26 Apr 2016, 10:26
ރިޔާޒް (އެޕްރީލް 26) : ސައޫދީ އަރަބިޔާ މިހާރު ވަނީ ތެލުން ލިބޭ މުއްސަނދިކަމަށް "އެޑިކްޓް" ވެފައި ކަމަށާ މިޙާލަތު ބަދަލުކޮށްލައްވާނެ ކަމަށް އެގައުމުގެ ބާރުގަދަ މީހާގެ ގޮތުގައި ސިފަކުރެވޭ ޒުވާން އަމީރު މުހައްމަދު ބިން ސަލްމާން ވިދާޅުވެއްޖެ އެވެ.
އުމުރުން 30 އަހަރުގެ މުހައްމަދު ބިން ސަލްމާނަކީ ސައޫދީ ރަސްގެފާނު ސަލްމާން ބިން އަބްދުލްއަޒީޒުގެ ދަރިކަލުންގެ ތެރެއިން އޭނާ އެންމެ ބޮޑަށް ލޯބިވާ ދަރިކަލުން ކަމަށްވެ އެވެ. މުހައްމަދު ބިން ސަލްމާން އަދާކުރައްވާ މަގާމުތަކުގެ ތެރޭގައި ވަލީއުލްއަހްދުގެ ނައިބު ކަމާއި ދިފާއީ ވަޒީރުކަމާ އަދި ސައޫދީ ވިޔަފާރިއާއި އިގްތިސާދާއި އިންވެސްޓްމަންޓްތަކާ ބެހޭ އެންމެހާ ކަންތައްތައް ރާވައި ހިންގާ އިސް ކޮމިޓީގެ ވެރިކަން ވެސް ހިމެނެ އެވެ. މުހައްމަދު ބިން ސަލްމާން އިއްޔެ ވަނީ ސައޫދީ އަރަބިޔާއަކީ ތެލުގެ އާމްދަނީއަށް ބަރޯސާވާ ގައުމަކުން ތެޔޮނޫން ތަފާތު އިންވެސްޓްމަންޓްތަކާއި ސެކްޓަރުތަށް ހިމެނޭ އިގްތިސާދަކަށް ބަދަލުކޮށްލުމަށް އޭނާގެ ބެލުމުގެ ދަށުން އެކުލަވާލި ޕްލޭން ނެރުއްވާފަ އެވެ.
"ސައޫދީ ވިޝަން 2030" ގެނަމުން ނަންދެވިފައިވާ މިޕްލޭން ބިނާކޮށްފައި ވަނީ ދުބާއިފަދަ ސިނާއަތާއި ޒަމާނީ ވިޔަފާރީގެ މަރުކަޒަކަށް ބަދަލުކޮށްލުމުގެ މައްޗަށެވެ. މިޕްލޭންގެ ދަށުން މައްކާއާއި މަދީނާގެ ހަރަމްފުޅުތައް ވެސް މިހާރަށް ވުރެ ތިންގުނަ އިތުރަށް ބޮޑުކޮށް ފުޅާކޮށް 30 މިލިޔަން މީހުންނަށް އެއްފަހަރާ ހައްޖުގެ އަޅުކަން އަދާކުރެވޭ މިންވަރަށް މައްކާއާއި މަދީނާ ޒަމާނީ ހުރިހާ ވަސީލަތްތަކާ އެކު ތަރައްގީ ކުރުން ހިމެނެ އެވެ.
މިހާރު މައްކާގެ ހަރަމްފުޅު ބޮޑުކުރަނީ އަށް މިލިޔަން މީހުންނަށް އެއްފަހަރާ ހައްޖުގެ އަޅުކަން އަދާކުރެވޭމިންވަރަށެވެ. "ސައޫދީ ވިޝަން 2030" ގެ ދަށުން ކުރިޔަށްއޮތް 14 ވަރަކަށް އަހަރު ތެރޭގައި ދެހަރަމްފުޅު ގެ ސަރަހައްދު ވަރަށް ބޮޑަށް ފުޅާކޮށް ހައްޖާއި އުމުރާއިން ސައޫދީ އަށް ލިބޭ އާމްދަނީ ހަތަރު ގުނައަށް އިތުރުކުރުމަށް ވަނީ ރާވާފަ އެވެ. އަދި ސައޫދީ އަރަބިޔާގެ މުޖްތަމައު ދުނިޔެއަށް ވަރަށް ބޮޑަށް ހުޅުވާލައި ސައޫދީ އަންހެން ވެސް ފިރިހެނުންނެކޭ އެއްގޮތަށް މަސައްކަތުގެ މައިދާނަށް ނެރުން ހިމެނެ އެވެ.
