11 May 2016, 15:39
ސަރުކާރުގެ ކުންފުނި، މޯލްޑިވްސް ހައްޖު ކޯޕަރޭޝަންގެ ފަރާތުން ސައުދީ އަރަބިއްޔާގެ މާތްވެގެންވާ މައްކާގައި ދެމުންގެންދާ އަގީގާ ކަތިލުމުގެ ހިދުމަތުގެ އަގު ހެޔޮކޮށްފި އެވެ.
ހައްޖު ކޯޕަރޭޝަނުން ސައުދީ އަރަބިއްޔާގައި އަގީގާ ކަތިލުމުގެ ހިދުމަތް ކުރިން ދެނީ، ފިރިހެން ކުއްޖެއް ނަމަ 4626 ރުފިޔާ އަދި އަންހެން ކުއްޖަކަށް ނަމަ 2313 ރުފިޔާ އެވެ.
ހައްޖު ކޯޕަރޭޝަނުން ބުނީ، އަގުތަކަށް ގެނެވުނު ބަދަލާ އެކު އަގީގާ ކަތިލުމަށް ފިރިހެން ކުއްޖެއް ނަމަ ނަގާ އަގު ވަނީ 1232 ހެޔޮކޮށް، 3394 ރުފިޔާ އަށް ހަދައިފަ އެވެ. އަދި އަންހެން ކުއްޖަކަށްވާ ނަމަ 616 ރުފިޔާ ހެޔޮކޮށް މިހާރު އަގީގާ ކަތިލައިދެނީ 1697 ރުފިޔާ އަށް ކަމަށެވެ.
ސައުދީގައި އަގީގާ ކަތިލާން ބޭނުންވާ ބޭފުޅުން އެކަމަށް ހާއްސަ ފޯމެއް ފުރަން ޖެހެ އެވެ. އަދި ފޯމާ އެކު އެކަމަށްވާ ފައިސާ ހައްޖު ކޯޕަރޭޝަނަށް ލިބުމުން، ސައުދީ އަރަބިއްޔާގައި އަގީގާ ކަތިލުމުގައި ކުރަން ޖެހޭ އެންމެހާ ކަންތައްތައް ކޯޕަރޭޝަނުން ކޮށްދޭނެ އެވެ.
އެގޮތުން، އަގީގާ ކަތިލުމަށް ފަހު، ކަތިލެވުނު ނައުމްސޫފި ސާފުކޮށް، ޕެކެޓްތަކުގައި ބަންދުކުރުމަށް ފަހު ސައުދީ އަރަބިއްޔާގެ ކަމާ ބެހޭ އިދާރާ އިން ފަގީރުންނަށް ސަދަގާތް ކުރާނެ އެވެ.
އަގީގާ ކަތިލައި ނިމުމުން، އަގީގާ ކަތިކަމުގެ ހަނދާނީ ސެޓްފިކެޓެއް އަގީގާ ކަތިލުމަށް ރަޖިސްޓްރީވެ ފައިސާ ދެއްކި ބޭފުޅާ އަށް ހައްޖު ކޯޕަރޭޝަނުން ދޭނެ އެވެ. އަދި އަގީގާ ކަތިލެވޭ ވަގުތު ނަގާ ފޮޓޯ އަދި ވީޑިއޯ ބޭނުންފުޅުވާ ފަރާތްތަކަށް ފޯރުކޮށްދެވޭނެ އެވެ.
ހައްޖު ކޯޕަރޭޝަނުން ބުނީ، އަގީގާގެ އިތުރުން ކީރިތި ރަސޫލާގެ ސުންނަތުން ސާބިތުވާ އެހެނިހެން ކަތިލުންތައް ވެސް އެ ކޯޕަރޭޝަން މެދުވެރިކޮށް ހަމަޖައްސައިދެވޭނެ ކަމަށެވެ. އެފަދަ ކަތިލުމުގެ އަގަކީ ކަތިލުމަކަށް 1697 ރުފިޔާ އެވެ.