12 Apr 2016, 10:04
ތ. އަތޮޅު (ކޮޅުމަޑުލު) ކައުންސިލުގެ ވޮލީބޯޅަ މުބާރާތުގެ އަންހެން ޑިވިޝަނުގެ ފައިނަލުގައި މަޑިފުށި ބަލިކޮށް، ދިޔަމިގިލި ޗެމްޕިއަންކަން ހޯދައިފި އެވެ.
އަމިއްލަ ރަށުގައި އިއްޔެ ހަވީރު ކުޅުނު އެ މެޗުގައި މަޑިފުށި އަތުން ދިޔަމިގިލި މޮޅުވީ 2-1 ސެޓުންނެވެ.
ތިން ސެޓު ކުޅެ، އެ ނަތީޖާއިން ދިޔަމިގިލި މޮޅުވި ކަމަށް ރެފްރީ ނިންމީ، ރެފްރީގެ ނިންމުންތަކާ ހިތްހަމަނުޖެހިގެން މަޑިފުށި ސަޕޯޓަރުން އެ ޓީމަށް ދަނޑުން ފައިބަން އެންގުމާއެކު މަޑިފުށި ޓީމު ދަނޑުން ފޭބުމުންނެވެ. މެޗަށްފަހު ހަމަނުޖެހުމެއް ހިނގާފައިވެ އެވެ.
މެޗުގެ ފުރަތަމަ ސެޓު 25-19 އިން މަޑިފުށި ގެންދިޔަ ނަމަވެސް، ދެވަނަ ސެޓާއި ތިންވަނަ ސެޓު ގެންދިޔައީ ދިޔަމިގިލިންނެވެ. އެ ޓީމުން އެ ސުޓުތައް ގެންދިޔައީ 25-16 އަދި 25-17 އިންނެވެ. މަޑިފުށި ޓީމު ދަނޑުން ފޭބީ، އެ މެޗުގެ ހަތަރު ވަނަ ސެޓު 23-18 އިން ދިޔަމިގިލި ކުރީގައި އޮއްވަ އެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ދިޔަމިގިލި ޓީމުގެ ބިދޭސީ ކުޅުންތެރިޔާ ދިނޭޝާ ޕަރަސަދާނީ އެވެ.
އަންހެން ޑިވިޝަނުގެ ފައިނަލް މެޗަށްފަހު ވަނަވަނައަށް ހޮވުނު ކުޅުންތެރިންނާއި ޓީމުތަކަށް ތަށްޓާއި، މެޑަލާއި، އިނާމު އަދި ހަނދާނީ ލިޔުން ހަވާލުކޮށްފައިވެ އެވެ.
އެ މުބާރާތުގެ އަންހެން ޑިވިޝަނުގެ އެންމެ މޮޅު ސާވަރަކަށް ދިޔަމިގިލި ޓީމުގެ ރާޝިދާ އަލީ ހޮވުނު އިރު، އެންމެ މޮޅު ސެޓަރަކަށް ހޮވުނީ މަޑިފުށީގެ މަރިޔަމް ނާސިރާ އެވެ. އެންމެ މޮޅު ސްޕައިކަރަކަށް ދިޔަމިގިލީގެ ބިދޭސީ ކުޅުންތެރިޔާ ދިނޭޝާ ޕްރަސަދާނީ ހޮވުނު އިރު، އެންމެ މޮޅު ޑިގަރަކަށް ހޮވުނީ މަޑިފުށީގެ ހައްވާ ރާޝިދާ އެވެ. އެންމެ މޮޅު ބްލޮކަރަކަށް ވެސް ހޮވުނީ ރާޝިދާ އެވެ.
މުބާރާތުގެ ފެއާ ޕްލޭ ކުޅުންތެރިޔަކަށް ދިޔަމިގިލީގެ އައިސަތު ޝައްފަ ހޮވުނު އިރު، ޓީމަށް އެންމެ ފައިދާ ހޯދައިދިން ކޯޗަކަށް ހޮވުނީ ދިޔަމިގިލީގެ ކޯޗު އިބްރާހިމް ރަޝީދު (ސަތޯ) އެވެ. އަންހެން ޑިވިޝަނުގެ އެންމެ މޮޅު ކުޅުންތެރިޔަކަށް ދިޔަމިގިލީގެ ދިނޭޝާ ޕްރަސަދާނީ ހޮވުނުއިރު، ނަވާރަ އަހަރުން ދަށުގެ އެންމެ މޮޅު ކުޅުންތެރިޔަކަށް ހޮވުނީ ދިޔަމިގިލީގެ ފާތިމަތު ރީޝާ އެވެ. އަންހެން ޑިވިޝަނުގެ ފެއާ ޕްލޭ ޓީމަކަށް ވިލުފުށި ހޮވުނު އިރު، ރަނަރަޕް ޓީމަކަށް ހޮވުނީ މަޑިފުށި ޓީމެވެ.
އެ މުބާރާތުގެ ފިރިހެން ޑިވިޝަނުގެ ފައިނަލް މިއަދު ކުރިއަށްދާނެ އެވެ. ފިރިހެން ޑިވިޝަނުގެ ފައިނަލުގައި ބައްދަލުކުރާނީ ހިރިލަންދޫ އާއި ވިލުފުށްޓެވެ.