މިގޮތުން ސައޫދީ އަރަބިޔާގައި ދިގުމުއްދަތަކަށް ވަޒަންވެރިވެގެން ތިބުމުގެ ފުރްސަތު މުސްލިމުންނަށާއި ޣައިރު މުސްލިމުންނަށް ވެސް ދިނުމާއި މުޅި ގައުމުގައި ފަތުރުވެރިކަން ފުޅާކުރުމާއި ދަނޑުވެރިކަން ވެސް ވަރަށްބޮޑަށް ތަރައްގީކުރުން ވެސް ހިމެނެއެވެ. މީގެއިތުރުން އެމެރިކާ އާއި ޔޫރަޕުން މިހާރު ގަންނަމުންދާ ބިލިޔަން ބިލިޔަން ޑޮލަރުގެ ހަތިޔާރު ގަތުމުގެ ބަދަލުގައި އަމިއްލަ ޓެކްނޮލޮޖީގައި ހަތިޔާރު އުފެއްދުމުގެ ވަރުގަދަ ސިނާއަތެއް ފެށުންވެސް ސައޫދީ ވިޝަން 2030"ގައި ހިމެނެއެވެ.
ސައޫދީ ވަޒީރުންގެ މަޖިލީހުން އިއްޔެވަނީ މި ވިޝަންއާއި އޭގައި ހިމެނޭ ހުރިހާ ޕްލޭންތަކެއް ފާސްކޮށްފަ އެވެ. މި ޕްލޭން އިޢްލާންކުރައްވަމުން މިޕްލޭންގެ ފަހަތުގައި ހުންނެވި ސައޫދީ ރަސްގެފާނުގެ ޒުވާން ދަރިކަލުން މުހައްމަދު ބިން ސަލްމާން ވިދާޅުވީ މި ޕްލޭން ތަންފީޒުކުރަން ފެށުމާ އެކު ސައޫދީ މުއްސަނދިންނާއި ޝާހީ އާއިލާތަކުގެ މެންބަރުންނަށް ކަރަންޓާއި ފެނާއި އެނޫން ވެސް ޚިދްމަތްތަކަށް ސަރުކާރުންދޭ އެއްވެސް ސަބްސިޑީއެއް ނުލިބޭނެ ކަމަށާ ސަބްސިޑީ ދެން ލިބޭނީ ސައޫދީ މުޖްތަމައުގައި ހިމެނޭ ފަގީރުންނާއި މެދުފަންތީގެ މީހުންނަށް އެކަނި ކަމުގަ އެވެ. މިކަމާދެކޮޅު ހަދާކޮންމެ މީހަކު ވެސް ކުރިމަތިލާން ޖެހޭނީ ރައްޔިތުންނާ ކަމަށް ވެސް މުހައްމަދު ބިން ސަލްމާން ވިދާޅުވި އެވެ.
