދައްކަން އެދުމުން ސައިޕްރަސްގެ ފުލުހުން ވަނީ މުސްތަފާގެ ކުރީގެ އަންހެނުން އެއާޕޯޓަށް ވެސް ގެނެސްފަ އެވެ.
ފްލައިޓް ހައިޖެކްކޮށްފައި ވަނީ، ލޯތްބާ ގުޅުން ހުރި ކަމެއްގެ ސަބަބުންތޯ ރިޕޯޓަރަކު އެހި ސުވާލަކަށް ޖަވާބުދެމުން ސައިޕްރަސްގެ ރައީސް ނިކޮސް އަނަސްޓޭޝިއަޑެސް ވަނީ ހިނިފުޅުވަޑުވަމުން "އެފަދަ ކަމެއްގައި އަބަދުވެސް އަންހެނެއް ބައިވެރިވާނެ" ކަމަށް ވިދާޅުވެފަ އެވެ.
މިސްރުގެ ޕްރޮސިކިއުޓަރުން ވަނީ މުސްތަފާ އެގައުމަށް ފޮނުވައިދިނުމަށް ސައިޕްރަސްގެ ކަމާ ބެހޭ އިދާރާތަކަށް އަންގައިފަ އެވެ. ނަމަވެސް އެކަމުގެ އެއްވެސް ވާހަކައެއް ދައްކަން މާ އަވަސްކަމަށް ސައިޕްރަސް ފުލުހުންގެ ތަރުޖަމާނަކާއި ސަރުކާރުގެ އޮފިޝަލަކު ބުނެފައިވެ އެވެ.
ކޯޓުން ނެރެގެން ފުލުހުންގެ ޖިޕަކަށް އެރުވުމުން މުސްތަފާ ވަނީ ޖިޕުގެ ބިއްލޫރިގަނޑުން، ނަސްރު ލިބުނު ކަމުގެ ނިޝާނެއް ކަމަށްވާ "ވީ" އެއް އަތުން ދައްކާލާފަ އެވެ.
މައުލޫމާތު: އަލްޖަޒީރާ، ބީބީސީ