04 May 2016, 14:24
ފަރިވާ ފިހާރައިގައި އަލިފާނުގެ ހާދިސާ ހިނގިތާ ތިން މަހަށް ވުރެ ގިނަ ދުވަސް އެ މައްސަލަ ފައިލްކޮށްފައިވާ ކަމަށް ފުލުހުން ބުނެފި އެވެ.
ފުލުހުންގެ މިޑިއާ އޮފިޝަލް ސަން އަށް ވިދާޅުވީ، އެ ފިހާރަ ކައިރީ ހުރި ސްޓެލްކޯގެ ކަރަންޓް ފޮށީގެ ސަބަބުން އެ ފިހާރަ ރޯވި ކަމަށް ބައެއް ފަރާތްތަކުން ބުނި ނަމަވެސް އެކަމުގެ އެއްވެސް ހެއްކެއް ލިބިފައި ނުވާ ކަމަށެވެ.
އަދި ކުރި ތަހުގީގު ތަކުން އެއީ ގަސްތުގައި ބަޔަކު ކުރި ކަމެއް ކަމަށް ވެސް ހާމަވެފައި ނުވާ ކަމަށް ފުލުހުން ބުނެ އެވެ.
އެ މައްސަލަ ފައިލްކޮށްފައި ވަނީ އެ މައްސަލައާ ގުޅޭ އިތުރު މައުލޫމާތު ލިބެންދެން ކަމަށް ވެސް އޮފިޝަލް ވިދާޅުވި އެވެ.
ފަރިވާ ފިހާރައިގައި އަލިފާނުގެ ހާދިސާ ހިނގާފައި ވަނީ މި އަހަރުގެ ޖެނުއަރީ 20 ވަނަ ދުވަހު އެވެ. ދެ ބުރިއަށް ހަދާފައި ހުންނަ އެ ފިހާރާގައި އެ ރޭ ފަތިހު 4:00 ޖަހާކަންހާ އިރު ރޯވި އެ ފިހާރަ ވަނީ އެއްކޮށް އަނދާފަ އެވެ.
ފުލުހުން ބުނީ އަލިފާނުގެ އެ ހާދިސާ ހިނގި ފިހާރާގައި ހުރި ހުރިހާ މުދަލެއް އަނދައި ހުލިވެފައި ވާ ކަމަށެވެ.
ހަމައެއާ އެކު، އެފިހާރައާ އިންވެގެން ހުންނަ ގެއަކަށް ވެސް އަލިފާނުގެ އަސަރުކޮށް ގެއްލުންތަކެއް ލިބިފަ އެވެ. އެ ހާދިސާގައި މީހަކަށް އަނިޔާވެފައެއް ނުވެ އެވެ.