17 Apr 2016, 13:42
ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ މައިލޯ ކްލަބު މޯލްޑިވްސް ކަޕްގެ އަންހެން ބައި، 18/30 ވިމެންސް ފުޓްސަލް ފިއެސްޓާގެ ސެމީ ފައިނަލުގެ މެޗުތައް މާދަމާ ކުޅެވޭނެ އެވެ.
ސެމީގައި އެއްކޮޅުން ކްލަބު އިމިގްރޭޝަންއާ ދެކޮޅަށް ޕޮލިސް ކްލަބު ނުކުންނަ އިރު، ޓީމު ފެނެކައާ ދެކޮޅަށް އެމްއޭސީއެލް ނުކުންނާނެ އެވެ. ސެމީގެ މެޗުތައް ފަށާނީ މާދަމާ ރޭ 8:30 ގައެވެ.
ކުއާޓާ ފައިނަލުގައި ޕޮލިސް ކްލަބާއި ދިވެހި ސިފައިންގެ ކްލަބު ބައްދަލުކުރި މެޗުގެ ތެރެއިން: ސެމީގައި އެއްކޮޅުން ކްލަބު އިމިގްރޭޝަންއާ ދެކޮޅަށް ޕޮލިސް ކްލަބު ނުކުންނަ އިރު، ޓީމު ފެނެކައާ ދެކޮޅަށް އެމްއޭސީއެލް ނުކުންނާނެ --- ސަން ފޮޓޯ/ އަލީ ރިފްޝާން
ޓްރެފިކް ޕޮލިސް ކުރިމަތީ އޮންނަ މާފަންނު ސްޓޭޑިއަމް ވެލިދަނޑުގައި ކުރިއަށްދާ އެ މުބާރާތުގެ ސެމީއަށް އިމިގްރޭޝަން އާއި، ޕޮލިސް ކްލަބާއި، ފެނަކަ އަދި އެމްއޭސީއެލް ދަތުރުކޮށްފައިވަނީ މިދިޔަ ހުކުރު ދުވަހު ކުޅުނު ކުއާޓާ ފައިނަލުގެ މެޗުތަކުން މޮޅުވެގެންނެވެ.
ސެމީއަށް ޕޮލިސް ކްލަބު ދަތުރުކުރީ ކުއާޓާގެ ފުރަތަމަ މެޗުގައި ދިވެހި ސިފައިންގެ ކްލަބު (ޑީއެސްސީ) އަތުން 3-1 ލަނޑުން މޮޅުވެގެންނެވެ. ސެމީއަށް އިމިގްރޭޝަން ދަތުރުކުރީ ފަސޭހަކަމާއެކު އެސްޓީއޯ އަތުން 3-0 ލަނޑުން މޮޅުވެގެންނެވެ.
ކުއާޓާ ފައިނަލުގައި ޕޮލިސް ކްލަބާއި ދިވެހި ސިފައިންގެ ކްލަބު ބައްދަލުކުރި މެޗުގެ ތެރެއިން: ސެމީގައި އެއްކޮޅުން ކްލަބު އިމިގްރޭޝަންއާ ދެކޮޅަށް ޕޮލިސް ކްލަބު ނުކުންނަ އިރު، ޓީމު ފެނެކައާ ދެކޮޅަށް އެމްއޭސީއެލް ނުކުންނާނެ --- ސަން ފޮޓޯ/ އަލީ ރިފްޝާން
އެ މުބާރާތުގެ ސެމީގެ ޖާގައެއް ފެނަކަ ހޯދީ ފަސޭހަކަމާއެކު 9-0 ލަނޑުން ޓީމް އައިޖީއެމްއެޗް އަތުން މޮޅުވެގެންނެވެ. އަދި ސެމީއަށް އެމްއޭސީއެލް ދިޔައީ 2-2 ލަނޑުން އެމްޕީއެލް އަތުން އެއްވަރުވުމުން، ޕެނަލްޓީގައި 3-2 ލަނޑުން މޮޅުވެގެންނެވެ.
މުބާރާތުގެ ފައިނަލުގައި ވާދަކުރާނީ ސެމީ ފައިނަލުގެ ފުރަތަމަ މެޗުން މޮޅުވާ ޓީމާއި، ސެމީގެ ދެވަނަ މެޗުން މޮޅުވާ ޓީމެވެ. ފައިނަލް މެޗު ކުޅުމަށް ހަމަޖެހިފައިވަނީ އަންނަ ހުކުރު ދުވަހު އެވެ.