06 Apr 2016, 09:38
ނިއުދިއްލީ (އޭޕްރިލް 6):އިންޑިއާގެ ބިހާރު ސްޓޭޓުގައި ބަނގުރާ ވިއްކުމާއި ބުއިން އެއްކޮށް މަނާކޮށްފި އެވެ.
ބިހާރުގެ ޗީފް މިިނިސްޓަރު ނިތިޝް ކުމާރު ވިދާޅުވީ، އެ ސްޓޭޓުގައި ބަނގުރާ މަނާ ކުރީ އެއީ ބިހާރަށް "އިޖުތިމާއީ ބަދަލު ގެންނަންވީ ވަގުތު" ކަމަށް ވުމުން ކަމަށެވެ.
"މިއަދުން ފެށިގެން އެއްވެސް ހޮޓަލެއް ނުވަތަ އެފަދަ ތަނަކުން ބަނގުރާ ނުވިއްކާނެ،" އިއްޔެ އޮތް ޕްރެސް ކޮންފަރެންސެއްގައި ވާހަކަފުޅު ދައްކަވަމުން ޗީފް މިނިސްޓަރު ވިދާޅުވި އެވެ.
ބަނގުރާ މަނާ ކުރުމަކީ، ޗީފް މިނިސްޓަރު ކަމަށް އިންތިހާބު ވުމުގެ ކުރިން ބިހާރުގެ ރައްޔިތުންނަށް ކޮށްދެއްވާނެ ކަމަށް ކުމާރު ވިދާޅުވި ކަންތައްތަކުގެ ތެރެއިން އެއްކަމެވެ.
ބިހާރުގެ ފިނޭންސް މިނިސްޓަރު، އަބްދުލް ބާރީ ސިއްދީގު ވިދާޅުވީ އެ ސްޓޭޓުގައި މުޅިން ބަނގުރާ މަނާ ކުރަން ނިންމީ އެކަމަށް އާއްމުންގެ ފަރާތުން ލިބުނު ތަރުހީބަށް ބެލުމަށް ފަހުގައާއި ގިނަ އަދަދެއްގެ އަންހެނުންގެ އެދުމުގެ މަތިން ކަމަށެވެ.
ބިހާރުގައި އެއްކޮށް ބަނގުރާ މަނާ ކުރަން ނިންމީ ސްޓޭޓުގެ ގާނޫނު ހަދާ މަޖިލީހުން މިދިޔަ ބުރާސްފަތި ދުވަހު ފާސް ކުރި ބިލެއްގެ ދަށުންނެވެ. މީގެ ކުރިން ބިހާރުގެ ކަމާ ބެހޭ ފަރާތްތަކުން ނިންމާފައި އޮތީ ބަނގުރާ އެއްކޮށް މަނާ ކުރަން ހަ މަސް ދުވަހުގެ މުއްދަތު ދިނުމަށެވެ. އެބިލުގައިވާ ގޮތުން އިންޑިއާގައި އުފައްދާފައިވާ ބަނގުރާ ވިއްކުމުގެ ސަބަބުން މީހަކު މަރުވެއްޖެ ނަމަ، ބަނގުރާ އުފެއްދި މީހާއަށާއި ވިއްކި މީހާއަށް މަރުގެ އަދަބު ދެވޭނެ އެވެ.
ބިހާރަކީ ބަނގުރާ މަނާކުރި އިންޑިއާގެ ހަތަރު ވަނަ ސްޓޭޓެވެ. އިންޑިއާގައި ބަނގުރާ މަނާކުރާ މައިގަނޑު އެއް ސަބަބަކީ ބަނގުރާ ބޮއިގެން ތިބޭ މީހުން އަންހެނުންނަށް އަނިޔާ ކުރުމެވެ. (އަލްޖަޒީރާ)