13 Apr 2016, 15:04
އިބްރާހީމް ނާސިރު އިންޓަނޭޝަނަލް އެއާޕޯޓް (އައިއެންއައިއޭ)ގައި މިދިޔަ އަހަރުގެ މާޗު މަހު މުޒާހަރާ ކުރި މީހުންގެ މައްޗަށް، އަމުރަށް ނުކިޔަމަންތެރިވުމުގެ ދައުވާ ސާބިތުވެ، ތިން މަހަށް ޖަލަށްލުމަށް ކުރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފުކޮށްފި އެވެ.
ކްރިމިނަލް ކޯޓުން ކުރި ހުކުމްގައި ބުނެފައި ވަނީ އެ މީހުންގެ މައްޗަށް އެ ހުކުމް ތަންފީޒު ކުރަން ފަށާނީ ތިން އަހަރު ފަހުން ކަމަށެވެ. ހުކުމް ތަންފީޒު ކުރަން ފެށުމުގެ ކުރިން ކުށެއްކޮށްފިނަމަ ޖަލަށްލެވޭނެ ކަމަށް ހުކުމްގައި ބުނެފައިވެ އެވެ.
ޖުމްލަ 15 މީހެއްގެ މައްޗަށް އެއާޕޯޓުގައި މުޒާހަރާކޮށްގެން އުފުލި ދައުވާގައި ބުނެފައިވަނީ މިދިޔަ މާރިޗު މަހުގެ ފަސް ވަނަ ދުވަހު އިބްރާހީމް ނާސިރު އިންޓަނޭޝަނަލް އެއާޕޯޓުގެ އިންޓަނޭޝަނަލް ޓާމިނަލްގެ ޑިޕާޗާ ހޯލް ކުރިމައްޗަށް ރައީސް ނަޝީދުގެ ޕޯސްޓަރުތައް ހިފައިގެން އެއްވެ ރައީސް ނަޝީދު މިނިވަންކުރުމަށް ގޮވާލާފައިވާތީ ކަމަށެވެ.
އެމީހުންގެ މައްޗަށް އެ ދައުވާ އުފުލާފައި ވަނީ ސުލްހަވެރިކަމާ އެކު އެއްވެއުޅުމުގެ މިނިވަންކަމުގެ ގާނޫނުގެ 24 ވަނަ މާއްދާގެ ހަތް ވަނަ ނަންބަރާ ހަވާލާދީ ގާނޫނުލް އުގޫބާތުގެ 88 ވަނަ މާއްދާގެ (ހ) ގެ ދަށުންނެވެ.
ޝަރީއަތަށްފަހު މުޒާހަރާ ކުރި މީހުން ޖަސްޓިސް ބިލްޑިންގްގެ ބޭރުގައި --- ސަން ފޮޓޯ/ އަލީ ނަސީރު
އެމައްސަލަ ހައިކޯޓުގައި އިސްތިއުނާފު ކުރި ފާހަގަކޮށްފައިވާ ނުކުތާތަކުގައި ބުނެފައިވަނީ މައްސަލާގައި ހުކުމް ކުރި އިރުވެސް ދައުވާ ސާފުނުވާ ކަމަށެވެ. އަދި ދައުލަތުން ދައުވާކޮށްފައިވަނީ އެއްވުމުގެ ގާނޫނާ ހިލާފުވެގެން މުޒާހަރާކޮށްފައިވާތީ ކަމަށް ބުނެ ކަމަށާއި މުޒާހަރާ ކުރުމަކީ ގާނޫނުގައި ކުށެއް ކަމަށް ބަޔާންކޮށްފައި އޮތް ކަމެއް ނޫން ކަމަށެވެ.
މުޒާހަރާކުރުމަށް އެމީހުން އެއާޕޯޓަށް އެއްވިކަމަށް ބުނެފައިވާއިރު ކަނޑައެޅިގެން އެއްވިތަން ފެނުނު ދެ ހެކިންގެ ހެކިބަސް ދައުވާ ސާބިތުކުރުމަށް ހުށަހަޅާފައި ނުވާކަމަށް މައްސަލަ އިސްތިއުނާފު ކުރަމުން ވަނީ ބުނެފަ އެވެ.
