22 Apr 2016, 20:41
ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ ކްލަބު މޯލްޑްވިސް ކަޕުގެ ފިރިހެން ބައިގެ ފައިނަލަށް ބޭންކް އޮފް މޯލްޑްވިސް (ބީއެމްއެލް) އާއި މޯލްޑްވިސް ރޯޑް ޑިވޮލެޕްމެންޓް ކޯޕަރޭޝަން (އެމްއާރުޑީސީ) ދަތުރުކޮށްފި އެވެ.
ބީއެމްއެލް ފައިނަލްގެ ޖާގައެއް ކަށަވަރު ކުރީ ސެމީ ފައިނަލުގައި މޯލްޑިވިއަންއާ ބައްދަލުކޮށް ޕެނަލްޓީ ޖަހައިގެންނެވެ. މޯލްޑިވިއަންގެ ހުސެން އަލީ އާއި ހަމްޒާ މުހައްމަދު ކާމިޔާބުކޮށްދިން ދެ ގޯލުން އެ ޓީމް ކުރީގައި ވަނިކޮށް ފަހު ވަގުތު އެމްއާރުޑީސީން ވަނީ ދެ ގޯލު ކާމިޔާބުކޮށް މެޗުގެ ނަތީޖާ އެއްވަރުކޮށްފަ އެވެ. އެމްއާރުޑީސީ ދެ ގޯލުގެ ތެރެއިން ފުރަތަމަ ގޯލު އިޝާން އިބްރާހިމް ކާމިޔާބުކޮށްދިން އިރު ދެ ވަނަ ގޯލު ކާމިޔާބު ކޮށްދިނީ އިބްރާހިމް ހަމްދާނެވެ.
ފުރިހަމަ ވަގުތު ހަމަވިއިރު 2-2ގެ ނަތީޖާ އަކުން ދެ ޓީމް އެއްވަރުވެފައިވުމުން ނަތީޖާ ނެރެން ޖެހި ޕަނަލްޓީގެ ތެރެއިން ތިން ޕެނަލްޓީ ބީއެމްއެލް އިން ކާމިޔާބު ކުރި އިރު މޯލްޑިވިއަންއަށް ކާމިޔާބު ކުރެވުނީ އެންމެ ޕެނަލްޓީއެކެވެ.
އެ މުބާރާތުގެ ފައިނަލަށް އެމްއާރުޑީސީ ވެސް ދަތުރު ކުރީ ޕެނަލްޓީ ޖަހައިގެން ކުރި ހޯދައިގެންނެވެ. ފޯރި ގަދަ ކުޅުމެއް ފެނިގެން ދިޔަ އެ މެޗުގެ ކުރީ ކޮޅުގައި އަބްދުﷲ ޝާފިއުގެ ގޯލުން އެމްއާރުޑީސީ ލީޑް ނަގާފައި ވަނިކޮށް ފެނަކައިން ވަނީ ފަހަތުން އަރައި ދެ ގޯލު ކާމިޔާބުކޮށް އެމްއާރުޑީސީ ހާސްކޮށްލާފަ އެވެ. އެ ޓީމަށް ލަނޑުތަށް ކާމިޔާބު ކޮށްދިނީ ސަފްވާން ރަމްޒީ (ސޮއްޕެ) އާއީ އަބްދުﷲ ޝައްފާން އެވެ. ފެނަކައިން ލީޑު ނަގާފައި ވަނިކޮށް އެމްއާރުޑީސީ އަށް އެއްވަރު ކޮށްދިނީ އަލީ ނާފިއު އެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމް އެއްވަރުވެފައިވުމުން ނަތީޖާ ނެރެން ޖެހި ޕެނަލްޓީގެ ތެރެއިން ތިން ޕެނަލްޓީ ކާމިޔާބުކޮށް އެމްއާރުޑީސީން ވަނީ ފައިނަލަށް ދަތުރުކޮށްފަ އެވެ. ފެނަކައަށް ކާމިޔާބް ކުރެވިފައި ވަނީ ދެ ޕެނަލްޓީ އެވެ.
ދެ ޑިވިޝަނަށް ބަހާލައިގެން ކުރިއަށް ގެންދާ ކުލަބް މޯލްޑިވްސް ކަޕްގައި އެމްއާރުޑީސީ އާއި ބީއެމްއެލް ބައްދަލުކުރާ ފައިނަލް މެޗު އޮންނާނީ އަންނަ ހޯމަ ދުވަހުގެ ރޭ 9:00 ޖަހާއިރު މާފަންނު ސްޓޭޑިއަމްގެ ވެލިދަނޑުގަ އެވެ.
ކްލަބު މޯލްޑިވްސް ކަޕްގެ އަންހެން ބައި، 18/30 ވިމެންސް ފުޓްސަލް ފިއެސްޓާގެ ފައިނަލުގައި ކްލަބު އިމިގްރޭޝަނާއި ޓީމު ފެނަކަ ބައްދަލުކުރާ އިރު އެ މެޗު އޮންނާނީ އާދިއްތަ ދުވަހުގެ ރޭ 9:00 ޖަހާއިރު މާފަންނު ސްޓޭޑިއަމްގެ ވެލިދަނޑުގައެވެ.