06 Apr 2016, 16:10
ބާލިކާ ވަދޫގައި "އަނަންދީ" ގެ ރޯލުން ބެލުންތެރިންގެ މަގުބޫލުކަން ހޯދި ޓީވީ އެކްޓްރެސް ޕްރިތިޔޫޝާ ބެނާޖީ ދަންޖެހިގެން މަރުވެފައި ވަނީ މި މަހުގެ ފުރަތަމަ ދުވަހު އެވެ.
އުމުރުން 24 އަހަރުގެ ޕްރިތިޔޫޝާ ދަން ޖެހިފައިވަނީ އޭނާ ދިރިއުޅެމުން ދިޔަ ގޭގެ ސިޓިން ރޫމުގައި ހުރި ފަންކަލެއްގަ އެވެ. އަދި މަރުވެފައި ވަނީ ހޮސްޕިޓަލަށް ގެންދިއުމުގެ މަގުމަތީގައި ކަމަށް ހަބަރުތައް ބުނެ އެވެ.
މައްސަލަ ތަހުގީގު ކުރަން ފެށުމަށްފަހު އެންމެ ފުރަތަމަ ފުލުހުން ބުނީ ޕްރިތިޔޫޝާ ދަންޖެހިފައި ވަނީ އަމިއްލައަށް ކަމަށް ބެލެވޭ ކަމަށެވެ. ނަމަވެސް މިހާރު ތަހުގީގު ވަނީ އެހެން ގޮތަކަށް ފުރޮޅިފަ އެވެ.
ބޮލީވުޑު ހަބަރުތައް ބުނާގޮތުން ޕްރިތިޔޫޝާގެ މަރާ ގުޅިގެން ތުހުމަތުގެ އިނގިލި މިހާރު އަމާޒުވެފައި ވަނީ އޭނާގެ ލޯބިވެރިޔާ ރާހުލް ރާޖް ސިންހް އަށެވެ. އެގޮތުން ޕްރިތިޔޫޝާގެ މަންމަ ވަނީ ރާހުލްއާ ދެކޮޅަށް ފުލުހުންނަށް މައްސަލައެއް ހުށަހަޅާފަ އެވެ.
ރާހުލްގެ މައްޗަށް ތުހުމަތު ކުރެވިފައި ވަނީ ޕްރިތިޔޫޝާ ދަން ޖެއްސުމުގައި އެހީތެރިވި ކަމުގެ ތުހުމަތާއި، އަނިޔާ ކުރުމާ ބިރުދެއްކުމުގެ ތުހުމަތެވެ. ޕްރިތިޔޫޝާގެ އާއިލާ އަދި އެކުވެރިން ގުޅިގެން ބޭއްވި ޕްރެސް ކޮންފަރެންސެއްގައި ބުނެފައި ވަނީ ރާހުލް އާއެކީގައި ޕްރިތިޔޫޝާ އުޅުނީ ހަމަޖެހިގެން ނޫން ކަމަށެވެ.
ނަމަވެސް ރާހުލްގެ ދިފާއީ ވަކީލް، ނީރަޖް ގުޕްތާ ވަނީ އާއިލާގެ ތުހުމަތުތައް ދޮގުކޮށްފަ އެވެ. އޭނާ ބުނީ ޕްރިތިޔޫޝާގެ ކުއްލި މަރުގެ ސަބަބުން ރާހުލް އަށް ވަރަށް ބޮޑު ޝޮކެއް ލިބިފައިވާ ކަމަށާއި މެޔަށް ތަދުވާތީ އާދީއްތަ ދުވަހުން ފެށިގެން ރާހުލް އޮތީ ހޮސްޕިޓަލުގައި ކަމަށެވެ.
އަދި ޕްރިތިޔޫޝާ މަރުވުމުގެ ސަބަބުން ރާހުލް އަށް ވަރަށް ފުން ހިތާމައެއް ލިބިފައިވާ ކަމަށާއި، އޭނާ މިވަގުތު އޮތީ ފުލުހުންގެ ތަހުގީގަށް އެއްވެސް މައުލޫމާތެއް ދެވޭފަދަ ހާލުގައި ނޫން ކަމަށްވެސް ވަކީލް ވަނީ ބުނެފަ އެވެ.
"ކޯޓަށް ދާނަން. ޕްރިތިޔޫޝާގެ އާއިލާއިން ހުށަހެޅި ރިޕޯޓު ބަލަން ބޭނުން،" ވަކީލު ބުނެފައިވެ އެވެ.
ދެހާސް އަށްވަނަ އަހަރު ކަލާރސް ޓީވީ އިން ދައްކަން ފެށި ބާލިކާ ވަދޫ އިން އެކްޓިންގ ކެރިއަރު ފެށި ޕްރިތިޔޫޝާ އެންމެ ފަހުން ފެނިގެން ގޮސްފައި ވަނީ އޭނާގެ ލޯބިވެރިޔާ ރާހުލް އާއެކު، ރިއަލިޓީ ޝޯވ އެއް ކަމުގައިވާ "ޕަވަރ ކަޕްލް" އިންނެވެ.
ބާލިކާ ވަދޫއަށް ފަހު ޕްރިތިޔޫޝާ ވަނީ ޑާންސް ޝޯވ "ޖަލަކް ދިކްލާޖާ 5" ގައިވެސް ބައިވެރިވެފަ އެވެ. އަދި "ބިގް ބޮސް 7" ގައިވެސް އޭނާ ވަނީ ބައިވެރިވެފަ އެވެ.