ތިން މަހަށް ޖަލަށްލުމަށް ހުކުމްކުރި މީހުން
- މާލޭ ސިޓީގެ ޑެޕިއުޓީ މޭޔަރު، ޝިފާ މުހައްމަދު
- ޏ. ފުވައްމުލައް، މިސްކިތްމަގު، ދޯނާޑު، ޒަހުރާ މޫސާ
- މ. ނިވްހިލްމަން، ޝަމީމާ އާދަމްފުޅު
- ހ. ވެޔޮވިލާ، ޝަފިއްއާ ޒުބައިރު
- މއ. ނާރިނގުގޭ، މުހައްމަދު އިބްރާހީމް މަނިކު
- ސ. ހުޅުދޫ ކަޅުމަގިގޭ، މަރިޔަމް ޒުބައިރު
- ސ. ހިތަދޫ ޝެޑިއުލަސް، ޚަދީޖާ ޝާދިޔާ
- މާލޭ ދަފްތަރު 5866 ފާތިމަތު ރަޝީދު
- ހ. ޓިވެގާލައިޓް، ފަރީޝާ އަހްމަދު
- މ. ތަންތާރަ، އާމިނަތު ޒިމްނާ
- ގ. އާކާޝްވިލާ، އާމިނަތު ޒާހިރާ
- ގ. ދުވާފަރު، އާއިޝަތު މަމްދޫހާ
- މއ. ބީޗްހައުސް، އާމިނަތު ދުމައިނާ އިރުޝާދު
- މ. ފެހިފަތް، ޔުމްނާ
އެމްޑީޕީން އިބްރާހީމް ނާސިރު އިންޓަނޭޝަނަލް އެއާޕޯޓުގައި މުޒާހަރާ ކުރަނީ ---- ފޮޓޯ/ އެމްޑީޕީ
ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގައި ވާގޮތުން ގާނޫނު މަނާކުރާ ތަނަކަށް އެއްވެވޭނީ ފުލުހުންގެ ހުއްދަ ލިބިގެނެނެވެ. އެއާޕޯޓުގައި މުޒާހަރާ ކުރި މީހުން އެތަނަށް އެއްވީ ފުލުހުންގެ ހުއްދަ ލިބިގެންކަން ދައްކުވައިދޭ އެއްވެސް އެއްޗެއް ހެކިންގެ ހެކިބަހުންވެސް އެނގެން ނެތް ކަމަށް ކްރިމިނަލް ކޯޓުން ކުރި ހުކުމުގައި ވަނީ ބުނެފަ އެވެ. އަދި ދައުލަތުން ހުށަހެޅި ހެކިންގެ ހެކިބަސް ނަފީ ކުރެވޭނެ ފަދަ ދިފާއީ އެއްވެސް ހެއްކެއް ހުށަހެޅިފައި ނުވާ ކަމަށް ހުކުމުގައިވެ އެވެ.
އެއާޕޯޓުގައި މުޒާހަރާ ކުރި މީހުން ތިންމަސް ދުވަހަށް ޖަލަށްލާން ހުކުމް ކޮށްފައިވަނީ ކުރީގެ ގާނޫނުލްއުގޫބާތުގެ 88 ވަނަ މާއްދާގެ (ހ) ގެ ދަށުންނެވެ. ނަމަވެސް މިހާރުގެ ގާނޫނުލްއުގޫބާތުގައި ލުއި އަދަބެއް ކަނޑައަޅާފައިވާތީ ކުރީގެ ގާނޫނުލްއުގޫބާތުގައި ބުނާ ހަމަސް ދުވަހުގެ ޖަލު ހުކުމް ތިން މަސް ދުވަހަށް ކުޑަކުރީ ކަމަށް ގާޒީ ވިދާޅުވި އެވެ