މުހައްމަދު ބިން ސަލްމާން ވިދާޅުވީ ސައޫދީ ޝާހީއާއިލާގެ މެންބަރުންނާއި މުއްސަނދިންނާ އަދި އާންމުކޮށް މުޅި ރައްޔިތުން ވެސް ތެލުގެ އާވާގައި ޖެހިފައިވުމުން ސަލާމަތްވެ މުލި ގައުމު ހޭލަންވެއްޖެ ކަމަށާ މުއްސަނދިކަމާއި ތަނަވަސްކަން ދެމެހެއްޓޭނީ އަމިއްލައަށް މަސައްކަތްކޮށްގެން ހޯދާ އާމްދަނީން ކަމުގަ އެވެ. ތެލުގެ އާމްދަނީއަކީ ބިލާހެއްކަމަށާ އެއީ ވަގުތުކޮޅެއްގެ ކަމެއްކަމަށް ވެސް މުހައްމަދު ބިން ސަލްމާން ވިދާޅުވި އެވެ. އޭނާ އިތުރަށް ވިދާޅުވީ ސައޫދީ އަރަބިޔާގެ މުއައްސިސް ކިންގް އަބްދުލްއަޒީޒްއާއި އޭނާގެ ޓީމުން ސައޫދީ އަރަބިޔާގެ ދައުލަތް އުފައްދައި އަދި އެދައުލަތް ހިންގައި ބާރުގަދަކޮށްފައި ވަނީ ތެލުގެ އާމްދަނީން ނޫންކަމަށާ ކާބަފައިން އުޅުނު ހީވާގި ދިރިއުޅުން އަލުން އިޢާދަކުރަން ޖެހިފައިވާ ކަމުގަ އެވެ. ސައޫދީ އަރަބިޔާގެ ދައުލަތުގެ ބާނީ އަދި މުއައްސިސް ކިންގް އަބްދުލްއަޒީޒްއަކީ އެގައުމުގެ މިހާރުގެ ރަސްގެފާނު ސަލްމާން ބިން އަބްދުލްއަޒީޒްގެ ބައްޕާފުޅެވެ. އަދި އޭނާއަކީ މުހައްމަދު ބިން ސަލްމާން ގެ ކާފާފުޅެވެ.
ސައޫދީ ވިޝަން 2030"ގެ ފަށުން ތެލާއި ނުލައި ސައޫދީ އިގްތިސާދު ދެމެހެއްޓުމަށް ދޭއް ޕޮއިންޓް ފަހެއް ޓްރިލިޔަން އެމެރިކާ ޑޮލަރުގެ ސޮވެރިން ފަންޑެއް ސައޫދީގައި ގާއިމްކުރާނެ އެވެ. މިފަންޑުން ދުނިޔޭގެ ކަންކޮޅުތަކުގައި އިންވެސްޓްމަންޓްތައްކޮށް ގެން ތެލާ އެއްވަރުގެ ބޮޑުއާމްދަނީއެއް ހޯދޭނެ ކަމަށް މުހައްމަދު ބިން ސަލްމާން ވިދާޅުވި އެވެ. މުޅި ދުނިޔޭގެ ހުރިހާ ގައުމަކުން ކުރާ އިންވެސްޓްމަންޓްތަކުގެ ތެރެއިން މަދުވެގެން 10 އިންސައްތަ އިންވެސްޓްމެންޓްތައް ކުރުމުގެ ގާބިލްކަން މި ސޮވެރިން ފަންޑަށް ލިބިގެންދާނެކަމަށް ވެސް އޭނާ ވިދާޅުވި އެވެ.
މުހައްމަދު ބިން ސަލްމާން އިތުރަށް ވިދާޅުވީ ސައޫދީ ވިޝަން 2030"ގެ ޕްލޭންތަކާ އެއްގޮތަށް ސައޫދީ އިގްތިސާދު އިސްލާހް ކުރުމުގެ މަސައްކަތް ނުކުރެވިއްޖެ ނަމަ 2017 ވަނަ އަހަރާ ހަމައަށްދާ އިރު ސައޫދީ އަރަބިޔާ އިގްތިސާދީ ގޮތުން އިނދަޖެހި ބޭންކްރަޕްޓް (އިފްލާސް) ވާނެ ކަމަށާއި ނަމަވެސް ވިޝަން 2030" އިން ސައޫދީ އިގްތިސާދު ތެލަށް އެޑިކްޓް ވެފައިވާވުމުން ސަލާމަތް ކުރެވި އަދި އިގްތިސާދީ ތަނަވަސްކަން ކުރިއެކޭ އެއްގޮތަށް ދެމެހެއްޓޭނެ ކަމުގައެވެ. (ނޫސްއެޖެންސީތައް)